కైలాస యాత్రకు ఆరంభంలోనే అడ్డంకులు.. కొండచరియల బీభత్సంతో చిక్కుకుపోయిన యాత్రికులు

ఉత్తరాఖండ్‌లో ప్రకృతి ప్రకోపం మరోసారి యాత్రికులను ఉక్కిరిబిక్కిరి చేసింది. కొండచరియలు ఒక్కసారిగా విరిగిపడటంతో కైలాస్-మానస సరోవర్ యాత్రకు బయలుదేరిన వందలాది మంది భక్తులు మధ్యలోనే చిక్కుకుపోయారు. పితోరాగఢ్ జిల్లా సమీపంలోని కైలాస్ యాత్ర మార్గంలో జరిగిన ఈ ఘటనతో యాత్రికులే కాదు.. స్థానికులు కూడా తీవ్ర ఇబ్బందులు పడుతున్నారు. ఐదేళ్ల తర్వాత మళ్లీ ప్రారంభం కానున్న యాత్రకు ఇది పెద్ద షాక్ అనే చెప్పాలి.

పితోరాగఢ్ జిల్లాలో ఆది కైలాస్ మార్గంలో కొండచరియలు విరిగిపడటంతో రోడ్డు పూర్తిగా మూసుకుపోయింది. దీంతో యాత్రికులు, స్థానికులు ఎవరూ ముందుకు వెళ్లలేక ఇరుక్కుపోయారు. వెంటనే రంగంలోకి దిగిన స్థానిక యంత్రాంగం సహాయక చర్యలు మొదలుపెట్టింది. బోర్డర్ రోడ్స్ ఆర్గనైజేషన్ (BRO) బృందాలు ఇప్పటికే శిథిలాలను తొలగించే పనిలో నిమగ్నమయ్యాయి. సంతోషకరమైన విషయమేంటంటే, ఈ ఘటనలో ఇప్పటివరకు ఎటువంటి ప్రాణనష్టం జరగలేదని అధికారులు ధృవీకరించారు. పరిస్థితులు చక్కబడే వరకు యాత్రికులు సురక్షిత ప్రాంతాల్లోనే ఉండాలని అధికారులు సూచించారు.

పవిత్రమైన కైలాస్-మానస సరోవర్ యాత్ర గత ఐదేళ్లుగా నిలిచిపోయింది. 2020లో కరోనా మహమ్మారి కారణంగా ఈ యాత్ర ఆగిపోయింది. ఆ తర్వాత గల్వాన్ లోయ ఘర్షణల వల్ల భారత్, చైనాల మధ్య సంబంధాలు దెబ్బతినడంతో యాత్ర పునరుద్ధరణపై ఎలాంటి అడుగులు పడలేదు. అయితే, గత ఏడాది రష్యాలో ప్రధాని మోదీ, చైనా అధ్యక్షుడు షీ జిన్‌పింగ్ మధ్య జరిగిన భేటీ తర్వాత ఇరు దేశాల సంబంధాలు సాధారణ స్థితికి రావడంతో యాత్రకు మళ్లీ గ్రీన్ సిగ్నల్ లభించింది.

ఈ ఏడాది జూన్ నుండి ఆగస్టు వరకు యాత్ర కొనసాగనున్నట్లు కేంద్ర ప్రభుత్వం గత నెలలో అధికారికంగా ప్రకటించింది. ఉత్తరాఖండ్, సిక్కిం మార్గాల ద్వారా ఈ యాత్ర సాగుతుంది. 50 మంది యాత్రికుల చొప్పున 5 బృందాలు ఉత్తరాఖండ్‌లోని లిపులేఖ్ పాస్ నుంచి, 10 బృందాలు సిక్కిం నాథులా పాస్ నుంచి బయలుదేరుతాయని విదేశీ వ్యవహారాల శాఖ తెలిపింది. యాత్ర కోసం kmy.gov.in వెబ్‌సైట్‌లో దరఖాస్తులు స్వీకరిస్తున్నారు. కంప్యూటర్ ద్వారా లాటరీ పద్ధతిలో యాత్రికులను ఎంపిక చేస్తారు.

హిందువులకు అత్యంత పవిత్రమైన పుణ్యక్షేత్రాలలో కైలాస పర్వతం ఒకటి. సాక్షాత్తూ పరమశివుడు ఇక్కడే నివాసముంటాడని భక్తులు విశ్వసిస్తారు. కైలాస పర్వతానికి చేరువలోనే మానస సరోవరం సరస్సు కూడా ఉంది. ఇది బ్రహ్మ ముహూర్తంలో దేవతలు స్నానం చేసే ప్రదేశంగా నమ్ముతారు. టిబెట్‌లో ఉన్న ఈ రెండు సుమనోహర పుణ్యక్షేత్రాలు హిందువులకే కాకుండా, జైనులు, బౌద్ధులకు కూడా చాలా పవిత్రమైనవి. ప్రపంచం నలుమూలల నుంచి ప్రతేడాది వేలాది మంది భక్తులు కైలాస-మానస సరోవర్ యాత్రలో పాల్గొంటారు. ఇలాంటి పవిత్ర యాత్రకు ముందు కొండచరియలు విరిగిపడటం భక్తులలో ఆందోళన కలిగిస్తోంది.