ఎన్నారైలను వెంటాడుతున్న 'సైలెంట్ కిల్లర్'.. అమెరికాలో తెలుగు టెక్కీ మృతి..

ఒక నిండు ప్రాణం అర్ధాంతరంగా గాలిలో కలిసిపోవడం, అది కూడా పరాయి దేశంలో జరగడం అత్యంత హృదయ విదారకరం. 41 ఏళ్ల వయస్సులోనే గుండెపోటు ఆయనను కబలించింది. ఇద్దరు పసిపిల్లలు (అందులో ఒకరు ఛాలెంజ్‌డ్) ఉండడం చూస్తుంటే విధి ఎంత బలీయమైందో అర్థం చేసుకోవచ్చు. అమెరికా కలలు కంటూ వెళ్లే యువతకు నేడు భయంకరంగా వ్యాపిస్తున్న గుండెపోటు అనేది సవాలుగా మారింది. ఫ్లోరిడాలోని శాన్‌ఫోర్డ్‌లో సాఫ్ట్‌వేర్ ఇంజినీర్‌గా పనిచేస్తున్న సురేష్ కుమార్ ఏప్రిల్ 27న తెల్లవారుజామున గుండెపోటుతో మరణించడం తెలుగు సమాజాన్ని దిగ్భ్రాంతికి గురిచేసింది. ఎటువంటి అనారోగ్య సమస్యలు లేని వ్యక్తి కూడా ఇలా హఠాత్తుగా కన్నుమూయడం, విదేశాల్లో స్థిరపడిన భారతీయుల ఆరోగ్య స్థితిగతులపై ఆందోళన రేకెత్తిస్తోంది.

ఒక కుటుంబం చిన్నాభిన్నం..

ఈ ఘటనలో కేవలం ప్రాణం పోవడమే కాదు.., ఒక కుటుంబం ఆర్థికంగా, చట్టపరంగా పెద్ద సంక్షోభంలో పడిపోయింది. సురేష్ భార్య 'హెచ్ 4' వీసాపై ఉన్నారు. అమెరికా చట్టాల ప్రకారం, ప్రధాన వీసాదారుడు (H-1B) మరణిస్తే, వారిపై ఆధారపడిన వారి వీసా హోదా ప్రశ్నార్థకంగా మారుతుంది. ఇది ఆ సమయంలో భార్యకు తీరని వేదనను మిగిలిస్తుంది. పెద్ద కుమారుడు వికలాంగుడు కావడం, నిరంతర సంరక్షణ అవసరం కావడం ఆ తల్లికి సవాలుగా మారింది. 3 ఏళ్ల చిన్న కుమారుడి భవిష్యత్తు కూడా ఇప్పుడు అనిశ్చితిలో పడింది. అంత్యక్రియల కోసం, మృతదేహాన్ని భారత్ కు తరలించడం కోసం లక్షలాది రూపాయల ఖర్చు అవుతుంది. ఈ తరుణంలో ఎన్నారై సంఘాల సాయం కోసం కుటుంబం ఎదురుచూస్తోంది.

ఎన్నారైలలో గుండెపోటు కారణాలు..

రక్షణ వ్యయం లేదంటే ఇతర రంగాల్లో భారత్ ఎంత అభివృద్ధి చెందుతున్నా, మన మానవ వనరుల ఆరోగ్యం క్షీణించడం గమనించాల్సిన విషయం. అమెరికాలో ప్రాజెక్ట్ డెడ్‌లైన్లు, ఉద్యోగ భద్రత గురించిన భయం టెక్కీలలో నిరంతర ఒత్తిడిని పెంచుతోంది. బిజీ షెడ్యూల్ వల్ల తాజా భోజనం కంటే ప్రాసెస్డ్ ఫుడ్, అధిక కెఫీన్ ఉన్న పానీయాలపై ఆధారపడడం గుండెకు హాని కలిగిస్తోంది. గంటల తరబడి కంప్యూటర్ ముందు కూర్చోవడం, వ్యాయామం చేయడానికి సమయం దొరకకపోవడం వల్ల రక్తపోటు, కొలెస్ట్రాల్ సమస్యలు పెరుగుతున్నాయి. నైట్ షిఫ్టులు లేదా లేట్ నైట్ కాల్స్ వల్ల నిద్ర సరిగ్గా లేకపోవడం నేరుగా గుండె పనితీరుపై ప్రభావం చూపుతుంది. ఇక దక్షిణాసియా దేశాల వారికి జన్యుపరంగానే గుండెపోటు ముప్పు ఎక్కువగా ఉంటుందని వైద్య నిపుణులు చెబుతుంటారు.

సురేష్ కుమార్ మరణం ఎందరో సాఫ్ట్‌వేర్ ఇంజినీర్లకు ఒక హెచ్చరిక. 40 ఏళ్ల లోపు వారే ఎక్కువగా గుండెపోటుకు గురవుతుండడం గమనిస్తే, ఇకనైనా మన జీవనశైలిని మార్చుకోవాల్సిన అవసరం ఉంది. క్రమం తప్పకుండా హెల్త్ చెకప్స్ చేయించుకోవడం, రోజూ కనీసం 30 నిమిషాల వ్యాయామం, ఒత్తిడిని తగ్గించుకునే పద్ధతులు పాటించడం ముఖ్యం. సురేష్ కుటుంబానికి ఈ కష్టకాలంలో మనోధైర్యం కలగాలని, పిల్లల భవిష్యత్తుకు తెలుగు కమ్యూనిటీ అండగా నిలవాలని కోరుకుందాం.