సముద్రంలో సంక్షోభం: ఉక్రెయిన్ పోర్టులో 13 మంది భారతీయ నావికులు

రష్యా–ఉక్రెయిన్ యుద్ధ మేఘాలు.. మిడిల్ ఈస్ట్‌లో నివురుగప్పిన నిప్పులా ఉన్న రాజకీయ ఉద్రిక్తతలు ప్రపంచ వాణిజ్యాన్ని మాత్రమే కాక.. అంతర్జాతీయ జలాల్లో రాకపోకలు సాగిస్తున్న వాణిజ్య నౌకా సిబ్బంది ప్రాణాలను కూడా పణంగా పెడుతున్నాయి. దౌత్యపరమైన గొడవలు, సైనిక వ్యూహాల నడుమ ఏ పాపమూ ఎరుగని అమాయక పౌర నావికులు బలిపశువులుగా మారడం తీవ్ర ఆందోళన కలిగిస్తోంది. తాజాగా ఉక్రెయిన్‌లోని చోర్నోమోర్స్క్ పోర్టులో 'ఎంవీ అమీర్-1' నౌకలో 13 మంది భారతీయ నావికులు చిక్కుకుపోవడం, నిరంతరం క్షిపణులు, డ్రోన్ల సవ్వడుల నడుమ ప్రాణభయంతో అల్లాడిపోవడం ఈ తీవ్ర సంక్షోభానికి అద్దం పడుతోంది.

ఒకవైపు గగనతలంపై క్షిపణుల దాడి.. మరోవైపు సముద్రంలో నౌకలకు వీడని ఆంక్షలు.. ఇలాంటి అత్యంత ప్రమాదకరమైన వాతావరణంలో నావికులు గడుపుతున్న ఒక్కో నిమిషం నరకప్రాయం. ఇటీవల ఒడెస్సా తీరంలో 'ఎంవీ ఓమోర్ఫి' నౌకపై జరిగిన దాడిలో ఒక భారత నావికుడు ప్రాణాలు కోల్పోవడం, యుద్ధం మొదలైనప్పటి నుంచి ఇప్పటివరకు కనీసం ఐదుగురు భారతీయ సిబ్బంది బలైపోవడం ఈ ముప్పు తీవ్రతను చాటిచెబుతోంది. వాణిజ్య నౌకలు సైనిక లక్ష్యాలు కావు. అంతర్జాతీయ చట్టాలు, సముద్ర ఒప్పందాల ప్రకారం పౌర నౌకలపై దాడులకు తెగబడటం తీవ్రమైన మానవతా ఉల్లంఘనే అవుతుంది.

ఇప్పటికే భారత విదేశాంగ మంత్రిత్వ శాఖ ఉక్రెయిన్ రాయబారిని పిలిపించి తన తీవ్ర నిరసనను వ్యక్తం చేసింది. అయితే కేవలం దౌత్యపరమైన ఆందోళన తెలిపితే సరిపోదు. అక్కడ చిక్కుకున్న నావికులకు నిత్యావసరాలు, రక్షణ కల్పిస్తూనే, వారిని సురక్షిత ప్రాంతాలకు లేదా స్వదేశానికి తరలించేందుకు బహుముఖ వ్యూహాన్ని అమలు చేయాల్సిన అత్యవసర పరిస్థితి ఏర్పడింది.

ఉక్రెయిన్, రష్యా దేశాలతో ఉన్న సంబంధాలను ఉపయోగించి వాణిజ్య నౌకల్లోని పౌర సిబ్బందిని రక్షించేందుకు 'సేఫ్ కారిడార్' ఏర్పాటు చేయాలి. అంతర్జాతీయ సముద్ర సంస్థ , రెడ్ క్రాస్ వంటి సంస్థలను భాగస్వాములను చేసి, యుద్ధ ప్రాతిపదికన రెస్క్యూ ఆపరేషన్ చేపట్టి సిబ్బందిని బయటకు తీయాలి. ప్రమాదకర జలాల్లో ప్రయాణించే భారతీయ జెండా కలిగిన లేదా భారతీయ సిబ్బంది ఉన్న వాణిజ్య నౌకలకు అవసరమైన రక్షణను, సమాచారాన్ని నిరంతరం అందిస్తుండాలి.

ప్రపంచ సరఫరా వ్యవస్థ నడవాలంటే నావికుల శ్రమ అత్యంత కీలకం. ప్రమాదకర పరిస్థితుల్లో పనిచేస్తున్న ఈ శ్రామిక రంగానికి భద్రత కల్పించడం అంతర్జాతీయ సమాజం ఉమ్మడి బాధ్యత. కేంద్ర ప్రభుత్వం అత్యున్నత స్థాయిలో చొరవ తీసుకుని, చోర్నోమోర్స్క్ పోర్టులో చిక్కుకున్న 13 మంది భారతీయులను.. అలాగే అంతర్జాతీయ జలాల్లో ముప్పు ఎదుర్కొంటున్న ప్రతీ నావికుడిని క్షేమంగా సొంత గూటికి చేర్చాలని ఆశిద్దాం.