అమెరికాతో భారీ రక్షణ ఒప్పందానికి భారత్ సిద్ధం..!

అమెరికాతో సుంకాల విషయంలో తలెత్తిన కొన్ని విభేదాలు ఉన్నప్పటికీ, రక్షణ రంగంలో భారత్, అమెరికా మధ్య సహకారం మరింత బలపడుతోంది. ముఖ్యంగా అత్యాధునిక యుద్ధ విమానాల ఇంజిన్ల కోసం రెండు దేశాల మధ్య జరుగుతున్న చర్చలు కీలకమైనవిగా మారాయి. ఈ భాగస్వామ్యం కేవలం ఆయుధాల కొనుగోళ్లకు మాత్రమే పరిమితం కాకుండా స్వదేశీ రక్షణ పరిశ్రమను బలోపేతం చేసేందుకు సాంకేతికత బదిలీపై దృష్టి పెట్టడం ఒక ముఖ్యమైన పరిణామం.

- F414 ఇంజిన్లపై కీలక చర్చలు

హిందూస్తాన్ ఏరోనాటిక్స్ లిమిటెడ్ (HAL) , అమెరికాకు చెందిన GE సంస్థ మధ్య F414-INS6 ఇంజిన్ల ఉమ్మడి ఉత్పత్తి కోసం చర్చలు ఐదవ రౌండ్‌కు చేరుకున్నాయి. ఈ ఇంజిన్లు భారత్ నిర్మిస్తున్న తేజస్ Mk-2 , తొలి దశ అడ్వాన్స్‌డ్‌ మీడియం కంబాట్‌ ఎయిర్‌క్రాఫ్ట్‌ (AMCA) వంటి కీలక యుద్ధ విమానాలకు శక్తినివ్వనున్నాయి. ఈ ఒప్పందంలో 80% వరకు సాంకేతికత బదిలీ ఉంటుందని అంచనా. అయితే ఈ బదిలీ కేవలం ఉత్పత్తి ప్రక్రియకు మాత్రమే పరిమితం కావడం, డిజైన్ , అభివృద్ధి దశలకు వర్తించకపోవడం గమనించదగిన విషయం.

- భవిష్యత్ అవసరాల కోసం కొత్త ప్రణాళికలు

దీర్ఘకాలిక అవసరాలను దృష్టిలో పెట్టుకుని.. భారత్ మరోవైపు ఫ్రెంచ్ కంపెనీ సఫ్రాన్‌తో కలిసి 120 kN శక్తి కలిగిన కొత్త ఇంజిన్‌ను అభివృద్ధి చేయాలని ప్రణాళికలు వేస్తోంది. ఇది AMCA ప్రాజెక్ట్‌లో రెండవ దశ విమానాలకు ఉపయోగపడనుంది. ఈ రెండు వేర్వేరు ప్రాజెక్టులు భారత వైమానిక దళానికి అవసరమైన విమాన ఇంజిన్ల డిమాండ్‌ను తీర్చడంతో పాటు భవిష్యత్తులో దేశీయంగా శక్తివంతమైన ఇంజిన్లను తయారు చేసుకునే సామర్థ్యాన్ని పెంచుతాయి.

- తేజస్ Mk-2: భారత వైమానిక దళానికి కొత్త బలం

F414 ఇంజిన్‌తో నడిచే తేజస్ Mk-2 పరిమిత ఉత్పత్తి 2026లో ప్రారంభమయ్యే అవకాశం ఉంది. ఇది 4.5 తరం సింగిల్ ఇంజిన్ మల్టీరోల్ కంబాట్ ఎయిర్‌క్రాఫ్ట్. భారత వైమానిక దళంలో ఉన్న పాత మిరాజ్-2000, జాగ్వార్, , MiG-29 వంటి యుద్ధ విమానాల స్థానంలో ఇది ప్రవేశించనుంది. 2031 నుండి భారత వైమానిక దళం దీనిని పూర్తిస్థాయిలో తమ బలగంలో చేర్చుకోవాలని యోచిస్తోంది.

ఈ మొత్తం పరిణామం భారత్ తన రక్షణ అవసరాల కోసం కేవలం విదేశీ దిగుమతులపై ఆధారపడకుండా.. స్వదేశీ సామర్థ్యాలను పెంచుకోవడానికి కృషి చేస్తుందని స్పష్టం చేస్తుంది. రక్షణ రంగంలో ఆత్మనిర్భర భారత్ లక్ష్యాలకు ఇది ఒక ముఖ్యమైన అడుగుగా చెప్పొచ్చు.