ఐటీ ఉద్యోగులకు షాకింగ్ హెచ్చరిక

హైదరాబాద్ నగరంలోని ఐటీ ఉద్యోగుల ఆరోగ్యంపై ఆందోళన కలిగించే అంశాలు వెలుగులోకి వచ్చాయి. కేంద్ర ఆరోగ్య మంత్రి జేపీ నడ్డా తాజాగా వెల్లడించిన గణాంకాల ప్రకారం.. నగరంలోని సాఫ్ట్‌వేర్ ఉద్యోగుల్లో అత్యధిక శాతం మంది తీవ్రమైన ఆరోగ్య సమస్యలతో బాధపడుతున్నారు.

-ప్రధాన సమస్యలు

ఫ్యాటీ లివర్: 84 శాతం మంది ఐటీ ఉద్యోగులకు ఫ్యాటీ లివర్ సమస్య ఉన్నట్లు నిర్ధారణ అయింది.

ఊబకాయం: 71 శాతం మంది ఉద్యోగులు ఊబకాయంతో బాధపడుతున్నారు.

మెటబాలిక్ సిండ్రోమ్: 34 శాతం మందికి మెటబాలిక్ సిండ్రోమ్ సమస్య ఉంది.

ఈ గణాంకాలు ఐటీ ఉద్యోగుల జీవనశైలి కారణంగా ఎదురవుతున్న ఆరోగ్య ప్రమాదాలను స్పష్టంగా తెలియజేస్తున్నాయి. గంటల తరబడి కూర్చొని పనిచేయడం, శారీరక శ్రమ లేకపోవడం, ప్రాసెస్డ్ ఫుడ్, ఫాస్ట్ ఫుడ్ ఎక్కువగా తీసుకోవడం, నిద్రలేమి, ఒత్తిడి వంటివి ఈ సమస్యలకు ప్రధాన కారణాలుగా డాక్టర్లు పేర్కొంటున్నారు.

దీర్ఘకాలిక ప్రభావాలు

ఈ సమస్యలు కాలక్రమేణా తీవ్రమైన ఆరోగ్య సమస్యలకు దారితీస్తాయని వైద్య నిపుణులు హెచ్చరిస్తున్నారు. గుండెజబ్బులు, స్ట్రోక్, టైప్-2 డయాబెటిస్, లివర్ సంబంధిత వ్యాధులు వచ్చే ప్రమాదం ఎక్కువగా ఉందని వారు తెలిపారు.

పరిష్కార మార్గాలు:

రోజుకు కనీసం 30 నిమిషాల వ్యాయామం, ప్రతి గంటకు ఒకసారి లేచి నడవడం తప్పనిసరి. పండ్లు, తాజా కూరగాయలు, పోషక విలువలున్న ఆహారాన్ని తీసుకోవాలి. ఫాస్ట్ ఫుడ్, ప్రాసెస్డ్ ఫుడ్ తగ్గించాలి.

శరీరానికి అవసరమైన నీరు తాగడం ద్వారా హైడ్రేటెడ్‌గా ఉండాలి. యోగా, మెడిటేషన్ వంటి వాటితో ఒత్తిడిని తగ్గించుకోవాలి.

ఉద్యోగులు, సంస్థలు తీసుకోవాల్సిన చర్యలు

ఇది కేవలం వ్యక్తిగత సమస్య మాత్రమే కాదు, సంస్థల పనితీరుపైనా ప్రభావం చూపిస్తుంది. ఉద్యోగుల ఆరోగ్యంపై సంస్థలు దృష్టి సారించడం ద్వారా వారి ఉత్పాదకతను పెంచవచ్చు.

ఐటీ ఉద్యోగులు తమ ఆరోగ్యంపై అప్రమత్తంగా ఉండాలని, చిన్న చిన్న జీవనశైలి మార్పులతో పెద్ద ఆరోగ్య సమస్యలను నివారించవచ్చని వైద్యులు సూచిస్తున్నారు. "ఆరోగ్యమే మహాభాగ్యం" అని గుర్తించుకోవాలి.