డ్రంకెన్ డ్రైవ్ నుంచి తప్పించుకోవాలనే ప్లాన్.. నెంబర్ ప్లేట్ మార్చే టెక్నాలజీతో బురిడీ!

హైదరాబాద్ నగరంలో డ్రంకెన్ డ్రైవ్ తనిఖీలు సాధారణమే. కానీ ఇటీవల జూబ్లీహిల్స్ ప్రాంతంలో వెలుగులోకి వచ్చిన ఒక ఘటన మాత్రం పోలీసులనే ఆశ్చర్యానికి గురిచేసింది. అక్రమాలకు పాల్పడే వారిని పట్టుకోవడంలో ఎప్పుడూ ముందుండే హైదరాబాద్ పోలీసులు కూడా ఇలాంటి మోసాన్ని ఇప్పటివరకు చూడలేదని చెబుతున్నారు.

సాధారణంగా సాయంత్రం తర్వాత నగరంలోని జూబ్లీహిల్స్, బంజారాహిల్స్, మాదాపూర్, ఫైనాన్షియల్ డిస్ట్రిక్ట్ వంటి ప్రాంతాల్లో పోలీసులు విస్తృతంగా డ్రంకెన్ డ్రైవ్ తనిఖీలు నిర్వహిస్తారు. మద్యం సేవించి వాహనం నడిపేవారికి కౌన్సిలింగ్ ఇవ్వడం, జరిమానాలు విధించడం, అవసరమైతే వాహనాలను సీజ్ చేయడం వంటి చర్యలు తీసుకుంటారు. ఎంత తెలివిగా తప్పించుకోవాలని ప్రయత్నించినా పోలీసులు వేసే స్కెచ్‌కు చిక్కక తప్పదు.

అయితే ఈసారి ఓ వ్యక్తి మాత్రం పోలీసులనే మోసం చేయాలనే ఉద్దేశంతో అత్యంత వినూత్నమైన పద్ధతిని ఉపయోగించాడు. జూబ్లీహిల్స్‌లో తనిఖీలు జరుగుతున్న సమయంలో ఓ కారు అతివేగంగా రావడంతో పోలీసులు ఆపారు. డ్రైవర్‌ను పరీక్షిస్తున్న సమయంలోనే మరో వాహనాన్ని కూడా పోలీసులు తనిఖీ చేస్తున్నారు. ఇదే సమయంలో ఆ కారులోని నెంబర్ ప్లేట్ ఒక్కసారిగా మారడం గమనించిన పోలీసులు షాక్‌కు గురయ్యారు.

మొదట్లో ఇది ఎలా సాధ్యమైందో అర్థం కాక పోలీసులే అయోమయంలో పడ్డారు. వెంటనే అప్రమత్తమైన వారు కారులో ఉన్న వ్యక్తిని కిందికి దించి విచారించారు. ఆ తర్వాత అసలు విషయమే బయటపడింది. ఆ కారులో ప్రత్యేకంగా అమర్చిన మెకానికల్ పరికరాల సహాయంతో బటన్ నొక్కగానే నెంబర్ ప్లేట్ మారేలా సాంకేతిక వ్యవస్థను ఏర్పాటు చేసుకున్నట్లు తెలిసింది.

డ్రంకెన్ డ్రైవ్ కేసుల్లో చిక్కకుండా తప్పించుకోవడానికే ఈ విధానాన్ని ఉపయోగిస్తున్నాడని పోలీసులు గుర్తించారు. చలాన్లు పడకుండా ఉండేందుకు, తన వాహనం గుర్తుపట్టకుండా ఉండేందుకు ఈ మోసపూరిత టెక్నాలజీని వాడుతున్నట్లు తేలింది. ఈ వ్యవస్థను అమర్చేందుకు అతడు భారీ మొత్తంలో ఖర్చు పెట్టినట్లు సమాచారం.

ఈ ఘటనపై స్పందించిన పోలీసులు వెంటనే ఆ వ్యక్తిని అదుపులోకి తీసుకుని, వాహనాన్ని సీజ్ చేశారు. అలాగే కారులో అమర్చిన పరికరాలను స్వాధీనం చేసుకున్నారు. తెలంగాణ పోలీస్ చరిత్రలో ఇలాంటి ఘటన ఇదే తొలిసారి కావడం గమనార్హం.

ఈ ఘటన సోషల్ మీడియాలో వైరల్‌గా మారింది. “ఇంత ఖర్చు పెట్టి మోసం చేయడం కన్నా ట్రాఫిక్ నిబంధనలు పాటిస్తే బాగుండేది” అంటూ నెటిజన్లు కామెంట్లు చేస్తున్నారు. మొత్తానికి చట్టాన్ని మోసం చేయాలని ప్రయత్నించినా చివరికి పోలీసుల దృష్టికి చిక్కక తప్పదని ఈ ఘటన మరోసారి నిరూపించింది.