బంగారం తులం రూ. 2 లక్షలకు చేరనుందా..? ఆ నివేదికలు చెప్తున్నదేంటి..?

ఈ ఏడాది అక్షయ తృతీయ బులియన్ మార్కెట్ చరిత్రలో మైలురాయిగా నిలిచింది. సామాన్యుడు తులం బంగారం రూ. 1.5 లక్షలు దాటుతుందని ఊహించి ఉండకపోవచ్చు, కానీ ఏడాదిలో 63.4% రాబడి ఇవ్వడం అనేది పసిడి పట్ల భారతీయులకున్న నమ్మకాన్ని మరింత పెంచింది. స్టాక్ మార్కెట్ ఒడిదుడుకులను తట్టుకొని, సురక్షితమైన పెట్టుబడిగా బంగారం తన ‘విశ్వరూపాన్ని’ ప్రదర్శిస్తోంది.

అక్షయ తృతీయ వేళ రూ. 2 లక్షల వరకు పరుగులు..

భారతీయ సంస్కృతిలో బంగారం కేవలం అలంకరణ వస్తువు కాదు, అది ఆపత్కాలంలో ఆదుకునే ఆర్థిక రక్షణ కవచం. 19 ఏప్రిల్, 2026న అక్షయ తృతీయ జరుపుకుంటున్న తరుణంలో మార్కెట్ విశ్లేషణలు చూస్తుంటే పసిడి ధరలు సామాన్యుడికి అందనంత ఎత్తుకు చేరుకున్నాయని అర్థం అవుతోంది. ఏడాదిలో బంగారం చూపిన దూకుడు చూసి ఆర్థిక నిపుణులు కూడా విస్మయానికి గురవుతున్నారు. ఒకప్పుడు పదేళ్లకు ఒకసారి వచ్చే రాబడులను బంగారం ఇప్పుడు కేవలం ఒక్క ఏడాదిలోనే అందిస్తోంది.

ఏడాదిలో 63% వృద్ధి..

గత అక్షయ తృతీయ (2025) నుంచి నేటి వరకు బంగారం ధరల పెరుగుదల ఒక ప్రభంజనంలా సాగింది. 2025, ఏప్రిల్ చివరలో రూ. 94,611 వద్ద ఉన్న తులం బంగారం, నేడు రూ. 1,54,609 వద్ద ట్రేడ్ అవుతోంది. అంటే కేవలం 12 నెలల్లో సుమారు రూ. 59,998 పెరిగింది. ప్రపంచ వ్యాప్తంగా నెలకొన్న భౌగోళిక రాజకీయ అనిశ్చితులు (యుద్ధ మేఘాలు), అమెరికన్ డాలర్ విలువలో ఒడిదుడుకులు, వివిధ దేశాల సెంట్రల్ బ్యాంకులు తమ ఫారెక్స్ నిల్వల కోసం టన్నుల కొద్దీ బంగారాన్ని పోగు చేయడం ఈ భారీ ర్యాలీకి ప్రధాన కారణాలు.

18% సీఏజీఆర్ తో అప్రతిహత వృద్ధి

గడిచిన దశాబ్ద కాలంలో బంగారం స్థిరమైన సంపద సృష్టికర్తగా నిలిచింది. కేడియా అడ్వయిజరీ నివేదిక ప్రకారం.., 2016 నుంచి 2026 వరకు బంగారం 18% వార్షిక వృద్ధి రేటును (సీఏజీఆర్) నమోదు చేసింది. 2020లో కరోనా సమయంలో 47% లాభం ఇవ్వగా, ఇప్పుడు 2026లో 63.4% రాబడితో సరికొత్త రికార్డులను తిరగరాస్తోంది. ఇది రియల్ ఎస్టేట్ లేదా స్టాక్ మార్కెట్ కంటే మెరుగైన ప్రదర్శన అని నిపుణులు చెబుతున్నారు.

రూ. 2 లక్షల మార్కు..

ప్రస్తుత వేగం చూస్తుంటే, వచ్చే అక్షయ తృతీయ (2027) నాటికి తులం బంగారం రూ. 2 లక్షల మార్కును తాకడం ఖాయమని వెంతురా సెక్యూరిటీస్ వంటి సంస్థలు అంచనా వేస్తున్నాయి. 2026, డిసెంబర్ నాటికే ఇది రూ. 1.75 లక్షలకు చేరుకునే అవకాశం ఉంది. అమెరికా ఆర్థిక వ్యవస్థలో పెరుగుతున్న ద్రవ్య లోటు వల్ల ఇన్వెస్టర్లు సురక్షితమైన ఆస్తిగా భావించే బంగారం వైపు మళ్లుతున్నారు. మోహిత్ గులాటి అన్నట్లుగా, బంగారం ధర పెరగడం కంటే డాలర్ బలహీనపడడం పైనే నిపుణులు ఎక్కువ ఆందోళన చెందుతున్నారు.

బరువు తగ్గింది.. విలువ పెరిగింది!

ధరలు ఆకాశాన్ని తాకడంతో భారతీయుల కొనుగోలు విధానంలో మార్పు వచ్చింది. ధరలు పెరగడం వల్ల కొనుగోలు సామర్థ్యం (టికెట్ సైజ్) 69% పెరిగినా, వాస్తవంగా కొనే బంగారం బరువు (టన్నేజీ) 31% పడిపోయింది. భారీ హారాల కంటే 18 క్యారెట్ల లైట్ వెయిట్ జ్యువెలరీకి డిమాండ్ పెరిగింది. అలాగే, మదుపర్లు ఆభరణాల కంటే 'గోల్డ్ కాయిన్స్', 'గోల్డ్ బిస్కెట్ల' రూపంలో పెట్టుబడి పెట్టడానికి మొగ్గు చూపుతున్నారు. ‘ధర పెరుగుతుందనే భయంతో కొనే వారి కంటే, బడ్జెట్ చూసుకుని కొనే వారే ఎక్కువయ్యారు.’

ధరలు ఎంత పెరిగినా భారతీయుడికి బంగారంపై ఉన్న మక్కువ తగ్గదు. అక్షయ తృతీయ నాడు కనీసం గ్రాము బంగారమైనా కొంటే శుభం జరుగుతుందనే నమ్మకం ఇప్పటికీ భారతీయుల నమ్మకంలో ముడిపడి ఉంది. ఇది పసిడి వ్యాపారాన్ని ముందుకు నడిపిస్తోంది. అయితే, కేవలం ఫిజికల్ గోల్డ్ మాత్రమే కాకుండా డిజిటల్ గోల్డ్, గోల్డ్ ఈటీఎఫ్, సావరిన్ గోల్డ్ బాండ్ల వైపు కూడా యువత మొగ్గు చూపడం విశేషం. వచ్చే ఏడాది నాటికి రూ. 2 లక్షల మైలురాయిని చేరి బంగారం తన 'విశ్వరూపాన్ని' సంపూర్ణం చేస్తుందో లేదో వేచి చూడాలి.