ఎలాన్ మస్క్‌తో బంధం ముగిసిందా? అసలు షివోన్ జిలిస్ ఏం చెప్పారంటే..
ప్రపంచ ప్రసిద్ధ పారిశ్రామికవేత్త.. టెక్ దిగ్గజం ఎలాన్ మస్క్ వ్యక్తిగత జీవితం మరోసారి అంతర్జాతీయ మీడియాలో ప్రధాన చర్చనీయాంశంగా మారింది.
ప్రపంచ ప్రసిద్ధ పారిశ్రామికవేత్త.. టెక్ దిగ్గజం ఎలాన్ మస్క్ వ్యక్తిగత జీవితం మరోసారి అంతర్జాతీయ మీడియాలో ప్రధాన చర్చనీయాంశంగా మారింది. మస్క్, ఆయన భాగస్వామి షివోన్ జిలిస్ విడిపోయినట్లు జిలిస్ చేసిన సోషల్ మీడియా పోస్టుతో స్పష్టత వచ్చింది. అయితే కేవలం విడిపోవడం మాత్రమే కాకుండా మస్క్‌పై ఆమె వ్యక్తం చేసిన భావోద్వేగాలు, గౌరవం ఇప్పుడు నెటిజన్ల దృష్టిని ఆకర్షిస్తున్నాయి.
ప్రేమ ముగిసినా గౌరవం చెక్కుచెదరలేదు
తన ఎక్స్ ఖాతా ద్వారా స్పందించిన షివోన్ జిలిస్, మస్క్‌ను తాను ఎంతో లోతుగా ప్రేమించానని వెల్లడించారు. "ఒక్కసారిగా విడిపోవాల్సిన పరిస్థితి రావడం ఎంతో బాధాకరం. అయినప్పటికీ ఆయన జీవితంలో ఎల్లప్పుడూ సంతోషంగా ఉండాలని కోరుకుంటున్నాను" అని ఆమె పేర్కొన్నారు. ప్రేమికులుగా విడిపోయినప్పటికీ.. తమ పిల్లల భవిష్యత్తు కోసం మంచి స్నేహితులుగా, బాధ్యతాయుతమైన సహ-తల్లిదండ్రులుగా కలిసి ప్రయాణిస్తామని ఆకాంక్షించారు.
మస్క్ జీవితంలో ఒక “సేఫ్ స్పేస్”
జిలిస్ తన పోస్ట్‌లో మరో ఆసక్తికర విషయాలను పంచుకున్నారు. ప్రపంచస్థాయి ఒత్తిళ్లు, వివాదాలు, సవాళ్లతో పోరాడే మస్క్‌కు తమ ఇంట్లో ఎల్లప్పుడూ ప్రశాంతత, ప్రేమ లభించేవని పేర్కొన్నారు. తమ కుటుంబం ఆయనకు ఒక "సేఫ్ స్పేస్"గా నిలిచిందని.. మస్క్ ఎంత ఒత్తిడిలో ఉన్నా ఆయన ముఖంలో చిరునవ్వు చూడటమే తనకు ఎంతో ఆనందాన్ని ఇచ్చేదని తెలిపారు.
వాట్సాప్ చాట్ స్క్రీన్‌షాట్ ప్రత్యక్షం
ఈ వ్యాఖ్యలతో పాటు సెప్టెంబర్ 24న తమ మధ్య జరిగిన సంభాషణ స్క్రీన్‌షాట్‌ను కూడా జిలిస్ పంచుకున్నారు. అందులో ఇద్దరూ ఒకరికొకరు "లవ్ యూ" అని పంపుకోవడం.. అలాగే ఒక హై-ప్రొఫైల్ డిన్నర్ కార్యక్రమానికి ఆహ్వానించలేకపోవడంపై మస్క్ ఆమెకు వివరణ ఇవ్వడం కనిపించింది. దీన్ని బట్టి ఇటీవల కాలం వరకు కూడా వీరి మధ్య సాన్నిహిత్యం కొనసాగిందని స్పష్టమవుతోంది.
నలుగురు సంతానం.. ప్రత్యేకమైన అనుబంధం
మస్క్-జిలిస్ అనుబంధం సాధారణ రొమాంటిక్ రిలేషన్‌కు భిన్నంగా సాగింది. తొలుత వృత్తిపరమైన సహచరులుగా.. స్నేహితులుగా మొదలైన ఈ బంధం కాలక్రమేణా వ్యక్తిగతంగా మరింత బలపడింది. వీరిద్దరికీ నలుగురు పిల్లలు ఉన్నారు. 2021లో కవలలు స్ట్రైడర్, అజ్యూర్ జన్మించగా 2024లో ఆర్కాడియా, 2025లో సెల్డన్ లైకర్గస్ జన్మించారు.
నెటిజన్ల ప్రశంసలు
ఎలాన్ మస్క్ గతంలో పలు బంధాలకు దూరమైనప్పటికీ జిలిస్ స్పందించిన తీరు ప్రత్యేకంగా నిలిచింది. విడిపోయిన తర్వాత కూడా వ్యక్తిగత కక్షలకు తావివ్వకుండా పరస్పరం చూపిన గౌరవం, పిల్లల సంక్షేమానికి ప్రాధాన్యత ఇవ్వడంపై నెటిజన్లు హర్షం వ్యక్తం చేస్తున్నారు. "సంబంధం ముగిసినంత మాత్రాన అనుబంధం, గౌరవం ముగిసిపోవు" అని జిలిస్ పోస్ట్ నిరూపించిందని విశ్లేషిస్తున్నారు.