ముదురు రంగుల‌తో పోలిస్తే 'వైట్ కార్' ప్ర‌యోజ‌నం అదే!

కార్ల రంగులకు.. వాటి ఇంధన సామర్థ్యానికి మధ్య ఉన్న సంబంధంపై జరుగుతున్న చర్చలు వాహన ప్రియులను విపరీతంగా ఆకట్టుకుంటున్నాయి. సాధారణంగా మనం ఎంచుకునే రంగు కేవలం అందం కోసమే కాకుండా.. కారు పనితీరుపై కూడా కొంత ప్రభావాన్ని చూపుతుందని తాజా విశ్లేషణలు స్పష్టం చేస్తున్నాయి. ముఖ్యంగా వేడి వాతావరణంలో తెల్లని కార్లు ఇంధన సామర్థ్యంలో .. మైలేజీలో స్వల్ప మెరుగుదలని అందిస్తాయని శాస్త్రీయ అధ్యయనాలు నిరూపిస్తున్నాయి.

డార్క్ క‌ల‌ర్స్ ఉండే కార్లు శోషించుకునే ఉష్ణోగ్రతలలో స్పష్టమైన తేడాలు ఉంటాయి. నలుపు రంగు కారు అత్యధికంగా 62 డిగ్రీల సెల్సియస్ వేడిని పీల్చుకోవడం వల్ల ఏసీ ఎక్కువసేపు పనిచేసి ఇంజిన్‌పై భారం పడి మైలేజ్ తగ్గుతుంది. అలాగే గోధుమ రంగు -57°C, ఎరుపు రంగు -51°C, ప‌సుపు రంగు- 51°C, నీలం రంగు -48°C, సిల్వర్ రంగు -47°C .. వేడిని గ్రహిస్తాయి. దీనికి విరుద్ధంగా తెలుపు రంగు కలర్ కారు కేవలం 43 డిగ్రీల సెల్సియస్ వేడిని మాత్రమే గ్రహించడం వల్ల ఏసీ తక్కువగా పనిచేసి మైలేజ్ మెరుగ్గా ఉంటుంది.

సైన్స్ పరంగా చూస్తే.. తెలుపు రంగు పెయింట్ దాదాపు 60 శాతం సౌర వికిరణాన్ని పరావర్తనం చెందిస్తుంది. లారెన్స్ బర్క్‌లీ నేషనల్ లాబొరేటరీ అధ్యయనాల ప్రకారం.. ఈ కారణంగానే పార్క్ చేసిన తెల్లని లేదా వెండి రంగు కార్ల క్యాబిన్ ఉష్ణోగ్రతలు ముదురు రంగు వాహనాల కంటే 8 నుండి 9 డిగ్రీల సెల్సియస్ తక్కువగా ఉంటాయి. క్యాబిన్ లోపలి భాగం చల్లగా ఉండటం వల్ల‌ ఎయిర్ కండిషనింగ్ కంప్రెసర్ మీద పడే భారం తగ్గుతుంది.

ఈ థర్మోడైనమిక్స్ ప్రయోజనాలు నిజమైనా కానీ.. రోజువారీ డ్రైవింగ్‌లో ఇంధన గేజ్ పై దీని ప్రభావం చాలా తక్కువగా... అతి స్వల్పంగా ఉంటుంది. నల్లటి కార్లతో పోలిస్తే ఇది ఇంధన ఆర్థిక వ్యవస్థలో లేదా ఈవీ రేంజ్‌లో కేవలం 1 నుండి 2 శాతం వరకు మాత్రమే పెరుగుదలకు దోహదపడుతుంది. వాస్తవానికి డ్రైవింగ్ శైలి, ట్రాఫిక్ పరిస్థితులు, టైర్ గాలి పీడనం, ఇంజిన్ మెయింటెనెన్స్ వంటి అంశాలే కారు మైలేజీపై అసలైన ప్రధాన పాత్ర పోషిస్తాయి.

ఇక ఆచరణాత్మక ప్రయోజనాల పరంగా ఆలోచిస్తే.. తెల్లని కార్లపై చిన్నపాటి ధూళి, గీతలు త్వరగా బయటపడవు. తక్కువ వేడిని పీల్చుకునే గుణం ఉండటం.. మార్కెట్లో దీనికి ఎప్పుడూ ఉండే డిమాండ్ కారణంగా రీసేల్ విలువ పరంగా కూడా తెల్లని కార్లకు అత్యధిక ఆదరణ లభిస్తుంది.