మంటపుట్టిస్తున్న ముడి చమురు: $150 దాటే దిశగా క్రూడ్ ఆయిల్.. సామాన్యుడిపై పెట్రో భారం తప్పదా?

అంతర్జాతీయ రాజకీయాల్లో నెలకొన్న అస్థిరత,పెరుగుతున్న యుద్ధ మేఘాలు ప్రపంచ ఆర్థిక వ్యవస్థను అతలాకుతలం చేస్తున్నాయి. ప్రస్తుతం నెలకొన్న ఉద్రిక్త పరిస్థితుల నేపథ్యంలో క్రూడ్ ఆయిల్ ధరలు ఆకాశాన్ని తాకుతున్నాయి. ఇది కేవలం ఒక రంగానికే పరిమితం కాకుండా ప్రపంచవ్యాప్తంగా సామాన్యుడి జేబుకు చిల్లు పెట్టేలా మారుతోంది.

భగ్గుమంటున్న ముడి చమురు ధరలు

యుద్ధం ప్రారంభానికి ముందు అంతర్జాతీయ మార్కెట్‌లో బ్యారెల్ క్రూడ్ ఆయిల్ ధర సుమారు $79 వద్ద స్థిరంగా ఉండేది. అయితే యుద్ధం మొదలైన కొన్ని వారాల్లోనే ఈ ధర ఏకంగా $119 మార్కును చేరుకుంది. అంటే దాదాపు 50% పైగా పెరుగుదల నమోదైంది. ప్రధాన చమురు ఉత్పత్తి దేశాల మధ్య నెలకొన్న ఉద్రిక్తతలు, సరఫరా గొలుసు దెబ్బతినడమే దీనికి ప్రధాన కారణం. ఆర్ధిక నిపుణుల అంచనాల ప్రకారం.. ఒకవేళ ఈ యుద్ధం ఏప్రిల్ వరకు కొనసాగితే ముడి చమురు ధర బ్యారెల్‌కు $150 మార్కును దాటే ప్రమాదం ఉంది. ఇది గత దశాబ్ద కాలంలోనే అత్యధిక ధరగా రికార్డు సృష్టించనుంది.

భారత్‌పై ప్రభావం.. పెరగనున్న పెట్రో ధరలు

భారతదేశం తన చమురు అవసరాలలో దాదాపు 80% పైగా దిగుమతుల ద్వారానే తీర్చుకుంటుంది. అంతర్జాతీయంగా ధరలు పెరిగినప్పుడు.. దేశీయంగా పెట్రోల్, డీజిల్ ధరలు పెరగడం అనివార్యం. ఇప్పటికే ఉన్న ధరలకు తోడు, రానున్న రోజుల్లో చమురు సంస్థలు భారీగా ధరలను సవరించే అవకాశం ఉందని మార్కెట్ వర్గాలు హెచ్చరిస్తున్నాయి. డీజిల్ ధరలు పెరిగితే లారీలు, వ్యాన్ల అద్దెలు పెరుగుతాయి. రవాణా ఖర్చు పెరగడంతో పాలు, కూరగాయలు, బియ్యం వంటి నిత్యావసర వస్తువుల ధరలు సామాన్యుడికి భారం కానున్నాయి. ధరల పెరుగుదల వల్ల ద్రవ్యోల్బణం పెరిగి, రూపాయి విలువ క్షీణించే అవకాశం ఉంది.

సంక్షోభంలో పరిశ్రమలు.. వ్యవసాయం

చమురు ధరల ప్రభావం కేవలం వాహనదారులకే పరిమితం కాదు. పారిశ్రామిక ఉత్పత్తిలో ఇంధనం ప్రధాన పాత్ర పోషిస్తుంది. ఉత్పత్తి ఖర్చులు పెరగడం వల్ల కంపెనీలు తమ ఉత్పత్తుల ధరలను పెంచుతాయి. ఇది ఎలక్ట్రానిక్స్ నుండి ప్లాస్టిక్ వస్తువుల వరకు అన్నిటిపై ప్రభావం చూపుతుంది. ట్రాక్టర్లు, పంపు సెట్ల కోసం వాడే డీజిల్ ధరలు పెరిగితే సాగు ఖర్చు భారమవుతుంది, ఇది రైతులకు శాపంగా మారనుంది. ఏవియేషన్ టర్బైన్ ఫ్యూయల్ ధరలు పెరగడం వల్ల విమాన టికెట్ల ధరలు కూడా భారీగా పెరిగే అవకాశం ఉంది.

ప్రభుత్వాల ముందున్న సవాలు

ఒకవేళ క్రూడ్ ఆయిల్ ధర నిజంగానే $150 దాటితే దేశంలో పెట్రోల్, డీజిల్ ధరలు దాదాపు రెట్టింపు అయ్యే ప్రమాదం ఉందని విశ్లేషకులు ఆందోళన వ్యక్తం చేస్తున్నారు. ఇటువంటి విపత్కర పరిస్థితుల్లో ప్రభుత్వం ఎక్సైజ్ సుంకాలను తగ్గించి ప్రజలకు ఉపశమనం కలిగిస్తుందా? లేక అంతర్జాతీయ ఒత్తిడికి తలొగ్గి ధరల భారాన్ని ప్రజలపైనే వేస్తుందా అనేది వేచి చూడాలి. ప్రస్తుతానికి ఆయిల్ ఉత్పత్తి చేసే దేశాలు (ఓపెక్) సరఫరాను పెంచితే తప్ప ధరలు తగ్గుముఖం పట్టే సూచనలు కనిపించడం లేదు.

ప్రపంచ దేశాలు ప్రత్యామ్నాయ ఇంధన వనరులైన విద్యుత్ (ఈవీ) , గ్రీన్ హైడ్రోజన్ వైపు వేగంగా అడుగులు వేయాల్సిన అవసరాన్ని ఈ చమురు సంక్షోభం మరోసారి గుర్తు చేస్తోంది.