2025లో ఉద్యోగాలు: ప్రతిభకు కేంద్రంగా మారుతున్న టాప్ 10 నాన్-మెట్రో భారతీయ నగరాలు

దేశం శరవేగంగా అభివృద్ధి చెందుతున్న తరుణంలో, ఉద్యోగావకాశాలు ఇక కేవలం మెట్రో నగరాలకే పరిమితం కావడం లేదు. ఇప్పుడు టైర్ 2, టైర్ 3 నగరాలు కూడా ఉద్యోగ అన్వేషకులకు కొత్త గమ్యస్థానాలుగా మారుతున్నాయి. ఇటీవలి లింక్డ్ ఇన్ “Cities on the Rise 2025” నివేదిక ఈ మార్పును స్పష్టం చేస్తోంది. మౌలిక సదుపాయాల అభివృద్ధి, మెరుగైన కనెక్టివిటీ, కంపెనీల విస్తరణ వంటి అంశాలు ఈ నాన్-మెట్రో నగరాలను ప్రతిభకు, ఉద్యోగాలకు కేంద్రాలుగా మారుస్తున్నాయి.

2025లో ఉద్యోగావకాశాలు- ప్రతిభకు కేంద్రంగా మారుతున్న టాప్ 10 నాన్-మెట్రో నగరాల జాబితా:

విశాఖపట్నం: ఆంధ్రప్రదేశ్‌లోని ఈ తీర నగరం ఐటీ, ఫార్మా, డేటా సెంటర్లకు కేంద్రంగా వేగంగా అభివృద్ధి చెందుతోంది. ప్రభుత్వ మౌలిక సదుపాయాల అభివృద్ధి పట్ల ప్రత్యేక శ్రద్ధ కారణంగా విశాఖ పరిశ్రమల హబ్‌గా రూపుదిద్దుకుంటోంది.

రాజ్‌కోట్: గుజరాత్‌లోని రాజ్‌కోట్ ఇప్పుడు చిన్న - మధ్యతరహా పరిశ్రమలకు (MSMEs) కేంద్రంగా మారుతోంది. గ్రీన్ అర్బన్ ప్లానింగ్‌ను లక్ష్యంగా చేసుకుని ఈ నగరం అభివృద్ధి చెందుతోంది.

విజయవాడ: సాంప్రదాయకంగా సాంస్కృతిక కేంద్రంగా గుర్తింపు పొందిన విజయవాడ ఇప్పుడు మెట్రో, ఎయిర్‌పోర్ట్ విస్తరణలతో పాటు, ఐటీ కంపెనీల పెట్టుబడులతో కొత్త ఉద్యోగ కేంద్రంగా ఎదుగుతోంది.

నాసిక్: "వైన్ క్యాపిటల్ ఆఫ్ ఇండియా"గా పేరున్న నాసిక్, ఐటీ, డేటా సంస్థలతో పాటు ఆటోమొబైల్ , డిఫెన్స్ మాన్యుఫ్యాక్చరింగ్ రంగాలలో వేగంగా అభివృద్ధి చెందుతోంది.

రాయ్‌పూర్: "నయా రాయ్‌పూర్" అభియాన్ క్రింద విస్తృత మౌలిక సదుపాయాల అభివృద్ధి జరుగుతోంది. సెమీకండక్టర్లు, AI, ఫార్మా రంగాల్లో పెట్టుబడులతో రాయ్‌పూర్ నూతన టెక్నాలజీ హబ్‌గా మారుతోంది.

రాంచీ: జార్ఖండ్ రాజధాని రాంచీ ఇప్పుడు హోటళ్లు, రిటైల్, స్మార్ట్ సిటీ ప్రాజెక్టులు, రవాణా విస్తరణలతో ఉద్యోగాలకు కేంద్రంగా రూపుదిద్దుకుంటోంది.

ఆగ్రా: తాజ్‌మహల్ నగరం ఆగ్రా ఇప్పుడు "న్యూ ఆగ్రా ప్రాజెక్టు" ద్వారా భారీ మాన్యుఫ్యాక్చరింగ్ క్లస్టర్లను కలిగి ఉంది. ఇది వేలాది ఉద్యోగాలను సృష్టించనుంది.

మదురై: "టెంపుల్ సిటీ"గా పేరున్న మదురై ఇప్పుడు టెక్నాలజీ, వ్యవసాయ పరిశ్రమల పెట్టుబడులతో ఆధునిక మౌలిక సదుపాయాల ద్వారా ఉద్యోగ కేంద్రంగా అభివృద్ధి చెందుతోంది.

వడోదర: గుజరాత్‌లోని వడోదర నగర మౌలిక సదుపాయాలు, ఆరోగ్య రంగం, గృహ నిర్మాణం, రవాణా రంగాల అభివృద్ధి ద్వారా ఇది వేగంగా ఎదుగుతోంది.

జోధ్‌పూర్: "బ్లూ సిటీ"గా పేరున్న జోధ్‌పూర్ ఇప్పుడు స్టార్టప్‌లు, కొత్త కార్పొరేట్ కార్యాలయాలు, యువతకు అనుకూల జీవనశైలి కారణంగా కొత్త ఉద్యోగ కేంద్రంగా ఎదుగుతోంది.

ఈ అభివృద్ధి చెందుతున్న నగరాలు ఉద్యోగార్థులకే కాదు, పెట్టుబడిదారులకు కూడా అత్యుత్తమ అవకాశాలను అందిస్తున్నాయి. మీ ఊరు ఈ జాబితాలో ఉందా? లేకపోతే, త్వరలో ఉండే అవకాశం ఉందా? 2025కి ముందే మారుతున్న ఈ నగర దృశ్యం భారతదేశ ఉద్యోగ భవిష్యత్తును మరింత విశ్వస్థాయిలో నిలబెడుతుంది.