యువతికి పార్సిల్ లో పుర్రె, ఎముకలు, భష్మం.. పంపించింది ఎవరంటే?

మనింటికి ఒక పార్శిల్ వచ్చిందంటే అందులో ఏముంటుంది అన్న కుతూహలం ఉండడం ఎవరికైనా సహజమే. అందుకే వేగంగా అందుకుంటాం విప్పేస్తాం కూడా.. సరే అనుమానితుల నుంచి వస్తే కాస్త ఆలోచిస్తాం.. ఇలా ఒక యువతికి ఒక పార్శల్ వచ్చింది. చాలా సేపు ఆలోచించి ఆమె ఆ పార్శిల్ ఓపెన్ చేసింది. అందులో ఎముకలు, పుర్రె ఉన్నాయి. చెన్నైలోని ప్యారిస్ ప్రాంతంలో వచ్చిన పార్శిల్ చూసి వారంతా నిర్ఘాంతపోయారు. పుర్రె, ఎముకలు పంపించడం నేరం మాత్రమే కాదు.. అవతలి వ్యక్తిని మానసిక క్షోభకు గురిచేయాలనే వికృత మనస్తత్వానికి పరాకాష్ట. సమాజంలో వ్యక్తిగత కక్షలు ఎంతటి దారుణమైన రూపాలను సంతరించుకుంటున్నాయో చెప్పడానికి ఈ ఘటనే ఒక ఉదాహరణ..

షాపులో భయానక దృశ్యం

పోలీసులు వెల్లడించిన వివరాల ప్రకారం.. వ్యాసర్పాడికి చెందిన శ్రుతి అనే మహిళ ప్యారిస్‌లోని ఒక దుకాణంలో పనిచేస్తోంది. ఒక గుర్తు తెలియని వ్యక్తి ఆమె పేరు మీద ఒక పార్శిల్ ఇచ్చి వెళ్లాడు.. అది తనది కాదని ఆమె నిరాకరించింది. అయితే, అనుమానం వచ్చిన దుకాణ యజమాని అందరి సమక్షంలో దానిని తెరిచాడు. అప్పేడే అసలు విషయం బయటపడింది. అందులో మనిషి పుర్రె, ఎముకలతో పాటు విభూది ఉన్నాయి. చూసి అక్కడ ఉన్నవారంతా దిగ్భ్రాంతికి లోనయ్యారు. ఇది కేవలం భయపెట్టడమే కాకుండా, ఏదో క్షుద్ర పూజల సంకేతాలను చూపిస్తూ బాధితురాలిని మానసిక అశాంతికి గురిచేయాలనే కుట్రలా కనిపిస్తోంది అన్నారు.

వ్యక్తిగత కక్షలే కారణమా?

ఈ ఘటన వెనుక ఉన్న మూలాలను వెతికిన పోలీసులకు దిగ్భ్రాంతికరమైన విషయాలు తెలిశాయి. శ్రుతి కుటుంబానికి, అదే దుకాణంలో పనిచేసే దినేశ్ కుటుంబానికి మధ్య పాత గొడవలు ఉన్నట్లు పోలీసులు గుర్తించారు. ఈ కక్షల నేపథ్యంలోనే ఆమెను తీవ్రంగా భయపెట్టాలని, ఆమె పనిచేసే చోట ఆమె ప్రతిష్ఠను దెబ్బతీయాలని దినేశ్ ఈ దారుణమైన ప్లాన్ వేసినట్లు ప్రాథమిక దర్యాప్తులో తేలింది. పాత గొడవలను మనసులో పెట్టుకొని, ఒక మహిళను ఇలాంటి భీతావహమైన పద్ధతుల్లో వేధించడం సభ్య సమాజం తలదించుకోవాల్సిన విషయం.

త్వరితగతిన అరెస్టు

ఈ భయానక ఘటనపై తక్షణమే స్పందించిన పోలీసులు నిందితుడైన దినేశ్‌తో పాటు అతనికి సహకరించిన శ్రీనివాసన్, జోసెఫ్‌ను అరెస్టు చేశారు. మనిషి పుర్రె, ఎముకలు వారికి ఎక్కడి నుంచి లభించాయి? అవి ఎవరివి? అనే కోణంలో లోతైన విచారణ జరుపుతున్నారు. శ్మశానాల నుంచి వీటిని సేకరించారా లేదా మరేదైనా ఘోరమైన నేరానికి పాల్పడ్డారా అన్నది తేలాల్సి ఉంది. కారణం ఏదైనా, ఇటువంటి చర్యలు సమాజంలో అశాంతిని కలుగజేస్తాయి.

నేటి కాలంలో వేధింపులు కేవలం మాటలకో, చేతలకో పరిమితం కాకుండా ఇలాంటి భయంకరమైన రూపాలను తీసుకోవడం ఆందోళనకరం. సాంకేతికత పెరిగిన తరుణంలో ఇలాంటి పార్శిళ్లు పంపి భయపెట్టడం సులభమైపోయింది. అయితే, బాధితురాలు శ్రుతి ధైర్యంగా ఆ పార్శిల్‌ను తీసుకోకుండా ఉండడం, యజమాని దానిని ఓపెన్ చేయడం ఈ కుట్ర వెలుగుచూసింది. ఇటువంటి మానసిక దాడులు బాధితుల జీవితాలను ఛిన్నాభిన్నం చేస్తాయి.

కఠిన శిక్షలే మార్గం

వ్యక్తిగత కక్షల కోసం మనిషి పుర్రెలను వాడుకునే స్థాయికి దిగజారిన నిందితులకు చట్ట పరంగా కఠినంగా శిక్షలు విధించాలి. ఇది కేవలం ఒక మహిళకు సంబంధించిన సమస్య కాదు; కార్యాలయాల్లో పనిచేసే మహిళల భద్రతకు సంబంధించిన అంశం. ఇలాంటి వికృత చేష్టలకు పాల్పడే వారికి సమాజంలో తావులేదని నిరూపించాలి. పోలీసులు ఈ కేసును మూలాల వరకు ఛేదించి, ఈ ఎముకల వెనుక ఉన్న మిస్టరీని కూడా విప్పాల్సిన అవసరం ఉంది. అప్పుడే ప్రజల్లో నెలకొన్న భయాందోళనలు తొలగిపోతాయి.