బ్రిక్స్ సదస్సులో ఆసక్తికర పరిణామం: అజిత్ దోవల్ ముందు 'భారత్' నేమ్ ప్లేట్.. నెట్టింట వైరల్

న్యూఢిల్లీ వేదికగా జరిగిన బ్రిక్స్ దేశాల జాతీయ భద్రతా సలహాదారుల (ఎన్.ఎస్.ఏ) ఉన్నత స్థాయి సమావేశంలో ఒక ఆసక్తికర పరిణామం చోటుచేసుకుంది. భారత జాతీయ భద్రతా సలహాదారు (ఎన్.ఎస్.ఏ) అజిత్ దోవల్ ముందరి టేబుల్‌పై ఉంచిన "భారత్" నేమ్ ప్లేట్ ఇప్పుడు దేశవ్యాప్తంగా తీవ్ర చర్చకు దారితీసింది. అంతర్జాతీయ వేదికలపై సాధారణంగా "ఇండియా" అనే పేరును ఉపయోగించడం దశాబ్దాలుగా వస్తున్న ఆనవాయితీ కాగా.. దానికి భిన్నంగా ఈ సమావేశంలో "భారత్" అని ప్రదర్శించడం అందరి దృష్టిని ఆకర్షించింది.

ఈ సమావేశానికి సంబంధించిన విజువల్స్ , ఫొటోలు సోషల్ మీడియాలో ప్రత్యక్షమవడంతో, నెటిజన్లు దీనిపై భిన్న రకాలుగా స్పందిస్తున్నారు. ఈ పరిణామం ఇప్పుడు "ఇండియా వర్సెస్ భారత్" అనే పాత చర్చను మళ్లీ తెరపైకి తెచ్చింది.

జాతీయ గర్వమా? రాజకీయ వ్యూహమా?

"భారత్" అనే పేరును అంతర్జాతీయ వేదికలపై ఉపయోగించడం దేశ సంస్కృతి, పురాతన నాగరికత, వారసత్వానికి దక్కిన గౌరవమని అత్యధికులు ప్రశంసిస్తున్నారు. భారత రాజ్యాంగంలోని ఆర్టికల్-1 లో సైతం "ఇండియా, దట్ ఈజ్ భారత్" అని స్పష్టంగా పేర్కొనబడిందని వారు గుర్తు చేస్తున్నారు. వలసరాజ్యాల బ్రిటిష్ కాలం నాటి గుర్తులను పక్కన పెట్టి, దేశ అసలైన స్వదేశీ గుర్తింపును ప్రపంచానికి చాటిచెప్పే ప్రయత్నంగా దీనిని కొనియాడుతున్నారు. మరోవైపు కేంద్ర ప్రభుత్వం క్రమంగా అధికారిక కార్యక్రమాలు, అంతర్జాతీయ ద్వైపాక్షిక చర్చల్లో "ఇండియా" స్థానంలో "భారత్" అనే పేరుకు ప్రాధాన్యత ఇస్తోందని విమర్శకులు.. ప్రతిపక్ష వర్గాలు అభిప్రాయపడుతున్నాయి. రాబోయే రోజుల్లో దేశానికి సంబంధించిన అన్ని అధికారిక డాక్యుమెంట్లు, అంతర్జాతీయ వేదికలపై పూర్తిస్థాయిలో "భారత్" పేరునే స్థిరీకరించే వ్యూహాత్మక అడుగుల్లో భాగమే ఇది కావచ్చని రాజకీయ విశ్లేషకులు భావిస్తున్నారు.

గతంలోనూ ఇలాంటి పరిణామాలు

అంతర్జాతీయ వేదికలపై 'భారత్' పేరును ఉపయోగించడం ఇదే మొదటిసారి కాదు. గతంలో జరిగిన ప్రఖ్యాత జీ20 శిఖరాగ్ర సదస్సు సమయంలోనూ ప్రధానమంత్రి నరేంద్ర మోదీ ముందు "భారత్" నేమ్ ప్లేట్‌ను ఉంచడం, అలాగే రాష్ట్రపతి భవన్ నుండి పంపిన అధికారిక ఆహ్వాన పత్రికల్లో "ప్రెసిడెంట్ ఆఫ్ భారత్" అని ముద్రించడం అప్పట్లో పెను సంచలనంగా మారాయి. ఆ సిరీస్‌లోనే ఇప్పుడు బ్రిక్స్ సదస్సులో అజిత్ దోవల్ ముందు కూడా ఇదే పేరు దర్శనమివ్వడం గమనార్హం.

దేశ అధికారిక నామ వినియోగంలో శాశ్వత మార్పులు ఏమైనా చేస్తున్నారా? అనే అంశంపై కేంద్ర ప్రభుత్వం ఇప్పటివరకు ఎటువంటి అధికారిక ప్రకటన లేదా స్పష్టత ఇవ్వలేదు. ఇది కేవలం ఆయా కార్యక్రమాల నిర్వహణలో తీసుకుంటున్న అంతర్గత నిర్ణయమా లేదా భవిష్యత్ మార్పుకు సంకేతమా అనేది వేచి చూడాలి.

ఏదేమైనా అంతర్జాతీయ దౌత్య పరిధిలో రక్షణ రంగానికి సంబంధించిన అత్యున్నత స్థాయి బ్రిక్స్ సమావేశంలో భారత్ పేరు ప్రముఖంగా వెలుగులోకి రావడం, అటు దేశీయంగానూ ఇటు సామాజిక మాధ్యమాల్లోనూ సరికొత్త చర్చలకు కేంద్రబిందువుగా మారింది.