పాకిస్తాన్ తో దోస్తీ.. అమెరికాకు టెన్షన్ పట్టుకుందా?

అమెరికా విదేశాంగ విధానంలో పాకిస్తాన్ ఎప్పుడూ ఒక చిక్కుముడిగానే ఉంటూ వస్తోంది. అయితే ప్రస్తుతం అమెరికా అధ్యక్షుడు డొనాల్డ్ ట్రంప్, పాక్ ఆర్మీ చీఫ్ జనరల్ ఆసిమ్ మునీర్ మధ్య చిగురిస్తున్న సంబంధాలు దౌత్య పరిమితులను దాటి భద్రతా కోణంలో సరికొత్త చర్చకు దారితీస్తున్నాయి. మునీర్‌ను ట్రంప్ “ప్రియమైన ఫీల్డ్ మార్షల్” అని సంబోధించడం ఒక ఎత్తు అయితే అదే మునీర్ పట్ల అమెరికా గూఢచారి సంస్థలు తీవ్రమైన అనుమానాలు వ్యక్తం చేయడం మరో ఎత్తు. ఈ వైరుధ్యం అమెరికా అంతర్గత విభేదాలను బాహ్య ప్రపంచానికి స్పష్టం చేస్తోంది.

ఇరాన్ కనెక్షన్.. మునీర్ ఒక ‘రెడ్ అలర్ట్’?

ఈ వివాదానికి ప్రధాన కేంద్ర బిందువు ఇరాన్‌తో మునీర్‌కు ఉన్నట్లుగా చెబుతున్న రహస్య సంబంధాలు. పాకిస్తాన్ మాజీ జనరల్ అహ్మద్ సయీద్ వెల్లడించిన సమాచారం ప్రకారం, ఆసిమ్ మునీర్‌కు ఇరాన్ యొక్క పవర్‌ఫుల్ ఇస్లామిక్ రెవల్యూషనరీ గార్డ్స్ కార్ప్స్ (ఐఆర్.జీసీ) లోని అగ్రనేతలతో దశాబ్దాల కాలంగా పరిచయాలు ఉన్నాయి. ముఖ్యంగా అమెరికా దాడుల్లో మరణించిన ఖాసీం సులేమానీ, ప్రస్తుత చీఫ్ హుస్సేన్ సలామీ వంటి వారితో మునీర్‌కు సన్నిహిత సంబంధాలు ఉన్నట్లు నివేదికలు చెబుతున్నాయి. ఇరాన్-అమెరికా మధ్య ఉద్రిక్తతలు గరిష్ట స్థాయిలో ఉన్న తరుణంలో మునీర్ మధ్యవర్తిత్వం వహించాలని ప్రయత్నించడం అమెరికా నిఘా వర్గాలకు మింగుడు పడటం లేదు. శత్రువులతో చెలిమి చేసే వ్యక్తికి వ్యూహాత్మక సమాచారం అందడం వల్ల 'సెక్యూరిటీ బ్రీచ్' జరిగే అవకాశం ఉందని నిపుణులు హెచ్చరిస్తున్నారు.

చరిత్ర పునరావృతమవుతోందా?

గతంలో ఆఫ్ఘనిస్తాన్ యుద్ధ సమయంలో కూడా అమెరికా పాకిస్తాన్‌ను గుడ్డిగా నమ్మి భారీ మూల్యం చెల్లించుకుంది. ఒకవైపు అమెరికా నుండి భారీగా నిధులు పొందుతూనే మరోవైపు తాలిబాన్ నెట్‌వర్క్‌లకు పాక్ ఆశ్రయం కల్పించిందన్న ఆరోపణలు జగమెరిగిన సత్యం. ప్రజాస్వామ్య రక్షణ సంస్థ కు చెందిన విశ్లేషకుడు బిల్ రోగియో అభిప్రాయం ప్రకారం "పాకిస్తాన్ ఎప్పుడూ తన సొంత ప్రయోజనాలకే ప్రాధాన్యత ఇస్తుంది తప్ప అమెరికా ప్రయోజనాలకు కాదు" అని స్పష్టం చేశారు. ఈ నేపథ్యంలో మునీర్ పై అతిగా ఆధారపడటం ప్రమాదకరమని ఆయన హెచ్చరిస్తున్నారు.

శాంతి దూతనా లేక వ్యూహాత్మక ముప్పా?

ప్రస్తుత పరిస్థితుల్లో మునీర్ పాత్ర రెండు అంచుల కత్తిలా మారింది. ఒకవేళ మునీర్ తన పాత పరిచయాలను ఉపయోగించి ఇరాన్, అమెరికా మధ్య శాంతిని నెలకొల్పగలిగితే అది మధ్యప్రాచ్యంలో ఒక పెద్ద విజయం కావచ్చు. అదే సమయంలో అమెరికా యొక్క కీలక వ్యూహాలను ఇరాన్ లేదా ఇతర శత్రు దేశాలకు లీక్ చేసే అవకాశం ఉందనే భయం నిఘా వర్గాలను వేధిస్తోంది.

ట్రంప్ ముందున్న సవాలు

వ్యక్తిగత సంబంధాలకు ప్రాధాన్యత ఇచ్చే ట్రంప్, మునీర్‌తో కలిసి ముందుకు సాగుతారా? లేక తన దేశ నిఘా సంస్థల హెచ్చరికలను గౌరవిస్తారా? అనేది ఇప్పుడు మిలియన్ డాలర్ల ప్రశ్న. దక్షిణాసియా, మధ్యప్రాచ్య భౌగోళిక రాజకీయాల్లో పాకిస్తాన్ పోషించే పాత్ర ఎప్పుడూ ఊహాతీతమే.

మొత్తానికి ఆసిమ్ మునీర్ అమెరికాకు ఒక నమ్మకమైన 'వారధి'గా నిలుస్తారా లేక గతంలో లాగే పాకిస్తాన్ మరోసారి అమెరికాను వ్యూహాత్మక పద్మవ్యూహంలో చిక్కుకునేలా చేస్తుందా అనేది వేచి చూడాలి. అమెరికా–పాకిస్తాన్ బంధం మళ్లీ ఒక క్లిష్టమైన పరీక్షా కాలంలోకి ప్రవేశించింది అనడంలో ఎటువంటి సందేహం లేదు.