సివిల్స్ ఫలితాలు విడుదల.. ఎంత మంది ఎంపికయ్యారంటే?

దేశవ్యాప్తంగా లక్షలాది మంది అభ్యర్థులు ఎంతో ఆత్రుతగా ఎదురుచూస్తున్న యూపీఎస్సీ (UPSC) సివిల్ సర్వీసెస్ ఫలితాలు ఎట్టకేలకు విడుదలయ్యాయి. ఈ ఏడాది ఫలితాల్లో అనూజ్ అగ్నిహోత్రి ఆల్ ఇండియా ఫస్ట్ ర్యాంకు సాధించి సత్తా చాటారు. కఠినమైన శ్రమ, పట్టుదలతో దేశంలోనే అత్యున్నత సర్వీసులకు ఎంపికైన విజేతల పేర్లను యూపీఎస్సీ ప్రకటించింది. ఈ ఫలితాలతో అభ్యర్థుల ఇళ్లలో పండుగ వాతావరణం నెలకొంది. విజేతలకు సోషల్ మీడియా వేదికగా అభినందనలు వెల్లువెత్తుతున్నాయి. ఆ వివరాలు చూద్దాం..

టాపర్ల జాబితా.. అనూజ్ అగ్నిహోత్రి ఫస్ట్:

యూపీఎస్సీ విడుదల చేసిన ఫలితాల్లో అనూజ్ అగ్నిహోత్రి ప్రథమ స్థానంలో నిలవగా, రాజేశ్వరి సువే రెండో ర్యాంకును కైవసం చేసుకున్నారు. ఆ తర్వాతి స్థానాల్లో ఆకాన్ష్, రాఘవ్, ఇషాన్ భట్నాగర్ వరుసగా టాప్ 5లో నిలిచారు. దేశవ్యాప్తంగా వివిధ కేటగిరీల్లో మొత్తం 1,087 పోస్టుల భర్తీకి ఈ పరీక్ష నిర్వహించారు. ఇక విజేతల జాబితాలో ఎప్పటిలాగే యువత తమ సత్తా చాటారు. వివిధ రంగాల నుండి వచ్చిన అభ్యర్థులు సివిల్స్‌లో ర్యాంకులు సాధించడం విశేషం.

సర్వీసుల వారీగా ఎంపికైన వారు ఇలా:

ఈసారి మొత్తం 1,087 పోస్టులకు అభ్యర్థులను ఎంపిక చేయగా, అందులో ఐఏఎస్ (IAS) పోస్టులకు 180 మంది ఎంపికయ్యారు. ఇక అలాగే ఐఎఫ్ఎస్ (IFS) కు 55 మంది, ఐపీఎస్ (IPS) కు 150 మందిని కేటాయించారు. గ్రూప్-A సెంట్రల్ సర్వీసెస్‌లో అత్యధికంగా 507 మంది, గ్రూప్-B సర్వీసెస్‌లో 195 మందికి చోటు దక్కింది. అంటే దాదాపు వెయ్యికి పైగా కొత్త అధికారులు ఇప్పుడు దేశ పరిపాలనలో పార్ట్ కాబోతున్నారు. ప్రతిభ గల అభ్యర్థులను ఎంపిక చేసే ప్రక్రియను యూపీఎస్సీ అత్యంత పారదర్శకంగా పూర్తి చేసింది.

అభ్యర్థుల కఠోర శ్రమకు తగ్గ ప్రతిఫలం:

సివిల్స్ సాధించడం అనేది ఒక యజ్ఞం లాంటిది. కొన్ని ఏళ్ల పాటు ఇష్టమైన వాటన్నింటికీ దూరంగా ఉండి, కేవలం చదువుపైనే దృష్టి పెట్టిన అభ్యర్థులకు ఈరోజు దక్కిన విజయం ఎంతో ప్రత్యేకం. ఇక ఈ విజేతల కథలు నేటి తరం విద్యార్థులకు గొప్ప స్ఫూర్తినిస్తాయి. మధ్యతరగతి కుటుంబాల నుండి వచ్చిన వారు కూడా టాప్ ప్లేస్ లో నిలవడంతో 'కృషి ఉంటే మనుషులు రుషులవుతారు' అనే మాట మరోసారి నిజమైంది. ఇప్పుడు ఎంపికైన ఈ యువ అధికారులు దేశ సేవలో తమవంతు పాత్ర పోషించేందుకు సిద్ధమవుతున్నారు.