అంగస్తంభన లోపం.. గుండె జబ్బులకు ముందస్తు హెచ్చరిక!

పురుషుల్లో అంగస్తంభన.. దాన్ని కొనసాగించడంలో ఇబ్బంది ఎదురవుతుంటే చాలామంది దానిని కేవలం లైంగిక జీవితానికి సంబంధించిన సమస్యగానే భావిస్తారు. దాని గురించి బయటకు చెప్పడానికి లేదా డాక్టర్‌ను సంప్రదించడానికి సిగ్గుపడుతుంటారు. అయితే వైద్య నిపుణుల ప్రకారం తరచుగా కనిపించే ఈ అంగస్తంభన లోపం శరీరంలో ముఖ్యంగా గుండె, రక్తనాళాల ఆరోగ్యంలో జరుగుతున్న లోతైన మార్పులకు ఒక స్పష్టమైన హెచ్చరిక కావచ్చు. భవిష్యత్తులో రాబోయే తీవ్రమైన హృదయ సంబంధిత జబ్బులకు ఇది ముందస్తు సంకేతంగా పనిచేస్తుందని పలు అధ్యయనాలు చెబుతున్నాయి.

అంగస్తంభన అనేది ప్రధానంగా శరీరంలోని రక్తప్రసరణ వ్యవస్థపై ఆధారపడే ఒక సంక్లిష్టమైన ప్రక్రియ. లైంగిక ప్రేరణ కలిగిన సమయంలో పురుషాంగంలోని రక్తనాళాలు విస్తరించి, ఎక్కువ మొత్తంలో రక్తం అక్కడికి చేరుతుంది. అయితే ఈ రక్తప్రవాహం సక్రమంగా జరగనప్పుడు అంగస్తంభన సాధించడం కష్టమవుతుంది. ఇక్కడే గుండె ఆరోగ్యానికి, ఈ సమస్యకు మధ్య ఉన్న బలమైన ముడి బయటపడుతుంది. ధమనుల్లో కొవ్వు, కొలెస్ట్రాల్ వంటి పదార్థాలు పేరుకుపోవడం వల్ల రక్తనాళాలు గట్టిపడటం లేదా ఇరుకుగా మారడాన్ని అథెరోస్క్లెరోసిస్ అంటారు. ఈ పరిస్థితి శరీరమంతటా రక్తప్రవాహాన్ని తగ్గిస్తుంది. గుండెకు రక్తాన్ని చేరవేసే ధమనుల కంటే పురుషాంగానికి రక్తాన్ని సరఫరా చేసే నాళాలు చాలా చిన్నవిగా ఉంటాయి. అందువల్ల రక్తనాళాల్లో కొవ్వు పేరుకుపోవడం మొదలైనప్పుడు ఆ ప్రభావం గుండెపోటు లేదా పక్షవాతం రూపంలో బయటపడటానికి కొన్నేళ్ల ముందే అంగస్తంభన లోపం రూపంలో బయటపడుతుంది.

అయితే అంగస్తంభన లోపానికి కేవలం రక్తనాళాల సమస్యలు మాత్రమే కారణం కావు. మధుమేహం వల్ల రక్తంలో చక్కెర స్థాయిలు పెరిగి నాడీ వ్యవస్థ, రక్తనాళాలు దెబ్బతినడం, శరీరంలో టెస్టోస్టెరాన్ వంటి హార్మోన్ల మార్పులు, కొన్ని రకాల మందుల దుష్ప్రభావాలు కూడా దీనికి దారితీస్తాయి. వీటితో పాటు నేటి ఆధునిక జీవనశైలిలో పెరిగిపోయిన తీవ్రమైన మానసిక ఒత్తిడి, ఆందోళన, డిప్రెషన్, నిద్రలేమి, అధిక బరువు, ధూమపానం, అధిక మద్యపానం వంటి కారణాలు కూడా ఈ సమస్యను మరింత తీవ్రతరం చేస్తాయి.

ఈ సమస్య నుంచి బయటపడటానికి.. గుండె ఆరోగ్యాన్ని కాపాడుకోవడానికి జీవనశైలిలో తగిన మార్పులు చేసుకోవడం చాలా అవసరం. సమతులాహారం తీసుకోవడం, రోజూ క్రమం తప్పకుండా వ్యాయామం చేయడం, శరీర బరువును అదుపులో ఉంచుకోవడం, పొగతాగే అలవాటును పూర్తిగా మానేయడం వంటి చర్యలు రక్తనాళాల ఆరోగ్యాన్ని మెరుగుపరుస్తాయి. ఇవి అంగస్తంభన లోపాన్ని తగ్గించడమే కాకుండా గుండె జబ్బులు, బీపీ, మధుమేహం వంటి వ్యాధుల ప్రమాదాన్ని కూడా నివారిస్తాయి. ముఖ్యంగా గమనించాల్సింది ఏమిటంటే సమస్య ఎదురైనప్పుడు సొంతంగా మందులు వాడకుండా, ఎటువంటి మొహమాటం లేకుండా వెంటనే నిపుణులైన వైద్యుడిని సంప్రదించి సరైన పరీక్షలు చేయించుకోవాలి. సమస్యకు అసలు కారణాన్ని ముందుగానే గుర్తించడం ద్వారా ప్రాణాపాయం కలిగించే గుండె జబ్బుల నుండి మిమ్మల్ని మీరు రక్షించుకోవచ్చు.