ప్రమోషన్స్లో అతి.. నిజంగా అదే వర్కౌట్ అవుతుందా?
ఈవెంట్స్లో ఎవరు ఏం మాట్లాడారు, ఏ కామెంట్ వైరల్ అయింది, ఎవరి మాట మీద మీమ్స్ వచ్చాయి అన్నది కూడా ప్రమోషన్లో భాగమైపోయింది.
సినిమా ప్రమోషన్స్ అంటే ఇప్పుడు ట్రైలర్, పాటలు రిలీజ్ చేయడం మాత్రమే కాదు. ఈవెంట్స్లో ఎవరు ఏం మాట్లాడారు, ఏ కామెంట్ వైరల్ అయింది, ఎవరి మాట మీద మీమ్స్ వచ్చాయి అన్నది కూడా ప్రమోషన్లో భాగమైపోయింది. అందుకే కొందరు ఉద్దేశపూర్వకంగానే కాస్త ఎక్కువగా మాట్లాడుతున్నారేమో అనిపించే సందర్భాలు కూడా కనిపిస్తున్నాయి. సినిమా గురించి చెప్పాల్సిన దానికంటే ఒక స్టేట్మెంట్ ఎక్కువగా వెళ్లిపోతేనే సోషల్ మీడియాలో రీచ్ వస్తుందనే లెక్క కూడా ఉండొచ్చు.
అయితే ఇదే ఫార్ములా ప్రతిసారీ వర్కౌట్ అవుతుందా అన్నది డౌట్. మా సినిమా మామూలుగా ఉండదు, ఇది కల్ట్, ఇలాంటి సినిమా ఇప్పటివరకు రాలేదు.. అంటూ ముందే హైప్ పెంచితే ఒక సెక్షన్కు అది ఎంటర్టైనింగ్గా అనిపించొచ్చు. అదే మాటలు మళ్లీ మళ్లీ వినిపిస్తే ఇంకొంతమందికి మాత్రం.. సినిమా గురించి ఇంత చెప్పాల్సిన అవసరం ఏముంది? అనే ఫీలింగ్ రావచ్చు.
ఇక్కడ ఇంట్రెస్టింగ్ విషయం ఏంటంటే అలా మాట్లాడుతున్న వాళ్లకూ అది ఓవర్గా ఉందని తెలిసే ఉంటుంది. చూసేవాళ్లకూ తెలుస్తుంది. అయినా అదే క్లిప్ ఎక్కువగా షేర్ అవుతుంది. సాధారణంగా మాట్లాడిన ఐదు నిమిషాల వీడియో కంటే ఒక్క ఓవర్ కామెంట్కు ఎక్కువ రీచ్ రావచ్చు. ఆ కోణంలో చూస్తే ప్రమోషన్ వర్కౌట్ అయ్యింది అనుకోవచ్చు. కానీ వైరల్ అయిన వ్యక్తి గుర్తుండిపోయి సినిమా వెనక్కి వెళ్లిపోతే మాత్రం అసలు పాయింట్ మిస్ అయినట్టే.
ఇటీవల కొన్ని సినిమా ఈవెంట్స్లో కూడా ఇదే కనిపిస్తోంది. సినిమా గురించి మంచి విషయాలు చెప్పినా వాటి కంటే ఒక సరదా కామెంట్, ఒక ఓవర్ రియాక్షన్ లేదా కాస్త హద్దు దాటిన మాటే బయట ఎక్కువ తిరుగుతోంది. ఆ తర్వాత చర్చ మొత్తం సినిమా నుంచి ఆ వ్యక్తి మాటల మీదకు మారిపోతోంది. కొన్ని గంటల పాటు బజ్ రావచ్చు కానీ అది సినిమా మీద వచ్చిన బజ్ ఆ, లేక ఆ కామెంట్ మీద వచ్చిన బజ్ ఆ అన్న తేడా ఉంటుంది.
పైగా ప్రేక్షకులు ఇప్పుడు ప్రమోషన్ భాషకు కూడా బాగా అలవాటుపడ్డారు. ఎవరు నిజంగా ఎగ్జైట్ అయ్యి మాట్లాడుతున్నారు, ఎవరు కావాలనే హైప్ పెంచుతున్నారు అన్నది చాలామందికి అర్థమవుతోంది. అందుకే అతి చేసిన ప్రతి కామెంట్కు అదే స్థాయిలో పాజిటివ్ రియాక్షన్ వస్తుందని ఫిక్స్ అవ్వలేం. కొన్ని సందర్భాల్లో అదే ఫన్గా మారుతుంది. ఇంకొన్ని సందర్భాల్లో ట్రోలింగ్కు మెటీరియల్ అవుతుంది. అందుకే ప్రమోషన్స్లో అతి పూర్తిగా తప్పు కూడా కాదు, హిట్ ఫార్ములా కూడా కాదు. అది ఫోకస్ లోకి తీసుకురాగలదు. కానీ ఆ ఫోకస్ అనేది చివరకు సినిమా మీద పడాలి.