ఒకే డైరెక్టర్.. ఇద్దరు లెగసీ స్టార్స్.. వశిష్ఠ అరుదైన ఫీట్!

టాలీవుడ్‌లో యంగ్ డైరెక్టర్లలో వేగంగా ఎదుగుతున్న పేరుగా నిలుస్తున్న వ‌శిష్ట‌, ఇప్పుడు మరో కీలక మైలురాయిని అందుకునే దిశగా అడుగులు వేస్తున్నట్టు తాజా సమాచారం సూచిస్తోంది. మెగాస్టార్ చిరంజీవితో తెరకెక్కిస్తున్న విశ్వంభ‌ర రిలీజ్ కు రెడీ అవుతున్న స‌మ‌యంలో, అదే స్పీడులో ఆయ‌న నందమూరి నటసింహం బాల‌కృష్ణతో కొత్త ప్రాజెక్ట్‌కు గ్రీన్ సిగ్నల్ దక్కించుకోవడం వశిష్ఠ కెరీర్‌లో నెక్ట్స్ స్టెప్ గా భావిస్తున్నారు. సాధారణంగా ఒక పెద్ద స్టార్‌తో సినిమా చేసే అవకాశం కూడా చాలా మందికి పెద్ద విషయమే అయితే, వరుసగా ఇద్ద‌రు లెగసీ హీరోలతో పని చేసే అవకాశం రావడం టాలీవుడ్‌లో అరుదైన ఘట్టంగా మారింది.

వశిష్ఠ దర్శకత్వంలో రూపొందుతున్న విశ్వంభర‌ ఇంకా విడుదల కాకముందే, ఆయనపై ఇండస్ట్రీలో నమ్మకం పెరిగినట్లు ఈ పరిణామం స్పష్టం చేస్తోంది. ఒక సినిమా ఫలితం బయటకు రాకముందే తదుపరి పెద్ద ప్రాజెక్ట్‌కు ఓకే చెప్పడ‌మంటే, డైరెక్ట‌ర్ విజన్, కథ చెప్పే సామర్థ్యం మీద ఉన్న విశ్వాసమే ప్రధాన కారణంగా ట్రేడ్ వర్గాలు విశ్లేషిస్తున్నాయి.

ఇక ఈ కాంబినేషన్ మరో కోణంలో కూడా ఆసక్తిని రేకెత్తిస్తోంది. చిరంజీవి నుంచి బాలకృష్ణ వరకు టాలీవుడ్‌లో దశాబ్దాలుగా అగ్రస్థానంలో ఉన్న ఇద్దరు లెగసీ హీరోలతో పని చేసే అవకాశం దక్కడం వశిష్ఠ స్టార్ ట్రావెల్‌ను స్పష్టంగా చూపిస్తోంది. సాధారణంగా ఈ స్థాయి స్టార్‌లతో పని చేయడానికి ఎంతోమంది డైరెక్ట‌ర్ల‌కు చాలా కాలం పడుతుంటే, వశిష్ఠ మాత్రం తక్కువ కాలంలోనే ఈ అవకాశాన్ని అందుకోవడం ఆయన కెరీర్ ప్లానింగ్‌ను ప్రతిబింబిస్తోంది. ఇది కేవలం అవకాశాల పరంపర కాదు, ఒక స్ట్రాటజీగా కూడా కనిపిస్తోంది. కమర్షియల్‌గా సేఫ్ జోన్‌లో ఉండే స్టార్ హీరోలతో ప్రాజెక్ట్స్ ప్లాన్ చేస్తూ, తన మార్కెట్‌ను వేగంగా విస్తరించుకోవాలనే లక్ష్యం వశిష్ఠలో కనిపిస్తోంది. భారీ బడ్జెట్, విభిన్నమైన కథాంశాలు, విజువల్ గ్రాండియర్ మిళిత‌మయ్యే ప్రాజెక్ట్స్‌ను ఎంచుకోవడం ద్వారా ఆయన తన బ్రాండ్‌ను నిర్మించుకుంటున్నార‌ని ఇండస్ట్రీ వర్గాలు అభిప్రాయపడుతున్నాయి.

ఇక బాలకృష్ణ- వశిష్ఠ కాంబినేషన్ విషయంలో ఫ్యాన్స్‌లో ఇప్పటికే చర్చ మొదలైంది. వశిష్ఠ ఇప్పటివరకు ఫాంటసీ, మైథాలజీ టచ్ ఉన్న కథలతో గుర్తింపు పొందిన దర్శకుడు కాగా, బాలకృష్ణ మాస్ ఇమేజ్‌కు ప్రసిద్ధి. ఈ నేపథ్యంలో ఈ సినిమా మాస్ ఎలిమెంట్స్‌తో నిండిన కథగా వస్తుందా, లేక ఫాంటసీ బ్యాక్‌డ్రాప్‌తో కొత్త ప్రయోగం చేస్తారా అన్న ఆసక్తి నెలకొంది. ఈ రెండు స్టైల్స్ మిళితమైతే టాలీవుడ్‌లో కొత్త రకం కమర్షియల్ ఎంటర్టైనర్‌కు దారితీసే అవకాశం ఉందని సినీ వర్గాలు భావిస్తున్నాయి. మొత్తంగా చూస్తే, విశ్వంభర రిలీజ్ కు ముందే వ‌శిష్ట మ‌రో స్టార్ హీరోను లైన్ లో పెట్ట‌డం ద్వారా త‌న కెరీర్ లో ఎంత కీల‌క ద‌శ‌లో ఉన్నారో అర్థ‌మ‌వుతుంది. ప్ర‌స్తుతం బాల‌య్య చేతిలో ఉన్న సినిమాల‌ను పూర్తి చేశాక‌, ఈ సినిమాను వ‌చ్చే ఏడాది సెట్స్ పైకి తీసుకెళ్లే ద‌శగా ప్లాన్ చేస్తున్న‌ట్టు తెలుస్తోంది.