నైజాంలో సమస్య తీరేదెప్పుడు? చేయాల్సిందేంటి?

తెలంగాణలో పెద్ద సినిమాలకు విడుదల సమయం దగ్గరపడితే చాలు.. టికెట్ ధరల పెంపు అంశం మరోసారి చర్చకు వస్తుంది. సినిమా ఏదైనా కావొచ్చు.. స్టార్ హీరో ఎవరైనా కావొచ్చు.. రిలీజ్ కు ముందు కొన్ని రోజులపాటు ఇదే చర్చ నడుస్తుంది. పర్మిషన్స్ వస్తాయా? రావా? ఎంత పెంపు ఉంటుంది? ఎప్పటి నుంచి అమల్లోకి వస్తుంది? అనే ప్రశ్నలకు చివరి నిమిషం వరకు సమాధానాలు కనిపించవు.

వాస్తవానికి ఇది ఒక్క సినిమా లేదా ఒక్క నిర్మాత సమస్య కాదు. టాలీవుడ్ లో దాదాపు ప్రతి పెద్ద సినిమా విడుదల సమయంలో ఎదురవుతున్న పరిస్థితి. నిర్మాతలు భారీ బడ్జెట్‌ తో సినిమాలు తీస్తున్నారు. మార్కెట్ నేషనల్ వైడ్ గా విస్తరించింది. తొలి వారంలో వచ్చే వసూళ్లే సినిమా బిజినెస్ పై ఎఫెక్ట్ చూపించే రేంజ్ కు చేరుకున్నాయి. దీంతో ఎక్స్ ట్రా షోలు, టికెట్ ధరల పెంపు వంటి అంశాలు నిర్మాతలకు కీలకంగా మారుతున్నాయి.

అయితే ప్రస్తుతం అమలులో ఉన్న విధానంలో క్లారిటీ కంటే కన్ఫ్యూజన్ ఎక్కువగా కనిపిస్తోందనే అభిప్రాయం వినిపిస్తోంది. ప్రతి సినిమా విడుదలకు అప్లై చేసుకోవడం, ప్రభుత్వ నిర్ణయాల కోసం ఎదురుచూడటం, చివరి నిమిషంలో ఉత్తర్వులు రావడం వల్ల థియేటర్ల నుంచి డిస్ట్రిబ్యూటర్ల వరకు అందరూ ఇబ్బందులు పడుతున్నారు. ఒకవేళ నిర్ణయాలు లేట్ అయితే ప్రేక్షకుల్లో కూడా గందరగోళం ఏర్పడుతోంది.

ఇక్కడ ప్రధానంగా వినిపిస్తున్న ప్రశ్న ఒక్కటే. ప్రతిసారి ఇదే ప్రాసెస్ ఎందుకు? ఒక క్లియర్ అండ్ కట్ విధానం ఎందుకు ఉండకూడదు? అనే దానిపైనే చర్చ సాగుతోంది. సినిమా బడ్జెట్, రిలీజ్ రేంజ్, థియేటర్ల సంఖ్య వంటి అంశాలను పరిగణనలోకి తీసుకుని ఒక సిస్టమ్ ను రూపొందిస్తే సమస్య చాలా వరకు తగ్గే అవకాశం ఉందని అంతా భావిస్తున్నారు.

ముఖ్యంగా పాన్ ఇండియా చిత్రాల జనరేషన్ లో పాత విధానాలు సరిపోవడం లేదనే అభిప్రాయం వినిపిస్తోంది. ఇప్పుడు తెలుగు సినిమాలు రెండు రాష్ట్రాల మార్కెట్‌ కే పరిమితం కావడం లేదు. వందల కోట్ల పెట్టుబడులతో పాన్ ఇండియా రేంజ్ లో విడుదలవుతున్నాయి. అలాంటి చిత్రాలకు సంబంధించి ప్రతిసారి కొత్తగా అనుమతుల ప్రక్రియ నిర్వహించడం కంటే, ముందే రూల్స్- రెగ్యులేషన్స్ ప్రకటించడం మంచిదని సినీ ప్రియులు చెబుతున్నారు.

ఇందులో ప్రభుత్వం రోల్ కూడా కీలకమే. ఒకవైపు ప్రేక్షకుల ప్రయోజనాలను కాపాడాల్సిన బాధ్యత ఉంది. మరోవైపు ఇండస్ట్రీ అవసరాలను కూడా పరిగణనలోకి తీసుకోవాల్సి ఉంటుంది. అందుకే రెండు వైపులా ఓకే అయ్యే విధానం అవసరమనే అభిప్రాయం వ్యక్తమవుతోంది. సినిమా విడుదలకు కొన్ని గంటల ముందు వరకు ఎదురుచూసే పరిస్థితి కొనసాగితే ప్రతిసారి అదే గందరగోళం రిపీట్ అవుతుంది.

అందుకే ప్రభుత్వం, ఇండస్ట్రీ పెద్దలు, ఎగ్జిబిటర్లు కలిసి సొల్యూషన్ పై దృష్టి పెట్టాల్సిన అవసరం ఉంది. నైజాంలో టికెట్ ధరల పెంపు అంశం ప్రతి విడుదలకు చర్చనీయాంశంగా మారకుండా ఉండాలంటే టెంపరరీ డెసిషన్స్ కంటే పెర్మనెంట్ ప్రాసెస్ మార్గమని చెప్పడంలో డౌట్ అక్కర్లేదు. అదే జరిగితే నిర్మాతలకు క్లారిటీ, ప్రభుత్వానికి కంఫర్ట్, ప్రేక్షకులకు క్రెడిబిలిటీ దక్కే అవకాశం ఉంది. అలా ఇప్పుడు మెగా పవర్ స్టార్ రామ్ చరణ్ పెద్ది మూవీ రిలీజ్ వేళ.. నైజాం ఇష్యూ హాట్ టాపిక్ గా మారింది.