సునీల్ పొలిటిక‌ల్ ఎంట్రీ!

న‌టుడిగా సునీల్ మ‌ళ్లీ బిజీ అయిన సంగ‌తి తెలిసిందే. సెకెండ్ ఇన్నింగ్స్ లో వైవిథ్య‌మైన పాత్ర‌ల‌తో ప్రేక్షుక‌ల్ని అల‌రిస్తున్నారు. ఓవైపు సీరియ‌స్ పాత్ర‌లు పోషిస్తూనే అవే త‌ర‌హా పాత్ర‌ల్లో కామెడీని సైతం పండిస్తున్నాడు. గ‌త ఏడాదే 11 సినిమాల‌తో ప్రేక్ష‌కుల ముందుకొచ్చాడు. ఈ ఏడాది ఇప్ప‌టికే రెండు సినిమాల‌తోనూ అల‌రించాడు. `రామం రాఘ‌వం`, `మ్యాడ్ స్క్వేర్` చిత్రాల‌తో మెప్పించాడు.

కొత్త‌గా మ‌రికొన్ని ప్రాజెక్ట్ లోనూ భాగ‌మ‌వుతున్నాడు. ఈ నేప‌థ్యంలోనే సునీల్ పొలిటిక‌ల్ ఎంట్రీ కూడా ఇస్తున్న‌ట్లు తెలుస్తోంది. రాజ‌కీయ పాత్ర‌ల‌తోనూ త‌న‌దైన ముద్ర వేయ‌డానికి రెడీ అవుతున్నాడు. ఇంత‌కీ ఏంటా సినిమా? వివ‌రాల్లోకి వెళ్లాల్సిందే. ద‌ళ‌ప‌తి విజ‌య్ క‌థానాయ‌కుడిగా కోలీవుడ్ లో వినోధ్ ద‌ర్శ‌క త్వంలో `జ‌న‌నాయ‌గ‌న్` తెర‌కెక్కుతోన్న సంగ‌తి తెలిసిందే. విజ‌య్ రాజ‌కీయంగా ఎంట్రీ ఇచ్చిన నేప థ్యంలో చేస్తోన్న తొలి పొలిటిక‌ల్ చిత్ర‌మిది.

వ‌చ్చే ఎన్నిక‌ల్లో పోటీని దృష్టిలో పెట్టుకుని విజ‌య్ ఈ త‌ర‌హా చిత్రానికి పూనుకున్నాడు. `జ‌న నాయ‌కుడు` పాత్ర‌ల్లో ప్రేక్ష‌కుల్ని అల‌రించ‌బోతున్నాడు. ఆయ‌న‌తో పాటు ఇదే సినిమాలో మ‌రికొంత మంది రాజ‌కీయ నాయ‌కుల పాత్ర‌లు పోషిస్తున్నారు. వారంతా త‌మిళ న‌టులే. అయితే ఓ త‌మిళ రాజ‌కీయ నాయ‌కుడి పాత్ర‌లో న‌టించే అవ‌కాశం సునీల్ కి ద‌క్కిందిట‌. సినిమాలో ఆ పాత్ర చాలా కీల‌క‌మని కోలీవుడ్ మీడియాలో ప్ర‌చారం మొద‌లైంది.

ఇది విజ‌య్ కి ప్ర‌త్య‌ర్ధి పాత్ర అంటున్నారు. సునీల్ ఆహార్యం, వైట్ అండ్ వైట్ గెట‌ప్ ఇంట్రెస్టింగ్ ఉంటుందంటున్నారు. మ‌రి ఈ ప్ర‌చారంలో నిజ‌మెంతో తేలాలి. ఇంత‌వ‌ర‌కూ ఇలాంటి పాత్ర పోషించే అవ‌కాశం సునీల్ కి తెలుగులో ఏ సినిమాలో రాలేదు. ఆ ర‌కంగా కోలీవుడ్ లో సునీల్ అరుదైన ఛాన్స్ అందుకుంటున్నాడు. ఇప్ప‌టికే త‌మిళ్ లో సునీల్ చాలా సినిమాలు చేసాడు. `జైల‌ర్` సినిమాతో మంచి పేరొచ్చింది. అదే ఇమేజ్ తో జ‌న‌నాయ‌గ‌న్ లోనూ ఛాన్స్ అందుకుంటున్నాడు.