ఏకంగా బాలీవుడ్ ఛాన్స్ కొట్టేసిన సాయి పల్లవి

అందం కాదు.. అభినయమే ప్రధానం అంటూ నేచురల్ హీరోయిన్​గా అభిమానుల్లో తనకంటూ ఓ ఇమేజ్ క్రియేట్ చేసుకుంది సాయి పల్లవి. ఎప్పుడూ పాజిటివ్‌ దృక్పథంతో ఉండే ఈమె.. మేకప్‌ లేకుండా ఎంపిక చేసుకున్న పాత్రలకు ప్రాణం పోస్తూ కెరీర్​లో ముందుకెళ్తోంది. తెలుగు, తమిళ, మలయాళ చిత్ర పరిశ్రమలో సినిమాలు చేసుకుంటూ రాణిస్తోంది. అయితే గత కొద్ది కాలంగా ఆమె ఎక్కువగా సినిమాలు చేయట్లేదు. 2022లో విరాట్ పర్వం, గార్గి చిత్రాలతో పలకరించిన ఆమె.. ప్రస్తుతం ఓ సినిమా మాత్రమే చేస్తోంది.

అయితే గత కొద్ది రోజులుగా ఆమె పేరు బాలీవుడ్ మీడియాలో వినిపిస్తున్న సంగతి తెలిసిందే. ఆ మధ్యలో ఆమె హిందీ రామాయణ్ చిత్రంలో సీతగా కనిపిస్తుందని ప్రచారం సాగింది. అయితే ఇప్పుడామె పేరు మరోసారి హిందీ మీడియాలో తెరపైకి వచ్చింది. ఎందుకంటే ఆమె ఓ హిందీ సినిమాకు గ్రీన్ సిగ్నల్ ఇచ్చినట్లు కథనాలు వస్తున్నాయి. ఆమె హీరోయిన్​గా బాలీవుడ్ స్టార్​ హీరో అమీర్ ఖాన్ తనయుడు జునైద్ ఖాన్​తో కలిసి ఓ సినిమా చేస్తుందని అంటున్నారు.

ఈ సినిమా షూటింగ్ కూడా రీసెంట్​గా ప్రారంభం అయిందని వార్తల్లో రాస్తున్నారు. ఈ చిత్రానికి సునీల్ పాండే దర్శకత్వం వహిస్తున్నారట. లవ్​ స్టోరీ నేపథ్యంలో ఈ చిత్రం రానుందని అంటున్నారు. త్వరలోనే దీని గురించి అధికార ప్రకటన వచ్చే అవకాశముందని టాక్ వినిపిస్తోంది. ఒకవేళ ఈ చిత్రం కనుక నిజమైతే సాయిపల్లవికి ఇదే తొలి హిందీ సినిమా అవుతుంది.

ఇకపోతే జునైద్ ఖాన్​కు ఇది రెండో చిత్రం అవుతుంది. తన తొలి సినిమాను వైఆర్​ఎఫ్​ స్టూడియోస్​ బ్యానర్​లో చేస్తున్నారు. ఇది లవ్​ టుడే హిందీ రీమేక్​ అని చెబుతున్నారు. ఇందులో జాన్వీ కపూర్ హీరోయిన్​గా నటించబోతుందని ఆ మధ్య వార్తలు వచ్చాయి. కాగా, జునైద్ ఖాన్​.. లాస్​ ఏంజెల్స్​లోని అమెరికన్ అకాడమీ డ్రామా ఆఫ్ ఆర్ట్స్​లో ట్రైనింగ్ తీసుకున్నారు.

ఇకపోతే సాయి పల్లవి ప్రస్తుతం.. శివ కార్తికేయన్‌ హీరోగా తెరకెక్కుతున్న ఓ సినిమాలో చేస్తోంది. యూనివర్సల్ స్టార్​ కమల్‌హాసన్‌, ఆర్‌.మహేంద్రన్‌ సంయుక్త నిర్మాణంలో ఈ చిత్రం రూపొందుతోంది. రాజ్‌కుమార్‌ పెరియసామి దర్శకత్వం వహిస్తున్నారు. సోనీ పిక్చర్స్‌ ఇంటర్నేషనల్‌ ప్రొడక్షన్స్‌ సంస్థ సమర్పిస్తోంది.