డిసెంబర్ రేసులో 'రౌడీ జనార్ధన్'.. ఇంటెన్స్ డ్రామాపై క్యూరియాసిటీ!

టాలీవుడ్ స్టార్ హీరో విజయ్ దేవరకొండ, కీర్తి సురేష్ ప్రధాన పాత్రల్లో నటిస్తున్న తాజా చిత్రం `రౌడీ జనార్ధన్`. రవి కిరణ్ కోలా దర్శకత్వంలో ఎంతో ప్రతిష్టాత్మకంగా తెరకెక్కుతున్న ఈ చిత్రాన్ని అగ్ర నిర్మాత దిల్ రాజు భారీ బడ్జెట్‌తో నిర్మిస్తున్నారు. క్రేజీ కాంబినేషన్‌లో వస్తున్న ఈ సినిమాపై ఇప్పటికే ఇండస్ట్రీలోనూ, ప్రేక్షకుల్లోనూ భారీ అంచనాలు నెలకొన్నాయి. ప్రస్తుతం ఫిల్మ్ నగర్ సర్కిల్స్‌లో వినిపిస్తున్న సమాచారం ప్రకారం.. ఈ చిత్రాన్ని డిసెంబర్ నెలలోనే థియేటర్లలోకి తీసుకురావాలని చిత్రబృందం గట్టిగా భావిస్తోందట. ఒకవేళ ఇదే ప్లాన్ ఖరారైతే... పండగ సీజన్ కావడంతో బాక్స్ ఆఫీస్ వద్ద రౌడీ జనార్ధన్ కలెక్షన్ల పరంగా అద్భుతమైన వసూళ్లను సాధించే అవకాశం ఉంది. థియేట్రికల్ రన్‌కు ఈ డిసెంబర్ విండో ఎంతగానో కలిసి వస్తుందని మేకర్స్ అంచనా వేస్తున్నారు. అయితే దీనిపై అధికారిక ప్రకటన కోసం అభిమానులు ఎంతో ఆసక్తిగా ఎదురుచూస్తున్నారు.

ఒకవేళ రౌడీ జనార్ధన్ డిసెంబర్ నెలలో విడుదలైతే, బాక్స్ ఆఫీస్ వద్ద దీనికి కొన్ని ఆసక్తికరమైన సినిమాలు పోటీగా నిలిచే అవకాశం ఉంది. డిసెంబర్ రేసులో పురాణాల నేపథ్యంలో తెరకెక్కుతున్న మైథలాజికల్ చిత్రం `మహావతార్ పరశురామ్` యానిమేటెడ్ సంచ‌ల‌నం తెలుగు డబ్బింగ్ రూపంలో థియేటర్లలోకి రాబోతోంది. అలాగే బాలీవుడ్ నుండి భారీ అంచనాలతో వస్తున్న `తుంబాడ్ 2` సినిమా డిసెంబర్ 3న విడుదల కానుంది. ఈ చిత్రాల రిలీజ్ తేదీల‌తో క్లాష్ లేకుండా విజయ్ దేవరకొండ సినిమా రానుంద‌ని స‌మాచారం. అయితే మహావ‌తార్ మొద‌టి భాగం పెద్ద స‌క్సెసైన నేప‌థ్యంలో ఇప్పుడు రెండో భాగానికి కూడా అంతే క్రేజ్ ఉంటుంద‌న‌డంలో సందేహం లేదు. రౌడీ జ‌నార్థ‌న స్టార్ ప‌వ‌ర్ మాస్ ని థియేట‌ర్ల‌కు ర‌ప్పిస్తుంద‌ని అంచనా.

మరోవైపు ఈ చిత్రానికి థియేటర్ల పరంగా, వసూళ్ల పరంగా సంక్రాంతి సీజన్ లో గ‌ట్టి పోటీ ఎదుర‌వుతుంది. సరిగ్గా జనవరి మొదటి వారంలో అంటే సంక్రాంతి కానుకగా మరికొన్ని భారీ బడ్జెట్ తెలుగు సినిమాలు విడుదల బరిలో నిలవడానికి సిద్ధమవుతున్నాయి. పండగ సీజన్ క్రేజ్‌ను వాడుకోవాలని చూసే ఆ పెద్ద సినిమాల తాకిడి, డిసెంబర్ చివర్లో వచ్చే సినిమాల కలెక్షన్లపై క‌చ్చితంగా ప్రభావం చూపే అవకాశం ఉంది.

ఈ రకమైన బాక్స్ ఆఫీస్ పోటీని తట్టుకుని నిలబడాలంటే `రౌడీ జనార్ధన్` చిత్రానికి థియేటర్లలో పాజిటివ్ టాక్ రావడం అత్యంత కీలకం. దిల్ రాజు లాంటి సీనియర్ నిర్మాత డిస్ట్రిబ్యూషన్ నెట్‌వర్క్ ఈ సినిమాకు పెద్ద ప్లస్ పాయింట్ కానుంది. దిల్ రాజు బ‌ర్త్ డే స‌హా ప‌లు అకేష‌న్ల‌లో రౌడీ జ‌నార్థ‌న ప్ర‌చార మెటీరియ‌ల్ ని విడుద‌ల చేయ‌డానికి చిత్ర‌బృందం ప్లాన్ చేస్తోంద‌ట‌. కంటెంట్ గనుక ప్రేక్షకులను విపరీతంగా ఆకట్టుకుంటే, మునుపెన్నడూ లేని విధంగా విజయ్ దేవరకొండ కెరీర్‌లోనే ఇదొక బిగ్గెస్ట్ థియేట్రికల్ రన్‌గా నిలిచే అవకాశం ఉందని ట్రేడ్ విశ్లేషకులు భావిస్తున్నారు. ముఖ్యంగా ఈ చిత్రంలో టాలీవుడ్ సీనియ‌ర్ హీరో రాజ‌శేఖ‌ర్ ఒక కీల‌క పాత్ర‌ను పోషిస్తుండ‌డంతో స‌ర్వ‌త్రా ఉత్కంఠ నెల‌కొంది.