రేణు దేశాయ్ మాస్ వార్నింగ్.. ఇకనైనా మార్పు వస్తుందా?

నటి రేణు దేశాయ్ సోషల్ మీడియా వేదికగా నెటిజన్లకు స్ట్రాంగ్ వార్నింగ్ ఇచ్చారు. తనపై అకారణంగా బూతులతో దాడి చేసే వారిని వదిలిపెట్టే ప్రసక్తే లేదని ఆమె తేల్చి చెప్పారు. ఇప్పటికే సైబర్ క్రైమ్ పోలీసుల సహకారంతో పలువురిని అరెస్ట్ చేయించిన రేణు, తాజాగా మరో వీడియో విడుదల చేస్తూ అబ్యూజ్ చేసే వారికి చుక్కలు చూపిస్తానని హెచ్చరించారు. సెలబ్రిటీల వ్యక్తిగత జీవితాలపై అసభ్యకరంగా కామెంట్స్ చేసే వారు ఇకనైనా మారతారా అన్నది ఇప్పుడు ఆసక్తికరంగా మారింది. ఆ వివరాలు చూద్దాం..

బూతులు పెడితే కటకటాలే:

సోషల్ మీడియాలో సెలబ్రిటీలను టార్గెట్ చేస్తూ బూతులు తిట్టడం కొందరికి ఫ్యాషన్‌గా మారింది. దీనిపై గతంలోనే లైవ్ పెట్టి హెచ్చరించిన రేణు దేశాయ్, చెప్పినట్టుగానే సైబర్ క్రైమ్ పోలీసులకు ఫిర్యాదు చేశారు. తాజా సమాచారం ప్రకారం, ఈ కేసులో ఇప్పటికే ఆరుగురికి పైగా నెటిజన్లను పోలీసులు అరెస్ట్ చేశారు. "నేను ముందే చెప్పాను, నన్ను అకారణంగా దూషిస్తే చట్టపరమైన చర్యలు తప్పవని. ఇక ఇప్పుడు అదే జరుగుతోంది. అరెస్టులు మొదలయ్యాయి, ఇవి ఇక్కడితో ఆగవు" అని రేణు దేశాయ్ స్పష్టం చేశారు.

ఫేమ్ కోసం ఇతరులను వేధించకండి:

అరెస్ట్ అయిన వారిని విచారించగా విస్తుపోయే నిజాలు బయటపడ్డాయి. కేవలం సోషల్ మీడియాలో ఫాలోయింగ్ పెంచుకోవడం కోసం, సెలబ్రిటీల గురించి తప్పుగా రాస్తే ఫేమస్ అయిపోతామన్న పిచ్చి భ్రమలో ఇలాంటి పనులు చేస్తున్నట్లు నిందితులు ఒప్పుకున్నారు. "ఎవరి గురించైనా పర్సనల్ గా తెలియకుండా బూతులు పెట్టడం వల్ల మీకు వచ్చే ఫేమ్ తాత్కాలికం, కానీ దాని వల్ల వచ్చే జైలు శిక్ష మీ జీవితాంతం బ్లాక్ మార్క్‌లా మిగిలిపోతుంది" అని రేణు వారిని ఉద్దేశించి హితవు పలికారు.

మీ కెరీర్ నాశనం చేసుకోవద్దు:

అభ్యంతరకరమైన కామెంట్స్ చేసే వారి ఐడెంటిటీని పబ్లిక్‌గా రివీల్ చేయకూడదని నిర్ణయించుకున్నా, వారి ఆఫీసులకు మరియు కుటుంబ సభ్యులకు సమాచారం చేరవేస్తామని రేణు హెచ్చరించారు. "మీరు ఎక్కడైనా ఉద్యోగం చేస్తుంటే, మీ పై అధికారులకు మీ ప్రవర్తన గురించి చెప్తాము. మీ ఫ్రీడమ్ ఆఫ్ ఎక్స్‌ప్రెషన్ అంటే బూతులు తిట్టడం కాదు. ఇలాంటి పనుల వల్ల మీ కెరీర్, మీ ఫ్యామిలీ ఎఫెక్ట్ అవుతాయి. ఇక ఏదైనా నచ్చకపోతే మర్యాదగా చెప్పండి కానీ, బూతులతో దాడి చేస్తే మాత్రం FIR తప్పదు" అని ఆమె మాస్ వార్నింగ్ ఇచ్చారు.

పోలీసులకు థ్యాంక్స్.. సిస్టమ్ మీద నమ్మకం:

ఈ విషయంలో గచ్చిబౌలి సైబర్ క్రైమ్ పోలీసులు చూపిస్తున్న చొరవను రేణు దేశాయ్ అభినందించారు. ఇక సమాజంలో ఇలాంటి అబ్యూజ్ చేసే వారిపై ఫోకస్ పెట్టినందుకు వారికి కృతజ్ఞతలు తెలిపారు. "పోలీసుల వేగవంతమైన చర్యల వల్ల నాకు మళ్ళీ సిస్టమ్ మీద నమ్మకం కలిగింది" అని ఆమె పేర్కొన్నారు. కేవలం తనకే కాదు, ఎవరికైనా ఇలాంటి కామెంట్స్ పెడితే అరెస్ట్ అవ్వక తప్పదని, నెటిజన్లు కామెంట్స్ చేసేటప్పుడు కొంచెం ఆలోచించి బాధ్యతగా ఉండాలని ఆమె కోరారు.