రంగస్థలం - RRR.. ఇప్పుడు పెద్ది!

గ్లోబల్ స్టార్ రామ్ చరణ్ నెక్స్ట్ సోలో ప్రాజెక్ట్ 'పెద్ది'.. ఈ సినిమా అనౌన్స్ అయినప్పటి నుంచి టాలీవుడ్‌లో పాజిటివ్ వైబ్రేషన్ క్రియేట్ చేసుకుంది. 'RRR' తర్వాత చరణ్ గేమ్ ఛేంజర్ తో డిజాస్టర్ ఎదుర్కొన్నప్పటికీ క్రేజ్ ఏమాత్రం తగ్గలేదు. ప్రతీ అప్‌డేట్ ఒక సెన్సేషన్‌గా మారుతోంది. ఈ దీపావళికి మేకర్స్ వదిలిన పోస్టర్ ఫ్యాన్స్‌కు మంచి కిక్ ఇచ్చినా, అసలైన ట్రీట్ మాత్రం దర్శకుడు బుచ్చిబాబు సానా మాటల్లో బయటపడింది.

'ఉప్పెన' లాంటి ఇండస్ట్రీ హిట్‌ను అందించిన బుచ్చిబాబు, 'పెద్ది'ని అంతకుమించిన స్థాయిలో, ఒక విలేజ్ స్పోర్ట్స్ డ్రామాగా చెక్కుతున్నాడు. ముందుగా, ఈ చిత్రాన్ని రామ్ చరణ్ పుట్టినరోజు కానుకగా, 2026 మార్చి 27న విడుదల చేయనున్నట్లు ప్రకటించారు. కానీ, ఇప్పుడు ఆ ప్లాన్‌లో ఒక వ్యూహాత్మకమైన మార్పు చోటుచేసుకుంది. ఈ విషయాన్ని దర్శకుడు బుచ్చిబాబు స్వయంగా కన్ఫర్మ్ చేశారు.

సినిమా షూటింగ్ ఇప్పటికే 60 శాతం పూర్తయిందని, టీమ్ మొత్తం చాలా కష్టపడి పనిచేస్తోందని తెలిపారు. ఈ వేగానికి తగ్గట్టే, సినిమా విడుదల తేదీని ఒక రోజు ముందుకు జరిపారు. 'పెద్ది' చిత్రాన్ని మార్చి 27కి బదులుగా, మార్చి 26, గురువారం విడుదల చేయాలని టీమ్ నిర్ణయించింది. ఇది కేవలం ఒక రోజు మార్పు కాదు, దీని వెనుక ఒక పక్కా కమర్షియల్ లెక్క ఉంది.

మార్చి 26న శ్రీరామనవమి కావడంతో, ఆ రోజు సెలవు. అంటే, సినిమాకు గురువారం, శుక్రవారం, శని, ఆదివారాలతో కూడిన ఒక భారీ లాంగ్ వీకెండ్ దొరుకుతుంది. ఇది ఓపెనింగ్స్ పరంగా సినిమాకు అతిపెద్ద ప్లస్ పాయింట్. అసలైతే మార్చి 26న నాని ప్యారడైజ్ రావాల్సి ఉండగా ఆ సినిమా వాయిదా పడే అవకాశం ఉన్నట్లు టాక్ వినిపిస్తోంది. ఇక అందుకే పెద్ది అడ్వాంటేజ్ తీసుకున్నట్లు తెలుస్తోంది.

మరో స్పెషల్ ఏమిటంటే.. ఈ రిలీజ్ డేట్ మార్పు కేవలం లాంగ్ వీకెండ్ కోసం మాత్రమే కాదు, ఒక పవర్‌ఫుల్ సెంటిమెంట్‌ను కూడా ఫాలో అవుతోంది. అదే చరణ్ మార్చి మ్యాజిక్. రామ్ చరణ్ కెరీర్‌ను గమనిస్తే, మార్చి నెల స్పెషల్ అని చెప్పాలి. చరణ్‌ను నటుడిగా మరో స్థాయికి తీసుకెళ్లి, నాన్ బాహుబలి ఇండస్ట్రీ హిట్‌గా నిలిచిన 'రంగస్థలం' మార్చి 30న విడుదలైంది.

ఇక గ్లోబల్ స్టార్‌గా మార్చిన 'RRR' మార్చి 25న ప్రేక్షకుల ముందుకు వచ్చింది. ఈ రెండు చిత్రాలు కేవలం హిట్లు కాదు, చరణ్ కెరీర్‌లోనే బిగ్గెస్ట్ ల్యాండ్‌మార్క్స్.

ఇప్పుడు సరిగ్గా ఆ రెండు విజయాల మధ్యలో, మార్చి 26న 'పెద్ది'ని విడుదల చేస్తుండటం మరో బిగ్ సెంటిమెంటుగా హైలెట్ అవుతోంది. ఇది కేవలం యాదృచ్ఛికం కాదు, ఒక పక్కా ప్లానింగ్ అనే కామెంట్స్ వస్తున్నాయి. ఈ సెంటిమెంట్ ఫ్యాన్స్‌లో అదనపు జోష్ నింపడమే కాకుండా, ట్రేడ్ వర్గాల్లోనూ సినిమాపై పాజిటివ్ వైబ్స్‌ను క్రియేట్ చేస్తుంది. ఏఆర్ రెహమాన్ సంగీతం, జాన్వీ కపూర్ హీరోయిన్‌గా నటిస్తుండటం, మైత్రీ మూవీ మేకర్స్, సుకుమార్ రైటింగ్స్ లాంటి పెద్ద సంస్థలు అండగా ఉండటం ఈ సినిమాకు అదనపు బలాలు. మొత్తం మీద, ఈ చిన్న రిలీజ్ డేట్ మార్పు 'పెద్ది' టీమ్ కు కలిసొచ్చే అవకాశం ఉంది. ఇక లాంగ్ వీకెండ్ అడ్వాంటేజ్, మార్చి సెంటిమెంట్ ఈ రెండూ కలిసి 'పెద్ది'కి బాక్సాఫీస్ వద్ద ఎలాంటి ప్రభంజనాన్ని సృష్టిస్తాయో చూడాలి.