2026 బిలియ‌నీర్స్ జాబితాలోకి మ‌ళ్లీ కింగ్ ఖాన్

బాలీవుడ్ బాద్షా షారుఖ్ ఖాన్ మరోసారి సంపాద‌న‌లో రారాజు అని నిరూపించుకున్నారు. ప్రతిష్టాత్మక `హురున్ గ్లోబల్ రిచ్ లిస్ట్ 2026` ప్రకారం కింగ్ ఖాన్ తిరిగి బిలియనీర్ల జాబితాలోకి చేరారు. ప్రపంచవ్యాప్తంగా వ్యాపార దిగ్గజాలు పోటీ పడుతున్న ఈ జాబితాలో ఒక సినీ నటుడిగా షారుఖ్ తన స్థానాన్ని సుస్థిరం చేసుకోవడం విశేషం. సుమారు 12,000 కోట్ల రూపాయ‌ల‌ (1.3 బిలియన్ డాలర్ల) నికర ఆస్తితో ఆయన ఈ ఘనతను సాధించారు. కేవలం నటనపైనే కాకుండా తన వ్యాపార సామ్రాజ్యాన్ని విస్తరించడం వల్లనే ఆయన ఈ స్థాయికి చేరుకోగలిగారు.

గత నాలుగైదు ఏళ్ల కాలంలో షారుఖ్ ఖాన్ ఆదాయ వనరులు.. నికర సంపద పెరిగిన తీరును విశ్లేషిస్తే ఆయన అద్భుతమైన వృద్ధి కనిపిస్తుంది. పఠాన్, జవాన్ , డంకీ వంటి వరుస బ్లాక్ బస్టర్ హిట్లతో బాక్సాఫీస్ వద్ద వంద‌ల‌ కోట్లు కొల్లగొట్టడమే కాకుండా రెడ్ చిల్లీస్ ఎంటర్‌టైన్మెంట్ నిర్మాణ సంస్థ ద్వారా ఆయన భారీ లాభాలను ఆర్జిస్తున్నారు. దీనికి తోడు కోల్ కతా నైట్ రైడర్స్ కేకేఆర్ ఐపీఎల్ జట్టు విలువ అంతర్జాతీయ స్థాయిలో పెరగడం ఆయన సంపద వృద్ధికి ప్రధాన కారణమైంది. బ్రాండ్ ఎండార్స్ మెంట్లు, రియల్ ఎస్టేట్ పెట్టుబడులు కూడా ఆయనను బిలియనీర్ల క్లబ్ లో నిలబెట్టాయి.

ఈ ఏడాది హురున్ గ్లోబల్ రిచ్ లిస్ట్ 2026 ఒక చారిత్రాత్మక మైలురాయిని అధిగమించింది. ప్రపంచవ్యాప్తంగా బిలియనీర్ల సంఖ్య మొదటిసారిగా 4000 మార్కును దాటి 4020కి చేరుకుంది. ఏడాది కాలంలోనే 578 మంది కొత్త బిలియనీర్లు ఈ జాబితాలో చేరడం విశేషం. అంటే సగటున ప్రతిరోజూ ఇద్దరు కొత్త బిలియనీర్లు పుట్టుకొస్తున్నారు. ఈ భారీ పోటీలోనూ షారుఖ్ ఖాన్ తన సంపదను కాపాడుకుంటూ తిరిగి జాబితాలోకి రావడం ఆయన ఆర్థిక ప్రణాళికకు నిదర్శనం.

ప్రపంచ కుబేరుల జాబితాలో ఎలాన్ మస్క్ 792 బిలియన్ డాలర్ల ఆస్తితో వరుసగా ఐదోసారి అగ్రస్థానంలో నిలిచారు. స్పేస్ ఎక్స్, టెస్లా సంస్థల విలువ పెరగడం ఆయనకు బాగా కలిసి వచ్చింది. ఆసియా ఖండం విషయానికి వస్తే 109 బిలియన్ డాలర్ల సంపదతో ముకేశ్ అంబానీ అత్యంత ధనవంతుడిగా తన స్థానాన్ని పదిలం చేసుకున్నారు. టెక్ రంగంలోని దిగ్గజాలు లారీ పేజ్ జెఫ్ బెజోస్ వంటి వారు టాప్ 3లో నిలవగా జెన్సన్ హువాంగ్ వంటి కొత్త వారు కూడా ఈ జాబితాలోకి ప్రవేశించారు.

ఇంత‌మంది కుబేరుల మ‌ధ్య‌.. షారుఖ్ ఖాన్ సాధించిన ఈ ఘనత కేవలం ఆయన వ్యక్తిగత విజయం మాత్రమే కాదు భారతీయ సినీ పరిశ్రమ సత్తాను ప్రపంచానికి చాటార‌ని అంగీక‌రించాలి. ఒక నటుడు అంతర్జాతీయ స్థాయి బిలియనీర్లతో పోటీ పడటం అన్నది గర్వించదగ్గ విషయం. గతేడాది సంపదలో స్వల్ప తగ్గుదల కనిపించినా కానీ.. మళ్లీ పుంజుకుని 1.3 బిలియన్ డాలర్లతో బిలియనీర్ గా ఎదగడం ఆయన బాద్షా ఇమేజ్ కు సరిగ్గా సరిపోతుంది. భవిష్యత్తులో మరిన్ని భారీ ప్రాజెక్టులు, వ్యాపార విస్తరణల ద్వారా ఆయన సంపద ఇంకా పెరిగే అవకాశం ఉందని విశ్లేషకులు భావిస్తున్నారు. ప్ర‌స్తుతం షారూఖ్ `కింగ్` అనే చిత్రంలో త‌న కుమార్తె సుహానాతో క‌లిసి న‌టిస్తుండ‌గా ఈ చిత్రానికి సిద్ధార్థ్ ఆనంద్ ద‌ర్శ‌క‌త్వం వ‌హిస్తున్నారు.