మూడేళ్లు సెట్స్ పైనే.. ఈమధ్య మరీ ఎక్కువయ్యాయే!

విశ్వంభర మొదలై దాదాపు మూడేళ్లు అవుతోంది. 2023 నవంబర్‌లో షూటింగ్ మొదలుపెట్టిన ఈ సినిమాను మొదట 2025 సంక్రాంతికే తీసుకురావాలని ప్లాన్ చేశారు. కానీ గ్రాఫిక్స్ పనులు అనుకున్న సమయానికి పూర్తి కాకపోవడంతో ఆ డేట్ మిస్ అయింది. ఆ తర్వాత కూడా కొన్ని తేదీలు ప్రచారంలోకి వచ్చినా మేకర్స్ అధికారికంగా ఏదీ ఫిక్స్ చేయలేదు. ఇప్పుడు ఓటీటీ డీల్ కూడా క్లోజ్ అయినట్లు టాక్ వస్తోంది. దీంతో 2027 సంక్రాంతికి విశ్వంభరను తీసుకొచ్చే అవకాశం ఉందనే వార్తలు మళ్లీ మొదలయ్యాయి.

ఈమధ్య ఎక్కువ కాలం షూటింగ్, పోస్ట్ ప్రొడక్షన్‌లోనే ఉన్న పెద్ద సినిమాలు మరికొన్ని ఉన్నాయి. పవన్ కల్యాణ్ హరిహర వీరమల్లు షూటింగ్ 2020లో మొదలైంది. కరోనా కారణంగా మొదట బ్రేక్ పడింది. ఆ తర్వాత పవన్ రాజకీయాలు, ఇతర సినిమాలు, దర్శకుడి మార్పు ఇలా ఒక్కో కారణంతో ఆలస్యం పెరుగుతూ వచ్చింది. మధ్యలో చాలాసార్లు రిలీజ్ డేట్లు కూడా ప్రకటించారు. చివరకు 2025 జూలైలో సినిమా థియేటర్లలోకి వచ్చింది. షూటింగ్ మొదలైనప్పటి నుంచి రిలీజ్ వరకు దాదాపు ఐదేళ్లు పట్టింది.

రామ్ చరణ్ గేమ్ ఛేంజర్ కూడా మూడేళ్లకు పైగానే సెట్స్ మీద ఉంది. 2021లో మొదలైన సినిమా 2025 జనవరిలో ప్రేక్షకుల ముందుకొచ్చింది. దర్శకుడు శంకర్ మరోవైపు ఇండియన్ 2 కూడా చేయడం వల్ల రెండు సినిమాల షూటింగ్స్ మధ్య గ్యాప్ వచ్చింది. భారీ పాటలు, వేర్వేరు లొకేషన్స్‌లో షెడ్యూల్స్ కూడా టైమ్ తీసుకున్నాయి. మధ్యలో రిలీజ్‌పై చాలా డేట్స్ వినిపించినా చివరకు 2025 సంక్రాంతికే సినిమా వచ్చింది.

ఇండియన్ 2 పరిస్థితి ఇంకా ఎక్కువ కాలం సాగింది. 2019లో షూటింగ్ మొదలైంది. సెట్లో జరిగిన ప్రమాదం తర్వాత పెద్ద బ్రేక్ వచ్చింది. కరోనా కూడా మరోసారి షూటింగ్‌ను ఆపేసింది. కమల్ హాసన్ ఇతర పనులు, శంకర్ గేమ్ ఛేంజర్‌తో బిజీ కావడం వల్ల సినిమా మళ్లీ మొదలయ్యేందుకు కూడా సమయం పట్టింది. చివరకు 2024 జూలైలో రిలీజ్ చేశారు. మొదటి క్లాప్ నుంచి థియేటర్ వరకు ఐదేళ్లకు పైగా పట్టిన సినిమాగా ఇండియన్ 2 నిలిచింది.

విశ్వంభర మాత్రం ఇప్పుడు షూటింగ్ వలన ఆగిన సినిమా కాదు. మేజర్ షూట్ పూర్తయిందనే టాక్ వచ్చింది. అసలు ఆలస్యం గ్రాఫిక్స్, పోస్ట్ ప్రొడక్షన్, బిజినెస్ దగ్గరే ఎక్కువగా కనిపిస్తోంది. చిరంజీవి మిగతా సినిమాలతో మరింత స్పీడ్ పెంచినా ఇది మాత్రం రావడం లేదు. అనిల్ రావిపూడి సినిమా పూర్తయి రిలీజ్ కూడా అయింది. బాబీతో కాకా షూటింగ్ కూడా జరుగుతోంది. కానీ అంతకంటే ముందే మొదలైన విశ్వంభర మాత్రం ఇంకా కొత్త రిలీజ్ పోస్టర్ కోసం ఎదురుచూస్తోంది.

2027 సంక్రాంతి నిజంగా విశ్వంభరకు ఫిక్స్ అయితే చిరంజీవి సినిమాల ప్లాన్‌లో మరో మార్పు రావచ్చు. బాబీ తెరకెక్కిస్తున్న కాకాను కూడా అదే పండగకు తీసుకురావాలని ముందుగా అనుకున్నారు. ఒకే హీరో నుంచి రెండు సినిమాలు ఒకేసారి రావడం సాధ్యం కాదు కాబట్టి వాటిలో ఒకటి వెనక్కి వెళ్లాల్సి ఉంటుంది.