నీల్ తో మైత్రీ మరొకటి.. ప్లాన్ ఎలా ఉందంటే?

క్రియేటివ్ డైరెక్టర్ ప్రశాంత్ నీల్, టాలీవుడ్ టాప్ నిర్మాణ సంస్థ మైత్రీ మూవీ మేకర్స్ కలిసి చేస్తున్న ప్రాజెక్టులు ఇప్పుడు హాట్ టాపిక్‌ గా మారాయి. ఇప్పటికే జూనియర్ ఎన్టీఆర్ తో డ్రాగన్ సినిమాను శరవేగంగా పూర్తి చేస్తుండగా, అదే సమయంలో మరోసారి ఆ కాంబినేషన్ కొత్త ప్రయోగానికి సిద్ధమైంది. అయితే ఈసారి ప్రశాంత్ నీల్ దర్శకుడిగా కాకుండా సమర్పకుడిగా మారి, మైత్రి సంస్థతో కలిసి భిన్నమైన కాన్సెప్ట్‌ ను తీసుకురాబోతున్నారు.

ఇప్పటివరకు మాస్ కమర్షియల్ ఎంటర్టైనర్ల తో బాక్సాఫీస్‌ ను షేక్ చేసిన మైత్రి మూవీ మేకర్స్, తొలిసారిగా ప్యూర్ హారర్ జానర్‌ లోకి అడుగుపెడుతోంది. ఆ కొత్త చిత్రానికి 418 అనే డిఫరెంట్ టైటిల్‌ ను ఖరారు చేశారు. దర్శకుడు కీర్తన్ నాద గౌడ తెరకెక్కిస్తున్న ఆ సినిమా టైటిల్ పోస్టర్ ఇప్పటికే సోషల్ మీడియాలో వైరల్‌గా మారింది. పోస్టర్‌లో రక్తం మరకలతో ఉన్న ఒక తలుపు, దానిపై 418 అనే నెంబర్ కనిపించడం సినిమా మీద ఆసక్తిని పెంచుతోంది.

"హారర్ సినిమాల్లో నవ్వింది చాలు.. ఇక భయపడాల్సిన సమయం వచ్చింది" అనే పవర్‌ ఫుల్ ట్యాగ్‌ లైన్‌ తో ఆ చిత్రాన్ని ప్రకటించారు. ఇటీవలి కాలంలో హారర్ సినిమాల్లో కామెడీ ఎక్కువైపోయి భయం తగ్గిపోయిందనే అభిప్రాయం ఉన్న నేపథ్యంలో, 418ను పూర్తిగా భయపెట్టే ప్యూర్ హారర్ మూవీగా తెరకెక్కిస్తున్నట్లు చిత్రబృందం స్పష్టం చేసింది.

ఆ చిత్రంలో సూర్య రాజ్, చరణ్ లక్కరాజు, ప్రీతి పగడల్ ప్రధాన పాత్రల్లో నటిస్తున్నారు. కొత్త నటీనటులతో ఫ్రెష్ ఫీల్ ఇవ్వాలనే ప్రయత్నం చేస్తున్నారు. మైత్రి మూవీ మేకర్స్ అధినేతలు నవీన్ యెర్నేని, రవి శంకర్ ఆ చిత్రాన్ని నిర్మిస్తున్నారు. ప్రస్తుతం ఆ సినిమా షూటింగ్ వేగంగా కొనసాగుతోంది. మాస్ యాక్షన్ సినిమాలకు కేరాఫ్ అడ్రస్ అయిన ప్రశాంత్ నీల్ ఆ ప్రాజెక్ట్‌ ను సమర్పించడం 418కు పెద్ద ప్లస్‌ గా మారింది.

ఆయన సినిమాల్లో కనిపించే డార్క్ టోన్, ఇంటెన్స్ మేకింగ్ హారర్ థ్రిల్లర్‌కు కూడా తోడైతే, థియేటర్లలో ప్రేక్షకులకు కొత్త అనుభూతి లభించే అవకాశం ఉంది. ఇటీవల హారర్- కామెడీ సినిమాల హవా నడుస్తున్నప్పటికీ, వాటికి పూర్తి భిన్నంగా కేవలం భయం, మిస్టరీనే ప్రధానాంశాలుగా తీసుకుని వస్తున్న 418 చిత్రం ప్రేక్షకులను ఎంతవరకు వణికిస్తుందో చూడాల్సి ఉంది.

మొత్తంగా.. ప్రశాంత్ నీల్ - మైత్రి కాంబినేషన్‌ లో వస్తున్న ఆ కొత్త ప్రయోగం టాలీవుడ్‌ లో ఆసక్తికరంగా మారింది. ఇప్పటికే డ్రాగన్ సెట్స్ పై ఉండగా.. మరోసారి చేతులు కలపడం విశేషం. కొత్త సినిమాను కూడా గ్రాండ్ గా ప్లాన్ చేస్తున్నట్లు అర్థమవుతోంది. మరి ఆ సినిమా ఎప్పుడు రిలీజ్ అవుతుందో.. ఎలాంటి విజయం సాధిస్తుందో అంతా వేచి చూడాలి.