వారసత్వపు ముద్ర (Vs) స్వయంకృషి: మేజ‌ర్ బ్యూటీ ఏం చెప్పారంటే?

సినీ పరిశ్రమలో న‌ట‌వారసత్వం అనే అంశంపై ఎప్పటికీ ముగింపు లేని చర్చ సాగుతూనే ఉంది. చిత్ర‌ప‌రిశ్ర‌మ బ‌య‌టి నుంచి వచ్చే నటీనటులకు అవకాశాలు దక్కడం లేదనే విమర్శలు ఒకవైపు ఉంటే.. స్టార్ కిడ్స్‌గా ఎదగడం వెనుక కూడా ఎన్నో సవాళ్లు, మానసిక ఒత్తిళ్లు ఉంటాయనే వాదనలు వినిపిస్తున్నాయి. ఈ నేపథ్యంలోనే సీనియర్ నటి సోనాక్షి సిన్హా ఇటీవలే నేపోటిజంపై ఘాటు వ్యాఖ్యలు చేస్తూ.. కేవలం సినీ వారసత్వం ఉన్నంత మాత్రాన అవకాశాలు రావని.. తమను తాము నిరూపించుకునేందుకు ఇండస్ట్రీ కిడ్స్ కూడా ఎంతో శ్రమించాల్సి ఉంటుందని స్పష్టం చేశారు. ఇప్పుడు ఇదే అభిప్రాయాన్ని మరో స్టార్ కిడ్, టాలెంట్ ఉన్న నటి సాయి మంజ్రేకర్ కూడా కుండబద్దలు కొట్టడం గమనార్హం. నటుడు, దర్శకుడు మహేష్ మంజ్రేకర్ కుమార్తె అయిన సాయి.. అడివి శేష్ సరసన `మేజర్` చిత్రంలో తన నటనతో ఇప్పటికే ప్రేక్షకులను మెప్పించి.. వారసత్వపు ముద్రను దాటి తనకంటూ ప్రత్యేక గుర్తింపును తెచ్చుకునే ప్రయత్నంలో ఉన్నారు.

సాయి మంజ్రేకర్ ప్రకారం..సినీ పరిశ్రమలో పాపుల‌ర్ కుటుంబానికి చెందిన ఇంటిపేరు ఉండటం అనేది కేవలం ప్రారంభంలో కొన్ని పరిచయాలకు లేదా మొదటి సినిమా తలుపులు తెరవడానికి మాత్రమే సహాయపడుతుంది. అంతకుమించి అది కెరీర్‌లో నిరంతర అవకాశాలను గానీ..బాక్సాఫీస్ విజయాలను గానీ పక్కాగా గ్యారెంటీ ఇవ్వ‌దు. వెండితెరపై ఒక నటిగా ప్రేక్షకులతో కనెక్ట్ కానప్పుడు.. జనాలు మన నటనను అంగీకరించనప్పుడు వెనుక ఎంతటి పెద్ద బ్యాక్‌గ్రౌండ్ ఉన్నా.. గ్లామర్ ప్రపంచంలో ఎక్కువ కాలం మనుగడ సాగించడం అసాధ్యం. అందుకే తన తండ్రి పేరు కంఫర్ట్ జోన్ నుండి పూర్తిగా బయటకు వచ్చి.. కేవలం తన క‌ష్టం- అంకితభావం ద్వారా ఇండస్ట్రీలో నిలబడాలని గట్టిగా విశ్వసిస్తున్నట్టు తెలిపారు.

ఒక నటుడి విజయాన్ని కేవలం వారసత్వం కాకుండా హార్డ్ వర్క్, క్రమశిక్షణ - పట్టుదల అనే మూడు ప్రధాన సూత్రాలే శాసిస్తాయని సాయి మంజ్రేకర్ పేర్కొన్నారు. సినిమా బ్యాక్‌గ్రౌండ్ ఇతరులకు తనను పరిచయం చేయడానికి ఒక సాధనంగా ఉపయోగపడినా.. నటిగా తన ఎదుగుదల అనేది నిరంతరం కొత్త విషయాలను నేర్చుకోవడం, వైవిధ్యమైన పాత్రల ద్వారా ప్రతి సినిమాకు తనను తాను నిరూపించుకోవడం వల్ల మాత్రమే సాధ్యమవుతుంది. ఎంత ఎదిగినా ఒదిగి ఉండటంఅనే విలువలనే తాను నమ్ముతానని, కేవలం క్రాఫ్ట్ - కంటెంట్‌ను నమ్ముకుని ముందుకు సాగడమే నేపోటిజం విమర్శలకు సరైన సమాధానమని ఆమె తన అభిప్రాయాన్ని వ్యక్తపరిచారు.

సాయి మంజ్రేకర్ ప్రస్తుతం టాలీవుడ్‌లో అత్యంత ప్రతిష్టాత్మకమైన పీరియడ్ డ్రామా `ఇండియా హౌస్`చిత్రంలో హీరోయిన్‌గా నటిస్తున్నారు. మెగా పవర్ స్టార్ రామ్ చరణ్ పీపుల్ మీడియా ఫ్యాక్టరీతో కలిసి భారీ బడ్జెట్‌తో నిర్మిస్తున్న చిత్రం కావడంతో దీనిపై అంచనాలు భారీగా ఉన్నాయి. హిందీ, తెలుగు భాషల్లో ఏకకాలంలో రూపొందుతున్న ఈ చిత్రం ఒక పాత కాలపు చారిత్రక నేపథ్యంలో సాగుతుంది. నాటి పరిస్థితులను, వాతావరణాన్ని సెట్స్‌పై రీ-క్రియేట్ చేయ‌డం ఆస‌క్తిక‌రం. ఈ సినిమాలో న‌టించే అవ‌కాశం ద‌క్క‌డం.. ఒక నటిగా తనకు ఎంతో ఆసక్తికరంగా ఉండటమే కాకుండా.. సృజనాత్మకంగా - సాంకేతికంగా ఎంతో సవాలుతో కూడుకున్నదిగా ఉందని సాయి వెల్లడించారు.

`ఇండియా హౌస్` రిలీజ్ డేట్ ను మేకర్స్ ఇంకా అధికారికంగా ప్రకటించాల్సి ఉంది. సాయి మంజ్రేకర్ మాత్రం ఈ ప్రాజెక్ట్ పైనే తన పూర్తి ఫోకస్ పెట్టారు. నేపోటిజంపై వస్తున్న విమర్శలు, ట్రోలింగ్స్ ను పక్కనబెట్టి కేవలం తన నటనలోని వైవిధ్యాన్ని నమ్ముకుని ఈ సినిమా ద్వారా పాన్-ఇండియా వ్యాప్తంగా అన్ని పరిశ్రమల ప్రేక్షకులను ఆకట్టుకోవాలని యువ‌నటి గట్టిగా ప్రయత్నిస్తున్నారు. సోనాక్షి సిన్హా నుండి సాయి మంజ్రేకర్ వరకు నేటి తరం నటీమణులు చెబుతున్న ఒకే ఒక్క సత్యం ఏమిటంటే.. వారసత్వం కేవలం మొదటి అవకాశాన్ని మాత్రమే ఇస్తుంది..కానీ నటుడిగా సుదీర్ఘ కాలం ప్రేక్షకుల గుండెల్లో నిలబడాలంటే స్వయంకృషి, క్రమశిక్షణ , ప్రతిభ ఒక్కటే ఏకైక మార్గం.