ఇంతకు పోలిశెట్టి ఏం చేస్తున్నట్లు..

నవీన్ పోలిశెట్టి.. సినిమాలు ఎక్కువ చేయడం లేదు.. కానీ వచ్చినప్పుడు మాత్రం తన మార్క్ చూపిస్తున్నాడు. ‘జాతిరత్నాలు’తో ఒక్కసారిగా యూత్‌లో మంచి క్రేజ్ తెచ్చుకున్నాడు. ఆ తర్వాత ‘మిస్ శెట్టి మిస్టర్ పోలిశెట్టి’తో మళ్లీ హిట్ ఇచ్చాడు. ‘అనగనగా ఒక రాజు’తో కూడా తన ట్రాక్ కొనసాగించాడు. అసలైతే ఇంత మంచి రిజల్ట్స్ ఉన్న హీరో దగ్గర సినిమాలు వరుసగా ఉండాలి. కానీ నవీన్ మాత్రం ఒక్కో సినిమా మధ్య పెద్ద గ్యాప్ తీసుకుంటూనే ఉన్నాడు.

ఇప్పుడు కూడా అదే పరిస్థితి కనిపిస్తోంది. ‘అనగనగా ఒక రాజు’ తర్వాత వెంటనే కొత్త సినిమా మొదలవుతుందని అనుకున్నారు. కానీ ఇప్పటివరకు షూటింగ్ స్టార్ట్ అయిన ప్రాజెక్ట్ లేదు. మైత్రీ మూవీ మేకర్స్‌తో సినిమా ఉండబోతోందని నవీన్ స్వయంగా హింట్ ఇచ్చాడు. 2027 కోసం ఎక్సైటెడ్‌గా ఉన్నానని కూడా చెప్పాడు. అంటే సినిమా ఉంది.. కానీ ఇంకా సెట్స్‌పైకి వెళ్లలేదు.

ఈ ప్రాజెక్ట్‌కు తమిళ దర్శకుడు ఆంటోనీ భాగ్యరాజ్ పేరు ఎక్కువగా వినిపిస్తోంది. ‘సైరన్’ చేసిన దర్శకుడు కావడంతో నవీన్‌ను ఏ జోన్‌లో చూపిస్తాడన్న ఆసక్తి ఉంది. కానీ ఈ కాంబో ఇంకా అఫీషియల్‌గా లాక్ కాలేదు. మరోవైపు వెంకట్ బోయనపల్లి ప్రొడక్షన్‌లో కూడా సినిమా ఉంటుందనే వార్తలు వచ్చాయి. ఆ ప్రాజెక్ట్ పరిస్థితి కూడా ఇప్పుడు క్లియర్‌గా లేదు.

ఇక్కడే నవీన్ స్టైల్ మిగతా యంగ్ హీరోల కంటే కాస్త వేరు. మార్కెట్ వచ్చింది కాబట్టి వరుసగా సినిమాలు ఒప్పుకోవడం కనిపించడం లేదు. కథ నచ్చితేనే ముందుకు వెళ్తున్నాడా, లేక ఒకేసారి చాలా ప్రాజెక్టులు లాక్ చేసుకోవడం ఇష్టం లేదా అన్నది ఆయన ఎంపికలు చూస్తే అనిపిస్తోంది. కానీ ఇలాంటి గ్యాప్స్‌కు ఒక రిస్క్ కూడా ఉంటుంది. యూత్‌లో మంచి బజ్ ఉన్న టైమ్‌లో స్క్రీన్‌పై ఎక్కువ గ్యాప్ వస్తే ఆ మోమెంటమ్ తగ్గిపోవచ్చు.

అయినా ఇప్పటివరకు నవీన్‌కు ఈ పద్ధతి పెద్దగా నష్టం చేయలేదు. ప్రతి సినిమా ముందు మళ్లీ బజ్ తెచ్చుకున్నాడు. పైగా కామెడీ మాత్రమే కాదు, తన టైమింగ్‌కు సరిపోయే కథను ఎంచుకోవడం మీద కూడా ఫోకస్ పెట్టాడు. అదే కారణంగా వరుసగా మూడు సినిమాలు తనకు మంచి పేరు తెచ్చాయి. కాబట్టి ఇప్పుడు అసలు ప్రశ్న నవీన్ సినిమా చేస్తున్నాడా లేదా అన్నది కాదు. చేస్తున్నాడు. కానీ ఎప్పుడు మొదలవుతుంది, ఎవరు డైరెక్ట్ చేస్తారు, 2027లో ఏ టైమ్‌కు వస్తుంది అన్నదే అసలు డౌట్. ఇక మొదటి అప్డేట్ ఎప్పుడు ఇస్తారో చూడాలి.