నానా పటేకర్.. తెలుగులో మోహన్ బాబే..

నానా పటేకర్.. హిందీ ప్రేక్షకులకు పరిచయం అక్కర్లేని పేరు. కళ్లలో కోపం, డైలాగ్ డెలివరీలో బేస్, ఒక్క చూపుతోనే సీన్ ను డామినేట్ చేసే నటన ఆయన సొంతం. అయితే నానా పటేకర్ కెరీర్ కు, మన తెలుగు సినిమాకు ఒక ఆసక్తికరమైన కనెక్షన్ ఉంది. ఆయన చేసిన ఒక ఐకానిక్ పాత్ర తెలుగులో రీమేక్ అయినప్పుడు.. అలాగే మరో హిట్ క్యారెక్టర్ ను రీమేక్ చేయాలని ప్లాన్ చేసినప్పుడు.. ఈ రెండుసార్లూ కలెక్షన్ కింగ్ మోహన్ బాబు పేరే ఫస్ట్ ఆప్షన్ గా వినిపించడం విశేషం.

నానా పటేకర్ కు నేషనల్ అవార్డు తెచ్చిపెట్టిన సినిమా 'క్రాంతివీర్'. అందులో ప్రతాప్ తిలక్ పాత్రలో ఆయన నటనకు దేశవ్యాప్తంగా ప్రశంసలు దక్కాయి. ఆ తర్వాత అదే సినిమాను తెలుగులో 'పుణ్యభూమి నా దేశం' పేరుతో రీమేక్ చేశారు. ఏ. కోదండరామిరెడ్డి దర్శకత్వంలో మీనా హీరోయిన్ గా వచ్చిన ఈ సినిమాలో నానా పాత్రను మోహన్ బాబు పోషించారు. హిందీలో నానా చూపించిన ఆ ఇంటెన్సిటీని, వాయిస్ పవర్ ను తెలుగులో మోహన్ బాబు తనదైన శైలిలో పండించారు.

సీరియస్ పాత్రలు మాత్రమే కాదు, కామెడీ కూడా అదరగొట్టగలనని నానా నిరూపించిన సినిమా 'వెల్కమ్'. అందులో ఉదయ్ శెట్టి అనే గ్యాంగ్ స్టర్ పాత్రలో ఆయన టైమింగ్ బాగా వర్కౌట్ అయింది. ఇక్కడ ఆసక్తికరమైన విషయం ఏంటంటే.. ఈ సినిమాను తెలుగులో రీమేక్ చేయాలని భావించినప్పుడు, ఆ ఉదయ్ శెట్టి పాత్రకు కూడా మోహన్ బాబే కరెక్ట్ అని మేకర్స్ అనుకున్నారు. అప్పట్లో అక్షయ్ కుమార్ పాత్రకు నాగచైతన్య, అనిల్ కపూర్ క్యారెక్టర్ కు రియల్ స్టార్ శ్రీహరి పేర్లు గట్టిగా వినిపించాయి.

కానీ కొన్ని కారణాల వల్ల ఆ 'వెల్కమ్' రీమేక్ సెట్స్ పైకి వెళ్లలేదు. ఒకవేళ ఆ ప్రాజెక్ట్ ఓకే అయి ఉంటే మాత్రం నానా పటేకర్ చేసిన రెండు భిన్నమైన పాత్రలను (ఒకటి సీరియస్ సోషల్ డ్రామా, మరొకటి ఫుల్ కామెడీ) మోహన్ బాబు చేసిన అరుదైన రికార్డ్ ఉండేది. నటుడిగా నానా రేంజ్ ఏంటో చెప్పడానికి ఆ రెండు పాత్రలే బెస్ట్ ఎగ్జాంపుల్స్ గా నిలుస్తాయి.

ఈ ఇద్దరు నటుల మధ్య ఇలాంటి సింక్ కుదరడం యాదృచ్ఛికం ఏమీ కాదు. ఇద్దరి ప్రధాన బలం డైలాగ్ డెలివరీనే. సీరియస్ ఎపిసోడ్స్ లో వాయిస్ తో ఆ బరువు తీసుకురావడం, కోపాన్ని స్క్రీన్ మీద ఎలివేట్ చేయడం, అదే సమయంలో అలవోకగా కామెడీకి షిఫ్ట్ అవ్వడం.. ఈ రెండు లక్షణాలు నానా, మోహన్ బాబు ఇద్దరిలోనూ మెండుగా ఉన్నాయి. అందుకే నానా క్యారెక్టర్ ను తెలుగులోకి తేవాలనుకున్నప్పుడు మోహన్ బాబు పేరు సరిపోతుంది అనిపిస్తుంది.