మహావతార్ యూనివర్స్‌తో హోంబలే సంచలనం

పాన్ ఇండియా హిట్స్‌తో దేశవ్యాప్తంగా గుర్తింపు పొందిన హోంబలే ఫిల్మ్స్ ఇప్పుడు మరో భారీ ప్రాజెక్ట్‌తో ముందుకొస్తోంది. ‘కేజీఎఫ్’ సిరీస్, ‘కాంతారా’, ‘సలార్’ వంటి చిత్రాలతో తెలుగు, తమిళ, కన్నడ, హిందీ ప్రేక్షకుల హృదయాల్లో ప్రత్యేక స్థానం సంపాదించుకున్న ఈ సంస్థ.. ఇప్పుడు భారతీయ మానవతా వారసత్వాన్ని ప్రపంచానికి పరిచయం చేయనున్నట్లు ప్రకటించింది.

‘మహావతార్ సినిమాటిక్ యూనివర్స్’ పేరిట విష్ణువు దశావతారాల ఆధారంగా 7 భారీ యానిమేటెడ్ సినిమాలను రూపొందించేందుకు హోంబలే ఫిల్మ్స్ ప్లాన్ చేస్తోంది. క్లీం ప్రొడక్షన్స్‌తో కలిసి రూపొందిస్తున్న ఈ యూనివర్స్‌ను దర్శకుడు అశ్విన్ కుమార్ తెరకెక్కించబోతున్నారు. సహ నిర్మాతగా శిల్పా ధావన్ వ్యవహరిస్తుండగా, సినిమాలన్నీ భారతీయ ఆధ్యాత్మికతకు, పురాణాలకు తగ్గట్టుగా నిలవనున్నాయని మేకర్స్ స్పష్టం చేశారు.

2025 జూలై 25న మొదటి సినిమా 'మహావతార్ నరసింహ' విడుదల కానుంది. ఈ సినిమాను 3Dలో, ఐదు భారతీయ భాషల్లో గ్రాండ్‌గా విడుదల చేయనున్నారు. ప్రేక్షకులకు విశిష్టమైన విజువల్ అనుభూతిని అందించేందుకు అన్ని సాంకేతిక ప్రమాణాలు పాటించబోతున్నట్లు మేకర్స్ ప్రకటించారు. యానిమేషన్ ఫార్మాట్‌లో రాబోతున్న ఈ చిత్రాలు పిల్లలు, యువత, కుటుంబ ప్రేక్షకులందరికీ చేరువ కావాలని లక్ష్యంగా పెట్టుకున్నారు.

కేవలం సినిమాలకే పరిమితం కాకుండా, ఈ యూనివర్స్‌లో భాగంగా మహావతార్ కామిక్స్ పేరుతో 100 ఎడిషన్లు విడుదల కానున్నాయి. అదే సమయంలో 'మహావతార్ బ్రహ్మాండ' పేరుతో గేమ్స్ సిరీస్ కూడా తీసుకొస్తున్నట్లు తెలుస్తోంది. భారతీయ దేవతల ప్రాధాన్యాన్ని, వారి కథనాలను యువతకు సరికొత్త రూపంలో పరిచయం చేయడమే ఈ యూనివర్స్ ఉద్దేశమని అంటున్నారు.

ఈ యూనివర్స్‌లో రాబోయే సినిమాల వివరాలు ఇలా ఉన్నాయి:

2025 – మహావతార్ నరసింహ

2027 – మహావతార్ పరశురామ్

2029 – మహావతార్ రఘునందన్

2031 – మహావతార్ ద్వారకాధీశ్

2033 – మహావతార్ గోకులానంద

2035 – మహావతార్ కల్కి పార్ట్ 1

2037 – మహావతార్ కల్కి పార్ట్ 2