ఇది పర్ఫెక్ట్ రీ రిలీజ్ అంటే..

ఈ మధ్యకాలంలో చాలా సినిమాలు రీ రిలీజ్ చేస్తున్నారు. ఒకప్పుడు బ్లాక్ బస్టర్ హిట్లు అందుకున్న సినిమాలు మాత్రమే కాదు, సినిమాలో స్టోరీ బాగుండి , హిట్ కాని సినిమాలను సైతం రీ రిలీజ్ చేస్తున్నారు. ఇదొక ట్రెండ్ గా మారింది. ఇప్పటి వరకు చాలా మంది హీరోల సినిమాలు ప్రేక్షకుల ముందుకు వచ్చాయి. ఇప్పుడు ఈ సీక్వెన్స్ లోకి హీరో రానా కూడా వచ్చేస్తున్నారు.

రానా తన కెరీర్ లో చాలా రకాల సినిమాలు తీశారు. వాటన్నింటిలో లీడర్ సినిమా మాత్రం స్పెషల్ అని చెప్పాలి. రానా కెరీర్ లోనే ది బెస్ట్ మూవీ గా దీనిని చెప్పొచ్చు. రాజకీయ కోణంలో సాగే సినిమా ఇది. ఇలా కూడా సినిమా తీయొచ్చా అని అందరూ ఆశ్చర్యపోయేలా ఈ సినిమా తీశారు. అది కూడా ఎప్పుడూ లవ్ స్టోరీస్ లాంటి ఫీల్ గుడ్ మూవీలు తెరకెక్కించే శేఖర్ కమ్ముల ఈ సినిమాను తెరకెక్కించారు.

సీఎం స్థానంలో ఉన్న తండ్రి సడెన్ గా చనిపోవడంతో, ఆ ముఖ్యమంత్రి పదవిని ఆయన కొడుకు తీసుకోవాల్సి వస్తుంది. ఆ తర్వాత అతను ఎదుర్కొన్న పరిస్థితులు ఏంటి అనేది ఈ మూవీలో చూపించారు. ఈ పాత్రలో రానా ఒదిగిపోయాడు. చాలా చక్కగా సెటిల్డ్ గా నటించాడు. ఆ సమయంలో రిలీజ్ చేసినప్పుడు, థియేటర్ లలో పెద్దగా ఈ మూవీ రీచ్ అవ్వలేకపోయింది.

కానీ, ఈ మూవీ టీవీల్లో విడుదలైనప్పుడు మాత్రం విపరీతంగా చూశారు. టీఆర్పీ రేటింగ్ లు పగిలిపోయాయి. అయితే, ఇప్పుడు ఈ మూవీని రీ రిలీజ్ చేస్తున్నారు. అది కూడా తెలుగు రాష్ట్రాల్లో ఎన్నికల సమయంలో ప్లాన్ చేయడం విశేషం. వచ్చే ఏడాది తెలుగు రాష్ట్రాల్లో ఎన్నికలు జరగనున్నాయి. ఇంకా ఎన్నికలకు సమయం ఉన్నా, ఇప్పటి నుంచే పొలిటికల్ హీట్ మొదలైంది.

కాగా, అలాంటిది ఈ పాలిటిక్స్ తో సంబంధం ఉన్న ఈ సినిమాని ఎన్నికల సమయంలో విడుదల చేయాలని ప్లాన్ చేస్తుండటం హాట్ టాపిక్ గా మారింది. మరి, ఈ సినిమా రీ రిలీజ్ ఎన్నికలను ప్రభావితం చేస్తుందా..? ఈ సారి ఎంత కలెక్షన్ రాబడుతుందో చూడాలి.