AK 47 బాక్సాఫీస్.. అసలైన మండే పరిస్థితి ఇది!
| వీకెండ్‌లో కలెక్షన్లు పెరగడం ఒక ఎత్తయితే, సోమవారం నుంచి అదే జోరు కొనసాగించడం మరో ఎత్తు. ముఖ్యంగా త్రివిక్రమ్ లాంటి స్టార్ డైరెక్టర్ సినిమా విషయంలో ఈ ఛాలెంజ్ మరింత కీలకం.
వీకెండ్‌లో కలెక్షన్లు పెరగడం ఒక ఎత్తయితే, సోమవారం నుంచి అదే జోరు కొనసాగించడం మరో ఎత్తు. ముఖ్యంగా త్రివిక్రమ్ లాంటి స్టార్ డైరెక్టర్ సినిమా విషయంలో ఈ ఛాలెంజ్ మరింత కీలకం. వెంకటేష్ హీరోగా ఆయన తెరకెక్కించిన 'ఆదర్శ కుటుంబం హౌస్ నంబర్ 47' తొలి మూడు రోజులు బాక్సాఫీస్ వద్ద నిలకడగా వసూళ్లు సాధించింది. అయితే వీకెండ్ ముగిసిన తర్వాత పరిస్థితి పూర్తిగా మారిపోయింది. సోమవారం కలెక్షన్లతో ఈ సినిమా అసలు బాక్సాఫీస్ సత్తాపై మరింత క్లారిటీ వచ్చింది.
అక్టోబర్ 30న విడుదలైన ఈ చిత్రం అంచనా ప్రకారం మొదటి రోజు ఇండియా వైడ్ ట్రాకింగ్‌లో రూ.9.79 కోట్ల గ్రాస్ సాధించింది. శనివారం రూ.11 కోట్లు, ఆదివారం రూ.12.18 కోట్లకు వసూళ్లు పెరిగాయి. కానీ సోమవారం మాత్రం రూ.3.73 కోట్లతో సరిపెట్టుకోవాల్సి వచ్చింది. ఆదివారంతో పోలిస్తే దాదాపు 69 శాతం డ్రాప్ నమోదైంది. నాలుగు రోజుల మొత్తం ట్రాక్డ్ గ్రాస్ రూ.36.70 కోట్లకు చేరుకుంది.
నార్మల్ గా వీకెండ్ తర్వాత సోమవారం కలెక్షన్లు తగ్గడం ఆశ్చర్యం కాదు. అయితే ఇక్కడ డ్రాప్ ఎంత ఉందనేదే పాయింట్. ఆదివారం దాదాపు 49 శాతంగా ఉన్న థియేటర్ ఆక్యుపెన్సీ సోమవారం 19.5 శాతానికి పడిపోయింది. మొదటి రోజు రూ.9.79 కోట్లు రాగా, నాలుగో రోజు అందులో సగం కూడా రాలేదు. అంటే వీకెండ్‌లో సినిమాను చూసేందుకు వచ్చిన ప్రేక్షకుల సంఖ్యతో పోలిస్తే వర్కింగ్ డేలో థియేటర్లకు వచ్చే వాళ్లు బాగా తగ్గిపోయారు.
ఇప్పటికే ఈ సినిమా విషయంలో త్రివిక్రమ్ మీద పెట్టుకున్న అంచనాల స్థాయిలో రెస్పాన్స్ లేదనే అభిప్రాయం వ్యక్తమవుతోంది. వెంకటేష్‌తో ఆయన కాంబినేషన్ అనగానే ఫ్యామిలీ ఎంటర్టైన్మెంట్‌కు మంచి ఆదరణ ఉంటుందని భావించారు. కానీ విడుదల తర్వాత వచ్చిన టాక్, కలెక్షన్లను చూస్తే ఆ స్థాయిలో ఊపు కనిపించడం లేదు. అలాగని నాలుగు రోజుల నంబర్లతోనే సినిమాను డిజాస్టర్‌గా తేల్చేయడం కూడా తొందరపాటే. దీపావళి వరకు లెక్క మారుతుందేమో చూడాలి.
మరోవైపు వెంకటేష్ గత చిత్రం 'సంక్రాంతికి వస్తున్నాం'తో పోలిక కూడా తప్పడం లేదు. ఆ సినిమా సంక్రాంతి సెలవులను ఉపయోగించుకుని ఫ్యామిలీ ఆడియన్స్‌ను భారీగా థియేటర్లకు రప్పించింది. అనిల్ రావిపూడి మార్క్ కామెడీ కూడా వసూళ్లకు బాగా కలిసొచ్చింది. ఇప్పుడు త్రివిక్రమ్ కాంబినేషన్ కు అదే బజ్ వస్తుందని అనుకుంటే అలాంటి స్పందన కనిపించడం లేదు. రెండు సినిమాల రిలీజ్ సీజన్లు వేరు కావడంతో కలెక్షన్లను నేరుగా పోల్చలేం. కానీ ఫ్యామిలీ ఆడియన్స్ నుంచి వస్తున్న ఆదరణలో తేడా మాత్రం కనిపిస్తోంది. ఇక మంగళ, బుధవారాల కలెక్షన్లు ఈ సినిమాకు మరింత కీలకం కానున్నాయి. సోమవారం స్థాయిలోనైనా వసూళ్లు నిలబడతాయా, లేక మరింత తగ్గుతాయా అనేది చూడాలి.