అబ్బవరం డైలాగ్స్ తో DJ మిక్స్.. ఇది 'K-ర్యాంప్' వైబ్!

తన సినిమాలను జనాల్లోకి తీసుకెళ్లడంలో యంగ్ హీరో కిరణ్ అబ్బవరం స్టైలే వేరు. రొటీన్ ప్రమోషన్లకు భిన్నంగా, నేటితరం యువతకు కనెక్ట్ అయ్యేలా కొత్త కొత్త ట్రెండ్ లో ప్రయత్నిస్తుంటాడు. ఇప్పుడు తన లేటెస్ట్ మూవీ "K-ర్యాంప్" విషయంలోనూ అదే ట్రెండ్‌ను ఫాలో అవుతూ, సినిమాపై ఒకరకమైన క్యూరియాసిటీని క్రియేట్ చేస్తున్నాడు. అతను ఎంచుకున్న ఈ కొత్త ప్రమోషనల్ స్ట్రాటజీ ఇప్పుడు సోషల్ మీడియాలో హాట్ టాపిక్‌గా మారింది.

గతంలో తన కెరీర్‌కు మంచి బూస్ట్ ఇచ్చిన "ఎస్ఆర్ కల్యాణమండపం" సినిమాకు పాటలతో డీజే మిక్స్ చేసి, దాన్ని గట్టిగా వైరల్ చేశాడు. ఇప్పుడు అదే ఫార్ములాను "K-ర్యాంప్"కు కూడా అప్లై చేస్తున్నాడు. సినిమా టీజర్, ట్రైలర్‌లోని పవర్‌ఫుల్, క్యాచీ డైలాగ్స్‌ను తీసుకుని, వాటికి బీట్స్ జోడించి ఒక డీజే మిక్స్‌ను వదిలాడు. ఈ డీజే మిక్స్ యూత్‌ను బాగా ఆకట్టుకుంటూ, సినిమాపై ఒక స్పెషల్ వైబ్‌ను క్రియేట్ చేస్తోంది.

డైలాగులు పదే పదే వినపడటం ద్వారా, సినిమాలోని కంటెంట్ ఆడియన్స్‌కు సులభంగా రిజిస్టర్ అవుతోంది. కిరణ్ అబ్బవరం బలం యూత్, మాస్ ఆడియన్స్. అందుకే, వాళ్లకు నచ్చే కంటెంట్‌తోనే ప్రమోషన్స్ ప్లాన్ చేస్తున్నాడు. సాధారణ ఇంటర్వ్యూలు, ప్రెస్ మీట్ల కంటే, ఇలాంటి ట్రెండీ కంటెంట్ సినిమాకు ఎక్కువ మైలేజ్ ఇస్తుందని నమ్ముతున్నాడు. ఈ డీజే మిక్స్ ఐడియా కూడా అందులో భాగమే. ఇది సినిమాలోని యాటిట్యూడ్‌ను, హీరో క్యారెక్టరైజేషన్‌ను నేరుగా ప్రేక్షకుల్లోకి తీసుకెళ్తోంది.

ఇక సినిమా విషయానికొస్తే, "K-ర్యాంప్" చిత్రాన్ని ప్రముఖ నిర్మాణ సంస్థలు హాస్య మూవీస్, రుద్రాంశ్ సెల్యులాయిడ్ బ్యానర్లపై రాజేష్ దండ, శివ బొమ్మకు సంయుక్తంగా నిర్మిస్తున్నారు. జైన్స్ నాని దర్శకత్వం వహిస్తున్న ఈ చిత్రంలో యుక్తి తరేజా హీరోయిన్‌గా నటిస్తోంది. దీపావళి పండుగ కానుకగా ఈ నెల 18న సినిమా గ్రాండ్‌గా థియేటర్లలోకి రానుంది.

ప్రమోషన్ల పరంగా మేకర్స్ ప్లాన్స్, కిరణ్ ఐడియాలు క్రియేటివ్‌గా ఉన్నాయనడంలో సందేహం లేదు. యూత్‌ను టార్గెట్ చేస్తూ వేస్తున్న అడుగులు కరెక్ట్‌గానే ఉన్నాయి. అయితే, ఎంత మంచి ప్రమోషన్ అయినా ప్రేక్షకులను థియేటర్లకు మొదటి రోజు రప్పించడానికి మాత్రమే ఉపయోగపడుతుంది. సినిమా విజయం పూర్తిగా దానిలోని కంటెంట్‌పైనే ఆధారపడి ఉంటుంది.

మొత్తం మీద, "K-ర్యాంప్" టీమ్ ఒక తెలివైన ప్రచార వ్యూహంతో ముందుకు వెళ్తోంది. మరి ఈ డీజే మిక్స్‌లు, ట్రెండీ ప్రమోషన్స్ సినిమాకు మంచి ఓపెనింగ్స్ తీసుకురావడంలో ఎంతవరకు సహాయపడతాయో చూడాలి.