ఆయన ఎంట్రీ తో రూ.45 కోట్ల నుంచి రూ.95 కోట్లకి..!

బాలీవుడ్‌ లో ఒకప్పుడు వెలుగు వెలిగిన స్టార్‌ హీరో సన్నీ డియోల్ అనడంలో సందేహం లేదు. అయితే గత దశాబ్ద కాలంగా సన్నీ డియోల్‌ సినిమాలు ఇలా వచ్చి అలా వెళ్లి పోతూ ఉండేవి. దాంతో చాలా మంది సన్నీ డియోల్‌ గురించి మాట్లాడుకోవడం మానేశారు.. ఆయన సినిమాలు చూడటం మానేశారు. అలాంటి సమయంలో వచ్చిన 'గదర్‌ 2' సినిమా మొత్తం పరిస్థితిని మార్చేసింది.

సన్నీ డియోల్‌ గదర్‌ 2 సినిమా వందల కోట్ల వసూళ్లు నమోదు చేయడంతో మళ్లీ బాలీవుడ్ లో ఆయన సందడి మొదలైంది. ఒకటి కాదు రెండు కాదు ఏకంగా అయిదు సినిమాలకు సన్నీ డియోల్‌ కమిట్ అయ్యాడని తెలుస్తోంది. మొన్నటి వరకు పది నుంచి పదిహేను కోట్ల రూపాయల పారితోషికం తీసుకున్న సన్నీ డియోల్‌ ఇప్పుడు అయిదు నుండి పది రెట్లు పారితోషికం అందుకుంటున్నాడట.

తాజాగా అమీర్ ఖాన్‌ నిర్మాతగా రాజ్ కుమార్ సంతోషి దర్శకత్వం లో సన్నీ డియోల్‌ ఒక భారీ సినిమాను రూపొందించేందుకు గాను ఏర్పాట్లు చేస్తున్నాడు. ఈ సినిమా ఇటీవల ఖరారు అయింది. షూటింగ్ ఇంకా ప్రారంభం కాలేదు. అయినా కూడా ఈ సినిమాకు ఉన్న క్రేజ్‌ నేపథ్యం లో ప్రముఖ ఓటీటీ ఈ సినిమా ను ఏకంగా రూ.95 కోట్లకు కొనుగోలు చేసేందుకు ముందుకు వచ్చిందట.

సాధారణంగా అయితే 45 నుంచి 50 కోట్ల రూపాయలు ఓటీటీ రైట్స్ పలికితే గొప్ప విషయం. అలాంటిది సన్నీ డియోల్‌ మూవీ, ఆమీర్ ఖాన్‌ నిర్మాత అవ్వడం వల్ల జిస్నే లాహోర్‌ నహీ దేఖా సినిమా కి ఏకంగా 95 కోట్ల డీల్ వచ్చినట్లు తెలుస్తోంది. సినిమా ఇంకా ప్రారంభం కాలేదు కనుక డీల్ క్లోజ్ చేయలేదు. ముందు ముందు మరింత ఈ మొత్తం పెరిగినా ఆశ్చర్యం లేదు.

సన్నీడియోల్‌, రాజ్‌ కుమార్ సంతోషి కాంబోలో మూడు సూపర్‌ హిట్ సినిమాలు వచ్చాయి. కొన్ని కారణాల వల్ల పాతికేళ్లుగా వీరిద్దరి కాంబోలో సినిమా రాలేదు. ఇన్నాళ్ల తర్వాత వీరి కాంబో లో మూవీగా జిస్నే లాహోర్‌ నహీ దేఖా రాబోతున్న నేపథ్యం లో విపరీతమైన క్రేజ్ ఉంది. పైగా అమీర్ ఖాన్ నిర్మాత అవ్వడం వల్ల అంచనాలు రెట్టింపు అయ్యాయి. అందుకే ఓటీటీ రేటు ఆకాశమే హద్దు అన్నట్లుగా ఉంది. ముందు ముందు భారీ డీల్స్‌ తో ఈ సినిమా రికార్డులు సృష్టించే అవకాశాలు కనిపిస్తున్నాయి.