ఆమె ధ్యాస మొత్తం తిండిపైనే- సాయి మార్తాండ్

టాలీవుడ్‌లో వైవిధ్యమైన కథలతో తనకంటూ ఒక ప్రత్యేక గుర్తింపు తెచ్చుకున్న నటుడు సుహాస్. 'కలర్ ఫోటో', 'రైటర్ పద్మభూషణ్' సినిమాలతో ప్రేక్షకులను మెప్పించిన యంగ్ హీరో ఇప్పుడు 'హే భగవాన్' అంటూ మన ముందుకు వస్తున్నాడు. ముఖ్యంగా 'అంబాజీపేట మ్యారేజీ బ్యాండు'లో సుహాస్‌తో జంటగా నటించి మెప్పించిన శివానీ నాగారం మరోసారి ఇందులో హీరోయిన్‌గా నటిస్తుండటంతో అంచనాలు పెరిగాయి.

తాజాగా జరిగిన టీజర్ లాంచ్ ఈవెంట్ సినిమాపై ఆసక్తిని పెంచడమే కాకుండా, సెట్స్‌లో జరిగిన కొన్ని తమాషా ముచ్చట్లను కూడా బయటపెట్టారు చిత్ర యూనిట్. వివరాలు ఇలా వున్నాయి..

ఈవెంట్‌లో నవ్వులు పూయించిన సాయి మార్తాండ

ఈ సినిమా టీజర్ లాంచ్ ఈవెంట్ చాలా సరదాగా సాగింది. ఈ సందర్భంగా ప్రముఖ ఎడిటర్ సాయి మార్తాండ్ మాట్లాడుతూ హీరోయిన్ శివానీ నాగారం గురించి ఒక ఆసక్తికరమైన విషయాన్ని బయటపెట్టారు. "శివాని ఎప్పుడూ సెట్స్‌లో డైరెక్టర్లతో సినిమా గురించి కంటే ఎక్కువగా ఫుడ్ గురించే మాట్లాడుతుంటుంది. ఫుడ్ ఎక్కడ బాగుంటుందో తానే అందరికి చెబుతుంది" అంటూ ఆటపట్టించారు. ఆమెకు భోజనం అంటే ఎంత ఇష్టమో, షూటింగ్ గ్యాప్‌లో ఆమె చేసే హడావిడి ఎలా ఉంటుందో చెబుతూ నవ్వులు పూయించారు. ఇక శివాని కూడా ఈవెంట్ లో ఈ మాటలకు నవ్వుతూ కనిపించింది. ఇది చూస్తుంటే సినిమా యూనిట్ అంతా ఒక కుటుంబంలా కలిసి పనిచేసిందని అర్థమవుతోంది.

సుహాస్‌కు హిట్ పడేనా? :

ఇక సుహాస్ గత ఏడాది రెండు మూడు చిత్రాలు చేసినప్పటికీ, బాక్సాఫీస్ వద్ద ఆశించిన స్థాయిలో హిట్లు అందుకోలేకపోయాడు. అందుకే ఈ 'హే భగవాన్' చిత్రం అతనికి చాలా కీలకంగా మారింది. గతేడాది 'అంబాజీపేట మ్యారేజీ బ్యాండు'లో సుహాస్-శివాని జంటకు మంచి మార్కులే పడ్డాయి. వీరిద్దరి మధ్య ఉన్న స్క్రీన్ ప్రెజెన్స్ మరియు కెమిస్ట్రీ మరోసారి ఈ సినిమాలో హైలైట్ కానుంది. తాజాగా విడుదలైన టీజర్ చూస్తుంటే, ఇదొక కామెడీ , ఎమోషనల్ చిత్రమని స్పష్టమవుతోంది. ఈ టీజర్ గ్లింప్స్‌తో పాటు మూవీ రిలీజ్ డేట్‌ను కూడా మేకర్స్ ప్రకటించడంతో అభిమానులు సుహాస్ కమ్ బ్యాక్ కోసం ఆసక్తిగా ఎదురుచూస్తున్నారు.

మొత్తానికి 'హే భగవాన్' సినిమాతో సుహాస్ మరియు శివాని నాగారం జోడీ మరోసారి మ్యాజిక్ చేయడానికి సిద్ధమయ్యారు. ఈ మూవీ ఫిబ్రవరి 20 న ప్రేక్షకుల ముందుకు రానుంది. ఒకవైపు సాయి మార్తాండ్, మరోవైపు సుహాస్ నటనపై ఉన్న నమ్మకం ఈ సినిమాపై పాజిటివ్ వైబ్‌ను క్రియేట్ చేస్తున్నాయి. గత పరాజయాలను మర్చిపోయి, ఈ చిత్రంతో సుహాస్ కచ్చితంగా సక్సెస్ ట్రాక్ ఎక్కుతాడని చిత్ర బృందం ధీమా వ్యక్తం చేస్తోంది. మరి ఈ మూవీ కోసం అభిమానులు అంతే ఎదురుచూస్తున్నారు..