స్టార్ హీరోలకు విలన్ బలం.. బాబీ డియోల్ సక్సెస్ ఫార్ములా అదే?

పాన్ ఇండియా సినిమాల యుగంలో ప్రేక్షకుల అంచనాలు పూర్తిగా మారిపోయాయి. ఒకప్పుడు కథ మొత్తం హీరో చుట్టూనే తిరిగేది. కానీ ఇప్పుడు పరిస్థితి భిన్నంగా కనిపిస్తోంది. భారీ యాక్షన్ సినిమాల్లో హీరో ఎంత బలంగా కనిపిస్తాడో, అతణ్ని ఎదుర్కొనే విలన్ కూడా అంతే ప్రభావవంతంగా ఉండాలనే ట్రెండ్ బలపడింది. స్టైలిష్ లుక్, తక్కువ డైలాగులు, స్క్రీన్‌పై కనిపించిన ప్రతిసారి డేంజ‌ర‌స్ ఇంపాక్ట్ ఇచ్చే విల‌న్‌లకే డైరెక్ట‌ర్లు ప్రాధాన్యం ఇస్తున్నారు.

ఈ మార్పును బాగా ఉపయోగించుకున్న నటుల్లో బాబీ డియోల్ పేరు ముందువరుసలో నిలుస్తోంది. ఒకప్పుడు బాలీవుడ్‌లో రొమాంటిక్ హీరోగా గుర్తింపు పొందిన ఆయన, ఇప్పుడు పాన్ ఇండియా యాక్షన్ సినిమాల్లో పవర్‌ఫుల్ విలన్‌గా కొత్త ఇమేజ్‌ను సొంతం చేసుకున్నారు. ఎక్కువ డైలాగ్స్ లేక‌పోయినా, కేవలం స్క్రీన్ ప్రెజెన్స్‌తోనే టెన్షన్‌ను క్రియేట్ చేసే అత‌ని యాక్టింగ్ ఆడియ‌న్స్ ను ఆకట్టుకుంటోంది. దీంతో డైరెక్ట‌ర్లు కూడా బాబీని భారీ ప్రాజెక్టులకు కీలక ఎంపికగా చూస్తున్నారు.

ఇటీవలి కాలంలో ఆడియ‌న్స్ కూడా హీరో స‌క్సెస్‌ను విలన్ బలంతోనే కొలుస్తున్నారు. విల‌న్ ఎంత డేంజ‌ర‌స్ గా కనిపిస్తే, హీరో స‌క్సెస్ అంత గొప్పగా అనిపిస్తుందనే అభిప్రాయం ఇండస్ట్రీలో బలపడుతోంది. అందుకే భారీ బడ్జెట్ సినిమాల్లో విలన్ క్యారెక్ట‌ర్ కోసం స్పెష‌ల్ గా స్టార్‌ల‌ను సెలెక్ట్ చేయ‌డం ఎక్కువ‌గా జ‌రుగుతోంది. ఇది బాక్సాఫీస్ రిజ‌ల్ట్స్ పైనా సానుకూల ప్రభావం చూపుతోందని ట్రేడ్ వర్గాలు విశ్లేషిస్తున్నాయి. ఈ మార్పు బాబీ డియోల్ బ్రాండ్ వాల్యూను కూడా గణనీయంగా పెంచింది. సోషల్ మీడియాలో ఆయనకున్న ఆదరణ, పాన్ ఇండియా స్థాయిలో ఏర్పడిన గుర్తింపు, వరుసగా వస్తున్న భారీ ప్రాజెక్టులు ఆయన కమర్షియల్ డిమాండ్‌ను మరింత పెంచాయి. దీంతో ఆయన బాలీవుడ్‌కే పరిమితమ‌వ‌కుండా, అన్ని భాషల ఆడియ‌న్స్ కు చేరువైన నటుడిగా తన స్థానాన్ని బలపరుచుకుంటున్నారు.

ఇదిలా ఉంటే, రీసెంట్ గా ఓ ఇంటర్వ్యూలో బాబీ డియోల్ చేసిన ఓ ఫ‌న్నీ కామెంట్ చర్చనీయాంశంగా మారింది. తాను సౌత్ లో కలిసి పనిచేసిన కొందరు స్టార్ హీరోలు తర్వాత పాలిటిక్స్ లో కీలక నాయకులుగా ఎదిగారని, త‌న‌తో క‌లిసి వ‌ర్క్ చేసిన హీరోలు.. మంత్రులు, ముఖ్యమంత్రుల స్థాయికి చేరుకున్నార‌ని న‌వ్వుతూ గుర్తు చేసుకున్నారు. విజయ్, నందమూరి బాలకృష్ణ, పవన్ కళ్యాణ్ వంటి ప్రముఖులతో కలిసి పనిచేసిన అనుభవాన్ని గుర్తు చేసుకుంటూ బాబీ చేసిన ఈ కామెంట్ సోషల్ మీడియాలో వైరలవుతోంది.

హీరోగా కెరీర్ ను మొద‌లుపెట్టి, ఇప్పుడు పాన్ ఇండియా సినిమాలకు బలమైన విలన్‌గా మారడం ద్వారా ఆయన తన సెకండ్ ఇన్నింగ్స్‌ను స‌క్సెస్‌ఫుల్ గా నిర్మించుకున్నారు. ప్రస్తుతం భారీ యాక్షన్ సినిమాల‌కు అవసరమైన స్టైలిష్, సైలెంట్, పవర్‌ఫుల్ విలన్ అనే కొత్త ఫార్ములాకు బాబీ డియోల్ ఒక మెయిన్ ఎగ్జాంపుల్ గా నిలుస్తున్నారని సినీ విశ్లేషకులు అభిప్రాయపడుతున్నారు.