షారుఖ్ చేసిన గాయానికి సల్మాన్ మందు

యశ్ రాజ్ ఫిలిమ్స్.. బాలీవుడ్లో నెంబర్ వన్ నిర్మాణ సంస్థ. ఆ సంస్థకున్నంత సక్సెస్ రేట్ ఇండియాలో ఇంకే ప్రొడక్షన్ కంపెనీకీ లేదు. యశ్ చోప్రా మొదలుపెట్టి విజయవంతంగా నడిపించిన ఈ సంస్థను ఆయన తనయుడు ఆదిత్య చోప్రా మరింత గొప్ప స్థాయికి తీసుకెళ్లాడు. కొన్నేళ్లుగా ఆ సంస్థ పట్టిందల్లా బంగారమే అవుతోంది. చిన్న సినిమాలతో పాటు బడా ప్రాజెక్టులు సైతం ఆ సంస్థకు కాసుల వర్షం కురిపిస్తున్నాయి. ఐతే ఈ ఏడాది వేసవిలో మాత్రం యశ్ రాజ్ ఫిలిమ్స్ కు గట్టి షాక్ తగిలింది. షారుఖ్ ఖాన్ లాంటి బడా స్టార్ తో ఆ సంస్థ తెరకెక్కించిన ‘ఫ్యాన్’ అంచనాలకు భిన్నంగా ఫ్లాప్ అయింది. దీనికిముందు షారుఖ్ ఫ్లాప్ సినిమా ‘దిల్ వాలే’ రూ.150 కోట్లకు పైగా వసూళ్లు రాబట్టింది.

కానీ ‘ఫ్యాన్’ సినిమా పాజిటివ్ టాక్ తెచ్చుకుని కూడా రూ.80 కోట్లకు పరిమితమైంది. ఈ సినిమాకు జరిగిన బిజినెస్ ప్రకారం చూస్తే ఇది పెద్ద డిజాస్టర్ కిందే లెక్క. బయ్యర్లకు యశ్ రాజ్ ఫిలిమ్స్ డబ్బులు వెనక్కివ్వాల్సిన పరిస్థితి తలెత్తింది. ఐతే ఆ సినిమాకు జరిగిన నష్టాన్ని ‘సుల్తాన్’ పూడ్చేయడమే కాదు.. భారీగా లాభాలు మిగులుస్తోంది. యశ్ రాజ్ ఫిలిమ్స్ బేనర్లోనే ‘సుల్తాన్’ అతి పెద్ద హిట్ గా నిలవబోతోంది. రూ.70 కోట్ల బడ్జెట్ తో తెరకెక్కిన ఈ సినిమా ఇప్పటికే రూ.200 కోట్లకు పైగా వసూళ్లు రాబట్టింది. ఫుల్ రన్లో ఈ సినిమా రూ.600 కోట్లకు పైనే వసూలు చేస్తుందని అంచనా వేస్తున్నారు. మొత్తానికి షారుఖ్ యశ్ రాజ్ ఫిల్మ్స్ బేనర్ కు చేసిన గాయానికి సల్మాన్ మందు వేశాడన్నమాట.