దాంపత్య జీవితంలోకి ట్రాన్స్ ఉమెన్.. ప్రేమికుడితో పెళ్లి!

ట్రాన్స్‌వుమెన్, మళయాల సినీ పరిశ్రమలో నటి అయిన‌ ఎలిజబెత్‌ హరిణి చందన దాంపత్య జీవితంలోకి అడుగు పెట్టారు. తాను ప్రేమిస్తున్న సునీష్ అనే వ్యక్తితో వేదమంత్రోచ్ఛరణల నడుమ ఏడడుగులు నడిచారు. కేరళ రాష్ట్రంలోని ఎర్నాకుళం జిల్లాలోని బీటీహెచ్‌ హాల్‌లో ఈ పెళ్లి జరిగింది. ఈ వేడుకకు రెండు కుటుంబాల సభ్యులు, అత్యంత సన్నిహితులు మాత్రమే హాజరయ్యారు.

ఎలిజబెత్ తల్లి స్థానంలో ట్రాన్స్‌జెండర్‌ రెంజు రెంజిమార్‌ నిలబడి ఈ వివాహ కార్యక్రమాన్ని పూర్తిచేశారు. ఎలిజబెత్‌ను పెళ్లి కూతురిని చేయడం మొదలు.. అప్పగింతల వరకు అన్ని కార్యక్రమాలను ఆమె దగ్గరుండి చూసుకున్నారు. పెళ్లి అనంతరం ఫొటోలను సోషల్‌ మీడియాలో షేర్‌ చేసిన ఆమె.. "తల్లిగా నా బాధ్యతలను పూర్తి చేశాను. నా చేతుల మీదుగా కూతురి పెళ్లి చేశాను. భగవంతుడికి కృతజ‍్క్షతలు" అని రాశారు. ప్రస్తుతం ఈ ఫొటోలు సోషల్ మీడియాలో వైరల్ గా మారాయి.

కాగా.. కుంబలంగికి చెందిన ఎలిజబెత్ 17 ఏళ్ల వయసులో సర్జరీ చేయించుకుని అమ్మాయిగా మారారు. ఆ తర్వాత 2017లో కొచ్చిలో జరిగిన ట్రాన్స్‌జెండర్‌ అందాల పోటీలో ఆమె సెకండ్‌ రన్నరప్‌గా నిలిచి అందరి దృష్టినీ ఆకర్షించారు.

ఆ తర్వాత సినీ పరిశ్రమలోకి కూడా ప్రవేశించారు. 'దైవత్తింటే మనవట్టి' అనే మలయాళ హిట్‌ చిత్రంలో ప్రధాన పాత్రలో నటించారు ఎలిజబెత్ హరిణి చందన. ఇందులో నటుడు జయసూర్య ముఖ్యపాత్రలో కనిపించారు. ట్రాన్స్ ఉమెన్ గా మారి, సినిమాల్లో నటించడమే కాకుండా.. వైవాహిక జీవితంలోకీ ప్రవేశించిన ఎలిజబెత్ కు అందరూ శుభాకాంక్షలు తెలియజేస్తున్నారు.