క్రియేటివిటీతో కుమ్మేస్తున్న సిద్ధు
టాలీవుడ్ వదిలేసి సొంతగడ్డకు వెళ్లిపోయిన సిద్ధార్థ్.. కోలీవుడ్ లో తన టేస్టుకు తగ్గట్లు మంచి మంచి సినిమాలే చేస్తున్నాడు. గత రెండు మూడేళ్లలో సిద్ధు చేసిన సినిమాలన్నీ కమర్షియల్ గా, క్రిటికల్ గా మంచి ఫలితం సాధించాయి. ఈ ఊపులో సిద్ధు స్వీయ నిర్మాణంలో ధీరజ్ వైద్య అనే కొత్త దర్శకుడితో తీసిన సినిమా ‘జిల్ జంగ్ జక్’. చడీచప్పుడు లేకుండా షూటింగ్ పూర్తి చేసుకున్న ఈ సినిమాకు సంబంధించి ఫస్ట్ లుక్ ను నెల రోజుల ముందు సడెన్ గా రిలీజ్ చేశాడు సిద్ధు.
ఇక అప్పట్నుంచి గత నెల రోజులుగా ‘జిల్ జంగ్ జక్’ టాక్ ఆఫ్ ద సౌత్ ఇండియా అవుతోంది. పోస్టర్లు - టీజర్ - ట్రైలర్ అన్నీ కూడా చాలా క్రియేటివ్ గా ఉండి సినిమా మీద విపరీతమైన క్యూరియాసిటీ పెంచేస్తున్నాయి. ఈ మధ్యే సల్మాన్ ఖాన్ ‘జిల్ జంగ్ జక్’లోని ‘షూట్ ద కురివి’ అనే వీడియో సాంగ్ రిలీజ్ చేశాడు. ఈ పాటను సిద్దుతో కలిసి మ్యూజిక్ డైరెక్టర్ అనిరుధ్ పాడాడు. ఈ పాట యూట్యూబులో సెన్సేషన్ క్రియేట్ చేస్తోంది. ఆ పాట పాడిన తీరు, చిత్రీకరణ, అందులో స్టెప్స్.. అన్నీ కూడా చాలా ఇంట్రెస్టింగ్ గా ఉన్నాయి. వేరే భాషల వాళ్లకు కూడా ఈ పాట ఇన్ స్టంట్ గా ఎక్కేస్తోంది. సోషల్ మీడియాను బేస్ చేసుకుని సిద్ధు క్రియేటివ్ ప్రమోషన్ తో సినిమా మీద జనాల్లో అంతకంతకూ ఆసక్తి పెంచుతున్నాడు. డిసెంబరు 25న సినిమా వచ్చేలోపు మరింతగా ‘జిల్ జంగ్ జక్’ను ప్రమోట్ చేయబోతున్నాడు సిద్ధు. ఈ సినిమాను తెలుగులో కూడాా రిలీజ్ చేయబోతున్నాడతను.