సౌత్ ఇండియన్ రెమ్యూనరేషన్ క్వీన్ ఆమే..

హీరోయిన్ 30 ప్లస్ లోకి పడిందంటే ఇక ఆమె కథ ముగిసినట్లే అనుకుంటారు మామూలుగా. కానీ నయనతార మాత్రం ఇందుకు భిన్నం. 32 ఏళ్ల వయసులోనూ ఆమె జోరు మామూలుగా లేదు. వరుస హిట్లతో దూసుకెళ్లిపోతోంది ఈ మలయాళ కుట్టి. దాదాపు అరడజను క్రేజీ ప్రాజెక్టులు ఆమె చేతిలో ఉన్నాయి. హీరోల్లాగా సినిమాను తన భుజాల మీద మోయగల సత్తా ఆమె సొంతం. అందుకే ఆమె ప్రధాన పాత్రలో లేడీ ఓరియెంటెడ్ మూవీస్ కూడా వరుస కడుతుున్నాయి. ఈ చిత్రాలకు ఆమె పారితోషకం కూడా భారీగానే ఉంటోంది. సౌత్ ఇండియలో మరే కథానాయికా అందుకోని రెమ్యూనరేషన్ మార్కును నయనతార అందుకుంది.

‘ఈనాడు’ ఫేమ్ చక్రి తోలేటి దర్శకత్వంలో యువన్ శంకర్ రాజా నిర్మించనున్న హార్రర్ థ్రిల్లర్ ‘కోలైయుదిర్ కాలం’ సినిమాకు నయనతార ఏకంగా రూ.3 కోట్ల పారితోషకం తీసుకుంటోందట. సౌత్ ఇండియాలో ఇప్పటిదాకా ఎవరూ 3 కోట్ల మార్కును టచ్ చేయలేదు. ‘బిల్లా’ సినిమాకు రూ.1.5 కోట్ల మార్కును అందుకుని అప్పట్లో రికార్డు సృష్టించిన నయన్.. ఆ తర్వాత రూ.2 కోట్లు.. రూ.2.5 కోట్ల మార్కును కూడా తనే బ్రేక్ చేసింది. ఇప్పుడు ఏకంగా రూ.3 కోట్లు తీసుకుంటోంది. గత ఏడాది నయన్ నటించిన హార్రర్ మూవీ ‘మయూరి’ సూపర్ హిట్ కావడంతో నయన్ ను నమ్ముకుని ఈజీగా రూ.10 కోట్లు పెట్టేసి లేడీ ఓరియెంటెడ్ సినిమాలు చేయడానికి రెడీ అయిపోతున్నారు నిర్మాతలు. నయన్ వాటా కూడా అందుకు తగ్గట్లే భారీగా ఉంటోంది.

Like Us on Facebook : https://www.facebook.com/Tupakidotcom/