ఊరించి ఉసూరుమనిపించిన నాగార్జున

బిగ్‌ బాస్‌ క్రియేటివ్‌ థాట్‌ మరోసారి తుస్సుమన్నది. కొన్ని రోజుల ముందు అఖిల్‌ ను బిగ్‌ బాస్‌ సీక్రెట్‌ రూంలోకి పంపించడం జరిగింది. అక్కడ నుండి అన్ని చూస్తూ వస్తున్న అఖిల్‌ కు నిన్నటి ఎపిసోడ్‌ లో నాగార్జున చుక్కలు చూపించాడు. నీవు అనుకున్నట్లుగా బయటకు ఇంట్లోకి వెళ్లడం లేదు. నువ్వు బయటకు వెళ్లాలి.. బ్యాగ్‌ సర్దేసుకుని ఇంట్లోకి వెళ్లి ఇంటి సభ్యులకు సెండాఫ్‌ ఇచ్చేసి సెల్ఫీ తీసుకుని బయటకు వచ్చేసెయ్‌ అంటూ నాగార్జున చెప్పగానే అఖిల్‌ చాలా ఏడ్చేశాడు. కాని ప్రేక్షకులు మాత్రం గత అనుభవాల దృష్టిలో అఖిల్‌ ఖచ్చితంగా ఇంట్లోనే ఉంటాడు. అతడు ఫైనల్‌ వరకు ఉంటాడు అనుకున్నారు. మరో వైపు అభిజిత్‌ అభిమానులు మాత్రం అఖిల్‌ బయటకు వెళ్లి పోవడంపై ఆనందం వ్యక్తం చేశారు.

అఖిల్‌ ఇంట్లోకి రాగానే ఇంటి సభ్యులు కొందరు చాలా ఆనందం వ్యక్తం చేయగా మరి కొందరు మాత్రం సో సో రియాక్షన్‌ లు ఇచ్చారు. బిగ్‌ బాస్‌ ఆదేశాల మేరకు సెల్ఫీ తీసుకుని అఖిల్‌ ను పంపించండి అంటూ ఆదేశించిన సమయంలో అంతా ఆశ్చర్యపోయారు. అదేంటి అంటూ నోరు వెళ్లబెట్టారు. ఇది సరైన నిర్ణయం కాదు అంటూ అరియానా కాస్త సీరియస్‌గానే అన్నది. అఖిల్‌ వెళ్తాడు అంటూ అభిజిత్‌ అభిమానులు హమ్మయ్య అనుకుంటూ ఉండగా అనూహ్యంగా అఖిల్‌ వెళ్లడం లేదు ఉంటున్నాడు అంటూ నాగార్జున చెప్పడంతో ఉసూరుమన్నారు. తెలుగు బిగ్‌ బాస్‌ లో ఇలాంటి ఉసూరుమనిపించే ఎపిసోడ్‌ లు చాలా ఉన్నాయి. తాజాగా మరోసారి అలాంటిదే ఇది కూడా అంటూ ప్రేక్షకులు పెదవి విరుస్తున్నారు.