అంతా నానియే చేశాడు

మహానటి మూవీ విషయంలో.. అంతా నాని కారణంగానే జరిగింది అంటోంది మలయాళీ భామ కీర్తి సురేష్. అసలు మహానటి మూవీకి నానికి సంబంధం లేదు కానీ.. ఈ ప్రాజెక్టులోకి కీర్తి ఎంట్రీకి మాత్రం కారణం నానినే అని స్వయంగా చెప్పింది ఆ భామ. మహానటి ప్రాజెక్టు ప్రారంభానికి ముందు చాలా కాలం నుంచే చర్చలు జరుగుతున్నా.. ఈ ప్రాజెక్టు గురించి కనీస సమాచారం కూడా ఈమె దగ్గర లేదట.

కానీ ఒకానొక టైంలో.. సావిత్రిగా నువ్వు నటిస్తే బాగుంటుందంటూ నాని ప్రపోజల్ పెట్టాడట. అస్సలు కుదరనే కుదరదని.. తాను చేయబోనని అనేసిందట కీర్తి. ఆ తర్వాత ప్రొడ్యూసర్ స్వప్నతో కలిసి నాని మరోసారి వచ్చి ఇదే విషయాన్ని చెప్పుకొచ్చాడట. అప్పటికీ సావిత్రి పాత్రను తాను చేయడం అనే ఆలోచననే నమ్మలేకపోయిన కీర్తి సురేష్.. మరోసారి తన ఉద్దేశ్యాన్ని చెప్పుకొచ్చిందట. ఆ తర్వాత దర్శకుడు నాగ్ అశ్విన్ రావడం.. క్యారెక్టర్ గురించి.. సినిమా గురించి చెప్పడంతో పాటు.. తాను చేస్తే ఈ పాత్ర బాగుంటుందని చెప్పడమే కాదు.. నమ్మకం కలిగించాడట కూడా.

ఆ తర్వాతే మహానటి ప్రాజెక్టులోకి తాను ఎంట్రీ ఇచ్చానని.. తాను సావిత్రిగా చేస్తే బాగుంటుందనే ఉద్దేశ్యాన్ని మొదట నుంచి వ్యక్తపరుస్తున్న వ్యక్తి నాని అని చెప్పింది కీర్తి సురేష్. అనేక మంది స్టార్లు క్యామియో రోల్స్ లో కనిపించబోతున్న మహానటి మూవీ.. ఈ నెల 9న థియేటర్లలోకి రానుంది.