త్రివిక్రమ్ రిలీజ్ చేసిన పోస్టరేదో బాగుందే..

‘ఇడియట్’ రోజుల నుంచి కమెడియన్ శ్రీనివాసరెడ్డి తెలుగు ప్రేక్షకులకు బాగానే పరిచయం. మరీ పెద్ద పాత్రలు చేయకున్నా.. చిన్న చిన్న పాత్రల్లోనే తన ప్రత్యేకత చాటుకుంటూ వచ్చాడు శ్రీనివాసరెడ్డి. హీరోలకు - విలన్లకు - స్టార్ కమెడియన్ల వెనక నిలబడి పంచులు వేసే క్యారెక్టర్లలో చాలాసార్లు చెలరేగిపోయాడు శ్రీనివాసరెడ్డి. మంచి కామెడీ టైమింగ్ ఉన్న శ్రీనివాసరెడ్డిని మన రచయితలు, దర్శకులు సరిగా వాడుకోవట్లేదేమో అన్న ఫీలింగ్ చాలామందిలో ఉంది. ఐతే కమెడియన్ గా అనుకున్న స్థాయి అందుకోలేకపోయినా.. ఆ మధ్య సడెన్ గా ‘గీతాంజలి’ సినిమాతో హీరో లాంటి వేషం సంపాదించాడు శ్రీనివాసరెడ్డి. ఆ సినిమా మంచి విజయాన్నందుకోవడంతో శ్రీనివాసరెడ్డికి ఈసారి పూర్తి స్థాయి హీరో వేషమే దక్కింది.

జయమ్ము నిశ్చయమ్మురా.. ఇదీ శ్రీనివాసరెడ్డి హీరోగా తెరకెక్కుతున్న కొత్త సినిమా. శివరాజ్ కనుమూరి అనే కొత్త దర్శకుడు ఈ చిత్రాన్ని తెరకెక్కిస్తున్నాడు. బస్సులో రోడ్ జర్నీ నేపథ్యంలో సాగే సినిమా ఇది. ఓ అబ్బాయి-అమ్మాయి కలిసి కరీం నగర్ నుంచి కాకినాడకు.. కాకినాడ నుంచి కరీంనగర్ కు ప్రయాణం చేసే క్రమంలో వాళ్లిద్దరి మధ్య ఎలాటి రిలేషన్ ఏర్పడిందో చూపించబోతున్నాడు కొత్త దర్శకుడు. శివరాజ్ స్వయంగా ఈ చిత్రాన్ని నిర్మించడం విశేషం. ఈ సినిమా వీడియో పోస్టర్ ను త్రివిక్రమ్ శ్రీనివాస్-నితిన్ కలిసి విడుదల చేయడం విశేషం. ఈ వీడియో పోస్టర్ కూడా వైవిధ్యంగా ఉండి.. జనాల్ని బాగానే ఆకట్టుకుంటోంది. శ్రీనివాసరెడ్డి హీరోగా మరో సక్సెస్ కొట్టేలాగే కనిపిస్తున్నాడు. త్వరలోనే ఈ సినిమా ప్రేక్షకుల ముందుకు రానుంది.
Full View