సూపర్ స్టార్ ఓపెన్ ఆఫర్.. కరోనాకు చెక్ పెట్టే ముందు కనిపెడితే రూ.కోటి నజరానా

ప్రపంచాన్ని వణికిస్తున్న కరోనా వైరస్ కు చెక్ పెట్టే మందు కనిపెడితే భారీ నజరానాను ప్రకటించారు ప్రముఖ నటుడు జాకీచాన్. ఇప్పటికే వందలాది ప్రాణాల్ని తీసుకున్న ఈ మాయదారి వైరస్ అంతు చూసే వ్యాక్సిన్ ను కనిపెట్టిన వారికి రూ.కోటి ఇస్తానని ఆయన ఓపెన్ ఆపర్ ఇచ్చేశారు. ఆగ్రరాజ్యమైన డ్రాగన్ దేశం కరోనా వైరస్ తో ఎంతలా ఉక్కిరిబిక్కిరి అవుతుందో ప్రత్యేకంగా చెప్పాల్సిన అవసరం లేదు.

ఈ వైరస్ ను పిశాచితో పోలుస్తూ చైనా అధ్యక్షుడు ప్రకటించటమే కాదు.. దానితో తాము పోరాటం చేస్తున్నట్లుగా ఆయన వెల్లడించారు. వేలాది మందికి వ్యాపిస్తున్న కరోనాను ఎలా కట్టడి చేయాలో అర్థం కాక చైనా కిందామీదా పడుతోంది. ఇప్పటికే పలు నగరాల్ని సీల్ చేసేసింది కూడా. రవాణా సౌకర్యాల్ని బంద్ చేసింది. కరోనా వైరస్ ను కంట్రోల్ చేసేందుకు వీలుగా ఇప్పటికే పెద్ద ఎత్తున ప్రయత్నాలు చేస్తున్నా.. ఫలితాలు మాత్రం రాని పరిస్థితి.

ఇదిలా ఉంటే.. తన వంతుగా కరోనాకు మందు కనుక్కుంటే రూ.కోటి నజరానా ప్రకటించిన జాకీచాన్.. మరోవైపు పలు సహాయక కార్యక్రమాల్ని షురూ చేశారు. తన వంతు బాధ్యతగా కరోనా మహ్మమారికి పుట్టిల్లు అయిన వూహాన్ లో మాస్కులు పంపిణీ చేస్తున్నారు. ఇప్పటికే మాస్కుల కొరత తీవ్రంగా ఉన్న వేళ.. వాటిని పంపిణీ చేయటం ద్వారా తనకు చేతనైనంత చేస్తున్నారు. సైన్స్.. టెక్నాలజీ కలిస్తే కరోనా వైరస్ కు పరిష్కారం లభిస్తుందన్న ఆశాభావాన్ని వ్యక్తం చేశారు.

త్వరలోనే దీనికి విరుగుడు లభిస్తుందన్నారు. కరోనా వైరస్ కు మందు కనిపెట్టే సత్తా చాలామందిలో ఉందన్న నమ్మకాన్ని వ్యక్తం చేస్తూ.. వారికి తాను ప్రకటించిన మొత్తాన్ని అందజేస్తానని పేర్కొన్నారు. మిగిలిన ప్రముఖ నటులకు భిన్నంగా జాకీచాన్ చేసిన ప్రకటన ఇప్పుడు ఆసక్తికరంగా మారింది.