'ద కిస్ ఆఫ్ లైఫ్' అంటున్న హీరో

హాట్ హీరోగా ఇమ్రాన్ హష్మీకి బాలీవుడ్ లో తిరుగులేని ఇమేజ్ ఉంది. కానీ ఇతను నిజ జీవితంలో మాత్రం చాలా పెద్ద కష్టం ఎదుర్కోవాల్సి వచ్చింది. అయినవారికి ఏదైనా జరిగితే బాధపడతాం. అదే కన్న పిల్లలకే కష్టం వస్తే ఆ బాధ వర్ణనాతీతం. అదే ఇమ్రాన్ హష్మీని ఇన్నేళ్లూ వేధించింది. కన్న కొడుకుకు కేన్సర్ వ్యాధి సోకడం ఇమ్రాన్ హష్మీని బాగా కలచివేసింది.

కానీ ఎంతో పట్టుదలతో తన కొడుకును ఆ రోగం నుంచి దూరం చేయగలిగాడు ఇమ్రాన్ హష్మీ. ఇప్పుడు తన వేదనను, అనుభవాలతో ఓ పుస్తకం రాశాడు. ఆ పుస్తకానికి పెట్టిన టైటిల్ ఇప్పుడు అందరినీ ఆకట్టుకుంటోంది. 'ద కిస్ ఆఫ్ లైఫ్: హౌ ఏ సూపర్ హీరో అండ్ మై సన్ డిఫీటెడ్ కేన్సర్'. తొమ్మిదేళ్ల క్రితం ఇమ్రాన్ హష్మీకి పర్వీన్ సహానీతో పెళ్లి జరిగింది. వీరి కొడుకుకి కేన్సర్ సోకడంతో ఇద్దరూ తల్లడిల్లిపోయారు. కొడుకు పడుతున్న బాధను చూసి వేదన చెందారు. ఆ సమయంలో వీరు పడిన బాధ, కొడుకు అనుభవించిన వేదనలనే అనుభవాలుగా ఈ పుస్తకాన్ని రాశాడు ఇమ్రాన్ హష్మీ.

ఇంగ్లీష్ - హిందీ - మరాఠీ భాషల్లో ఈ పుస్తకం విడుదల కానుంది. తన కష్టాన్ని పుస్తకంగా ప్రచురిస్తున్న పబ్లిషర్స్ కు కృతజ్ఞతలు చెప్పిన ఈ హీరో.. ఈ ఏడాది చివరి నాటికి ఈ పుస్తకం స్టాండ్స్ లో ఉంటుందని ఆశిస్తున్నట్లు చెప్పాడు. ప్రస్తుతం అజారుద్దీన్ పేరుతో.. క్రికెటర్ మహమ్మద్ అజారుద్దీన్ బయోపిక్ లో నటిస్తున్నాడు ఇమ్రాన్ హష్మీ.