'బిచ్చగాడు 2' ఫస్ట్ లుక్...!

'బిచ్చగాడు' సినిమాతో అటు తమిళం ఇటు తెలుగు ప్రేక్షకులలో మంచి ఇమేజ్ క్రియేట్ చేసుకున్న హీరో విజయ్ ఆంటోని. 2016లో ప్రేక్షకుల ముందుకు వచ్చిన 'బిచ్చగాడు' సినిమా ఎటుంటి అంచనాలు లేకుండా బాక్సాఫీస్ వద్ద కాసుల వర్షం కురిపించింది. ఈ సినిమాలో విజయ్ ఆంటోని హీరోగా నటించడంతో పాటు నిర్మాతగా సంగీత దర్శకుడిగా కూడా వ్యవహరించాడు. శశి దర్శకత్వంలో తెరకెక్కిన 'బిచ్చగాడు' సినిమాలో అమ్మ సెంటిమెంట్ ని అద్భుతంగా చూపించి సక్సెస్ అయ్యారు. ఇప్పుడు ఈ సినిమాకి కొనసాగింపుగా 'బిచ్చగాడు 2' రాబోతోంది. ఇటీవల ఓ ఇంటర్వ్యూలో మాట్లాడిన విజయ్ ఆంటోనీ 'బిచ్చగాడు' సీక్వెల్ కథ రెడీ అవుతుందని.. నాలుగు నెలల నుంచి స్క్రిప్ప్ట్ సిద్ధం చేసే పనిలో ఉన్నానని వెల్లడించారు. ఈ క్రమంలో తాజాగా 'బిచ్చగాడు 2' అనౌన్స్ మెంట్ పోస్టర్ రిలీజ్ చేసింది చిత్ర బృందం.

కాగా నేడు మల్టీ టాలెంటెడ్ విజయ్ ఆంటోనీ పుట్టినరోజు. ఈ సందర్భంగా 'బిచ్చగాడు 2' అనౌన్సమెంట్ పోస్టర్ విడుదల చేయడంతో పాటు సాంకేతిక నిపుణులను కూడా ప్రకటించారు. 'బిచ్చగాడు 2'  సినిమాకి నేషనల్ అవార్డ్ విన్నింగ్ డైరెక్టర్ ప్రియా కృష్ణస్వామి దర్శకత్వం వహిస్తున్నారు. విజయ్ ఆంటోని హీరోగా నిర్మాత‌గా వస్తున్న ఈ సినిమా తమిళంలో 'పిచ్చైకారన్ 2' తెలుగులో 'బిచ్చగాడు 2' పేరుతో రూపొందనుంది. 2021లో ఈ సీక్వెల్‌ ను విడుద‌ల చేయ‌డానికి ప్లాన్ చేస్తున్నారు. 'నకిలీ' 'డాక్టర్ సలీమ్' 'బిచ్చ‌గాడు' చిత్రాలతో ఇప్పటికే తెలుగు ప్రేక్షకుల‌ను మెప్పించిన విజ‌య్ ఆంటోని 'బిచ్చగాడు 2' సినిమాతో ఎలాంటి సంచలనాలు క్రియేట్ చేస్తాడో చూడాలి.