పెళ్లెప్పుడు అని అడిగితే నీళ్లు న‌ములుతోంది!

అందాల క‌థానాయిక‌ల్ని ఎప్పుడూ పెళ్లెప్పుడు? అని అడ‌గ‌కూడదు. ఒక‌వేళ అడిగినా దానికి స‌మాధానం ఎలా ఉంటుందో ఊహించ‌గ‌లం. రంగుల ప్ర‌పంచంలో పెళ్లి అనే టాపిక్ తో చాలా త‌ల‌నొప్పులు ఉంటాయి. ఆ ఒక్క‌టీ ఇక్క‌డ వంద‌ల కోట్ల బిజినెస్ ని ప్ర‌భావితం చేస్తుంది. ఫ‌లానా హీరోయ‌న్ కి పెళ్లంట‌! అన్న ఒక్క మాట‌తో క్యూలో ఉన్న ఛాన్సుల‌న్నీ జీరో అయిపోతాయి. అందుకే నాయిక‌లు చాలా వ‌ర‌కూ పెళ్లిని వాయిదా వేయాల్సిన ప‌రిస్థితి ఉంటుంది. చేతిలో ఉన్న క‌మిట్ మెంట్ల‌ను పూర్తి చేస్తే కానీ పెళ్లి మ్యాట‌ర్ జోలికి వెళ్ల‌రు.

బాలీవుడ్ అందాల నాయిక‌ ఆలియాకి ఇదే స‌మ‌స్య ఎదుర‌వుతోంది. ర‌ణ‌బీర్ - ఆలియా ఇద్ద‌రూ కెరీర్ ప‌రంగా బిజీ బిజీ. ఇక ఆలియా భ‌ట్ అయితే వ‌రుస పాన్ వ‌ల‌ర్డ్ సినిమాల‌తో పెను సంచ‌ల‌నంగా మారింది. ఇప్పుడున్న బిజినెస్ స్పీడ్ కొన్నాళ్ల‌కు ఉంటుందా అంటే చెప్ప‌లేం. అందుకే ర‌ణ‌బీర్ తో పెళ్లెప్పుడు? అని ప్ర‌శ్నిస్తే స‌మాధానం చెప్పేందుకు చాలా ఆలోచిస్తోంది. కెరీర్ ప‌రంగా ఉన్న‌త స్థానంలో ఉన్న ఆలియాకు వెంట‌నే స‌మాధానం చెప్పేయాలంటే చాలా స‌మ‌స్య‌గా ఉంది. తాజాగా ఓ చాటింగ్ సెష‌న్ లో కూడా అందుకే నీళ్లు న‌మిలింది ఆలియా. ర‌ణ‌బీర్ తో పెళ్లెప్పుడు? అని అభిమాని అడిగిన ప్ర‌శ్న‌కు స‌మాధానం దాట వేసింది. కేవ‌లం సంజ్ఞ‌ల‌తో స‌రిపుచ్చింది.

ఆలియా తాజాగా తన జీవితంలో ఒక సాధారణ రోజును డాక్యుమెంట్ చేస్తూ తన యూట్యూబ్ ఛానెల్ లో వీడియోను అప్ లోడ్ చేసింది. ఇది తన బెస్ట్ ఫ్రెండ్ ఆకాన్షా రంజన్ కపూర్ తో కలిసి ఒక ప్రకటన షూట్ కోసం స్టూడియోకి డ్రైవింగ్ చేయడంతో మొదలవుతుంది. వీడియో మొత్తం అలియా అభిమానుల ప్రశ్నలకు సమాధానం ఇస్తుంది.  ఎప్పుడు పెళ్లి చేసుకుంటారు? అంటూ అడిగిన కొంతమంది అభిమానులకు సమాధానం ఇవ్వకుండా ఆమె కేవలం భుజాలు తట్టింది. తన సంజ్ఞ ద్వారా ఆమె ఉద్ధేశ్యం ఏమిటనేది ఆ ప్రశ్న అడిగిన వారికి వదిలివేసింది.

ఫ్యాన్స్ లో ఒకరు స్క్రీన్ సేవర్ గురించి అడిగారు. దానికి ఆలియా తన ఫోన్ స్క్రీన్ ని కెమెరా వైపు తిప్పడం ద్వారా రణబీర్ తో ఉన్న తన ఫోటోను చూపించడం ద్వారా సమాధానం ఇచ్చింది. దీన‌ర్థం త‌మ మ‌ధ్య ప్రేమ స‌జావుగానే ఉంద‌ని. ఆమె తన ప్రేరణలు షూట్ అనుభవం  ట్రోల్ లతో ఎలా వ్యవహరిస్తుంది? అనే ప్రశ్నలకు సమాధానమిచ్చింది.