అనిల్ రావిపూడి.. తారక్ తో సినిమా ఎందుకు సెట్ అవ్వలేదు?

టాలీవుడ్‌లో ఇప్పుడు ఎక్కడ చూసినా డైరెక్టర్ అనిల్ రావిపూడి పేరు మారుమోగిపోతోంది. మెగాస్టార్ చిరంజీవితో ఆయన తీసిన 'మన శంకర వరప్రసాద్ గారు' సినిమా థియేటర్ల వద్ద కలెక్షన్ల వర్షం కురిపిస్తోంది. ఇప్పటికే బుక్ మై షోలో ఈ సినిమా 10 లక్షల కంటే ఎక్కువ టికెట్లు అమ్ముడై సరికొత్త రికార్డ్ క్రియేట్ చేసింది. కేవలం వినోదాన్ని మాత్రమే నమ్ముకుని వరుసగా 9 హిట్లు కొట్టిన అనిల్ రావిపూడి, తెలుగు సినిమా ఇండస్ట్రీలో ఒక 'సక్సెస్ ఫుల్ బ్రాండ్' గా మారిపోయారు.

అపజయం అనేది లేకుండా దూసుకుపోతున్న అనిల్, ఒకవైపు కమర్షియల్ హిట్లు కొడుతూనే మరోవైపు టాలీవుడ్ అగ్ర హీరోలతో పనిచేయాలని ప్లాన్ చేసుకుంటున్నారు. ఇప్పటికే మహేష్ బాబుతో 'సరిలేరు నీకెవ్వరు' వంటి బిగ్గెస్ట్ హిట్ అందుకున్న ఆయన, బాక్సాఫీస్ వద్ద తన సత్తా ఏంటో నిరూపించారు. అయితే, ప్రతి దర్శకుడికి ఒక డ్రీమ్ హీరో ఉన్నట్లే, అనిల్ రావిపూడికి కూడా యంగ్ టైగర్ ఎన్టీఆర్ తో ఒక భారీ ప్రాజెక్ట్ చేయాలనే కోరిక ఎప్పటి నుంచో ఉంది.

ఈ క్రేజీ కాంబినేషన్ కు సంబంధించి గతంలో ఒక ఇంటర్వ్యూలో అనిల్ కొన్ని ఆసక్తికర విషయాలు షేర్ చేసుకున్నారు. నిజానికి జూనియర్ ఎన్టీఆర్ తో ఒక ప్యాన్ ఇండియా మూవీ చేయాలని తాను రెండు మూడు సార్లు ప్రయత్నించినట్లు ఆయన వెల్లడించారు. తారక్ అంటే తనకు చాలా ఇష్టమని, ఆయనను ఎగ్జైట్ చేసేలా ఒక అదిరిపోయే కథ కూడా సిద్ధం చేసుకున్నట్లు చెప్పారు. కానీ కొన్ని ప్రాక్టికల్ కారణాల వల్ల ఆ ప్రాజెక్ట్ అప్పట్లో సెట్స్ పైకి వెళ్లలేకపోయింది.

ఒక ప్యాన్ ఇండియా సినిమా తీయాలంటే దానికి తగ్గ స్కేల్, పర్ఫెక్ట్ వరల్డ్ క్రియేషన్ ఉండాలని అనిల్ రావిపూడి నమ్ముతారు. కేవలం అనుకుంటే సరిపోదని, నేషన్ వైడ్ ఆడియన్స్ కు నచ్చేలా కంటెంట్ ఉండాలని ఆయన అభిప్రాయపడ్డారు. ప్రస్తుతం తాను ఉన్న ఫేజ్ లో చాలా కంఫర్టబుల్ గా ఉన్నానని, భవిష్యత్తులో ఖచ్చితంగా తారక్ తో పాటు మిగతా స్టార్ హీరోలందరితో సినిమాలు చేస్తానని ఆయన ధీమా వ్యక్తం చేశారు. మార్కెట్ పెరిగినప్పుడు దానికి తగ్గట్లుగా కొత్త కథలతో వస్తానని ప్రామిస్ చేశారు.

ప్రస్తుతం 'మన శంకర వరప్రసాద్ గారు' సక్సెస్ తో అనిల్ రావిపూడి రేంజ్ మరింత పెరిగింది. ఈ సినిమాలో మెగాస్టార్ చిరంజీవిని వింటేజ్ లుక్ లో చూపిస్తూనే, తన మార్క్ కామెడీతో మ్యాజిక్ చేశారు. విక్టరీ వెంకటేష్ గెస్ట్ రోల్ నయనతార హీరోయిన్ గా ఉండటం సినిమాకు పెద్ద ప్లస్ అయింది. ఈ సినిమా ఇస్తున్న బూస్ట్ తో, అనిల్ తన నెక్స్ట్ ప్రాజెక్ట్స్ విషయంలో మరింత జాగ్రత్తగా అడుగులు వేస్తున్నారు.

రాజమౌళి తరువాత 100% సక్సెస్ రేటుతో అనిల్ రావిపూడి టాప్ లో నిలిచారు. త్వరలోనే ఎన్టీఆర్ కు సరిపోయే ఒక వైల్డ్ స్క్రిప్ట్ తో ఆయన ముందుకు వచ్చే అవకాశం ఉందని ఫ్యాన్స్ ఆశిస్తున్నారు. సంక్రాంతి సీజన్ లో బాక్సాఫీస్ వద్ద 'MSG' హవా కొనసాగుతుండటంతో, అనిల్ రావిపూడి తన తదుపరి ప్లాన్స్ ఎప్పుడు అనౌన్స్ చేస్తారో అని అందరూ ఈగర్ గా వెయిట్ చేస్తున్నారు.