సుహాస్ న్యూ మూవీ రిలీజ్ డేట్.. బ్యాండ్ మోగించడమే

టాలీవుడ్ లో కలర్ ఫొటో, రైటర్ పద్మభూషణ్ వంటి సినిమాలతో టాలెంటెడ్ యాక్టర్ గా తనకంటూ ప్రత్యేక గుర్తింపు తెచ్చుకున్నారు సుహాస్. ప్రస్తుతం బ్యాక్ టు బ్యాక్ సినిమాలతో దూసుకుపోతున్నారు. షార్ట్ ఫిలిమ్స్, యూట్యూబ్ వీడియోలతో కెరీర్ ప్రారంభించిన సుహాస్ కలర్ ఫొటో సినిమాతో హీరోగా మారారు.

మొదటి సినిమాతోనే తన నటనతో ప్రతి ఒక్కరి చేత కంటతడి పెట్టించిన సుహాస్.. ఆ తర్వాత ఫ్యామిలీ డ్రామా అనే మూవీలో నెగిటివ్ షేడ్స్ ఉన్న పాత్రలో కనిపించి ఆకట్టుకున్నారు. ఇటీవలే రైటర్ పద్మభూషణ్ తో మంచి సక్సెస్ అందుకున్న సుహాస్.. తాజాగా అంబాజీపేట మ్యారేజ్ బ్యాండ్ అనే సినిమాతో ప్రేక్షకుల ముందుకు రాబోతున్నారు.

కామెడీ డ్రామా కథతో తెరకెక్కుతున్న ఈ సినిమా రిలీజ్ డేట్ ను మేకర్స్ మంగళవారం అనౌన్స్ చేశారు. ఈ సినిమాను ఫిబ్రవరి 2న గ్రాండ్ గా థియేటర్స్ ద్వారా ప్రేక్షకుల ముందుకు తీసుకొస్తున్నట్లు ప్రకటించారు. కంప్లీట్ విలేజ్ బ్యాక్ డ్రాప్ లో తెరకెక్కిన ఈ చిత్రానికి థియేటర్స్ లో ఆడియెన్స్ కు యూనిక్ ఎక్స్ పీరియన్స్ ఇస్తుందని చిత్రబృందం చెబుతోంది. కొన్ని రోజుల క్రితం టీజర్ ను విడుదల చేసి అంచనాలు పెంచారు మేకర్స్.

టీజర్ ప్రకారం.. మల్లి(సుహాస్‌) ఒక సెలూన్ నడుపుతూనే అంబాజీపేట మ్యారేజ్ బ్యాండ్‌లో డప్పు కొడుతుంటాడు. అలాంటి వాడికి ఒక కాలేజీ అమ్మాయి పరిచయం కావడం.. వారిద్దరూ ప్రేమలో పడటం వల్ల ఎదురయ్యే సమస్యలు కథలు ప్రధానంగా ఉన్నట్లు టీజర్‌లో తెలుస్తోంది. టీజర్‌ చివరిలో సుహాస్‌కు గుండు కొట్టిస్తూ ఉన్న షాట్ హైలైట్‌గా ఉన్నా అందుకు ప్రధాన కారణాలు ఏంటి? అనే ప్రశ్న అందరిలోనూ మెదులుతుంది.

దుశ్యంత్ కటికినేని దర్శకత్వం వహిస్తున్న ఈ సినిమాలో సుహాస్ తో పాటు శివాని నాగరం, సీనియర్ నటుడు గోపరాజు రమణ, పుష్ప ఫ్రేమ్ జగదీష్ బండారి తదితరులు కీలక పాత్రలు పోషించారు. గీతా ఆర్ట్స్ 2, మహాయణ మోషన్ పిక్చర్స్, ధీరజ్ మొగిలినేని ఎటాచ్మెంట్ సంయుక్తంగా ఈ చిత్రాన్ని నిర్మించాయి.

శేఖర్ చంద్ర సంగీతం అందించిన ఈ చిత్రానికి వాజిద్ బేగ్ సినిమాటోగ్రాఫర్ గా వ్యవహరించారు. ఈ సినిమాతో పాటు రామ్ పసుపులేటి దర్శకత్వంలో ఆనందరావు అడ్వెంచర్స్ అనే చిత్రంలోనూ నటిస్తున్నారు సుహాస్. రీసెంట్ గా విడుదలైన టైటిల్ పోస్టర్ కు మంచి రెస్పాన్స్ వచ్చింది.